Read Karang Mbete Filipiri 3 Bible Online

Mbete Filipiri 3 - Karang bible

Mbete Filipiri 3

¹Mí yi̧n biri, ŋga̧h tulɓay bi mí na-ay : Í laɓ law rihna kandɔk gun puh lakna Gaŋ tul feri riw. Vbéh ɓayu bɔk seɗe hi̧ wuri zɔklɔ mi ya, mí hewna-u ɓa ŋgaŋ woiri.

²Í ru̧ ke mun woiri ɓay ziɓri kú-u vba̧ haŋ ɓay bolkusol ké Ŋgerzah ŋga̧h ziŋ niri. Ku ɗi sa̧wnzuk a ɓoruri ɓa gayri. Mí a woyri gaŋ ku ɓa gayri. Í ru̧ ke mun woiri ɓay nzukawri-aw ké ƴo tul fe laɓna bolkusol Ŋgerzah, mí ku ƴo tulu ɓa suki ya. Ku ɗi sa̧w woiri ɓa sa̧wnzuk ndi̧w ɓɔlri, mí bolkusol-kuŋ ndi̧w ké Ŋgerzah hi̧ niri ra, ku laɓ hi̧ na kpo̧k[6].

³A wah ba, sa̧w wah ɓa sa̧wnzuk-kuŋ ndi̧w a kpakpaŋuri. Kúŋ ndi̧w wah na ɓoɗ. Sa̧w-kuŋ ndi̧w wah ɓa a haymun ya. Nah ɓa nzuk kani ké Tem Ŋgerzah ƴo ziŋ na hi̧ na nah dim ni. Nah vba̧ haŋ ɓay Mbay Zezu ké ɓa mbay wah. Nah kan law tul fe laɓna a haymun ya.

⁴A bi ra mi mah kan law tul fe laɓna bolkusol Ŋgerzah ké mi laɓ ke mun bi. Mi kan ra law bi tul ŋgerna mun le, garɓay bi a lewsa̧-aw ƴo gelu. Nzuk a hani ko mun mah kan law ye tul fe laɓna bolkusol Ŋgerzah le, a bi mi mba ni mba.

⁵Ku kuŋ ndi̧w bi fal mbuŋna bi nam a toŋndɔk seɗe-u kandɔk ké Ŋgerzah sɔk. Ku mbuŋ mi ɓa mi̧hri Izarayel a fál nzak ndɔk Benzameh. Mi ɓa ebere gaŋ, mi ƴo tul bolkusol Ŋgerzah ke gelu gelu ɓa farizi[7],

⁶mi ri̧h si̧w tul wahɓay ké Ŋgerzah ŋga̧h ziŋ zih bi ziɓri, sa̧wu mí-i eɓ ful ɓay duh sa̧w in Ŋgermbay. Ɓay siŋ sina a ndaru ké ti̧h ke bolkusol Ŋgerzah le, nzuk-zɔm mi ta-a.

⁷Lewsa̧, mi ko fe laɓna sa̧w zih biri-ay ɓa fe a ti̧h suk. Wara le ti̧h ɓa fe ndikpo ɓay tul Ŋgermbay.

⁸Ketina, mi ko ŋgerna feri-aw gbam ɓa fe ndikpo wara. Mí fe ké su mbamba ɓa tú Gaŋ bi Mbay Zezu ke mun bi tu-tu. Ɓay tul ye mí sa̧w fe laɓnari-aw ké mi ko ɓa fe a kpakpaŋu ti̧h ɓa kɔk fe. Mi ko fe-uri mah fer ku̧ tul nzakseh ɓay poŋ hi̧ mí mgba Ŋgermbay ɓa fe ziŋna bi,

⁹ɓay poŋ hi̧ mí tu mun bi mbew ziŋ ni. Ƴó tul bolkusol Ŋgerzah ta ɓa fe ké ŋga̧h mi ziŋ ni ya. Wara le ɓa law Ŋgermbay ké te sa tul Ŋgerzah mí ŋga̧h mi ziŋ ni. Sa̧w-ŋga̧h sal inu ur ké ta̧w Ŋgerzah ɓay law mbew.

¹⁰Su mbamba ɓay tu ni ke mun bi, tú ŋgerna ké hi̧ ni ti̧h ke puh záh ke pa̧ymun a foyu, ɓa mbú̧h ziŋ ni ɓil koseh ye dara éŋ ni ɓil hul ye.

¹¹Dale a bi kara mí tu ke mun bi a fe mí ɓa tí̧h ké sakra hulri.

¹²Ɓay mí ɓahri, mi ti̧h ké sakra hulri da ra, mi ta ɓah-u ya ɓáy. Ɓay fe le mi tu hul ye ke ti̧hna ye ké sakra hulri ɔh ya ɓáy. Mí mi ƴo ruh mun ɓay tu ti̧hna-u kandɔk ké a ye Ŋgermbay ke mgba mi ɓay mí hu, mí ti̧h.

¹³Yi̧n biri, mi ko mun bi ɓahri, mi tu ɔh ya ɓáy. Fe mbew mí ɓa fe ké ti̧h suk. Mi ko kona wori-wori ma tul fe a ɓoruri ya, mi ko kona siŋriŋ ma pol bi.

¹⁴Mi ruh mun bi ƴo ɗuk ma fál kpaŋndɔk ké na gbu̧h-u ké mba tul kpaŋndɔkri gbam. Kpaŋndɔku-aw na ɓay nzukri ké Ŋgerzah ɗi niri ɓa gun Mbay Zezu.

¹⁵Kaŋ mí a wah nzukri ké kerɓay wah ŋger da ra, su ɓay náh ker wuri kandɔkaw. Mí nzukri ké kerɓay woyri na ɓoɗ le, Ŋgerzah ɓay te-teh-u hi̧ niri ɓáy.

¹⁶Mí keni-aw kara siŋ sina gun puh Mbay Zezu ké nah ti ra, mah ɓay náh si keni ma pol pol.

¹⁷Í ndɔl wuri fe laɓna Ŋgermbay ziŋ mi, yi̧n biri. Nzukri ké si siŋ sina ké a wah nah ƴo si-u ra, í mbi siŋ sina woyri.

¹⁸Ɓay ŋgi̧na nzukri ké mi hew wuri ɓay tul woyri ka̧yri ka̧yri mí aŋay kara mi ƴo ɓah ke mbihnun ra ɓáy ɓahri, ku si siŋ sina ɓa nzukbaa Ŋgermbay. Ku sa lah ɓay hul mgbal ye ké tul kpuh vbatay ya.

¹⁹Ɔ́h tɔr woyri ɓa ɓeɓna. Záh woyri ɓa ɓil woyri. Su̧hru woyri, ku ko ɓa riŋ ɗina woyri. A woyri-aw, kerɓay woyri na sa tul sa̧w fe laɓna tusiɓa woyri.

²⁰A wah le sa̧w puh wah ƴo nunmbam, mí nah kaɓ keh ƴo geŋ gina ye Nzuk-ya̧ na, Gaŋ wah Ŋgermbay Zezu.

²¹A ye ke ɓay sɔɓ mun wah ké ɓa ko̧hko eŋ mun ye ké mah riŋ ɗina ye ké si mbew ke huhrumun ye ké ƴo hi̧ feri gbam ɗiŋ tul ké pol ye.