Read Karang Mbete Filipiri 4 Bible Online

Mbete Filipiri 4 - Karang bible

Mbete Filipiri 4

¹Kandɔkaw mí gun sanari, í ƴo wuri ɓa kpuh-u ɓa gun puh lakna Gaŋ tul feri riw. A woiri yi̧n biri i ɓa maŋlaw biri, i ɓa nzukri ké kerɓay bi na tul woiri hoy, ké i ɓa law rihna bi ke riŋ ɗina bi.

²Mi ƴo goŋ Evodi pi, mi ƴo goŋ Sa̧ytisi pi, í lek wuri ɓay mbew ɓa gun puh lakna Gaŋ wah.

³A wo bɔh pihna bi a kpakpaŋu, mi ƴo goŋ mu, mú gɔl wu̧yri ké seɗe-aw. Ku ruh mun ziŋ mi ɓay tul ɓaysuki hul Ŋgermbay, a woyri ke Kelmaŋ ke tɔr bɔh pihna a ɓoruri. Riŋ woyri gbam na ɓil mbete riŋ nzuk-ƴo ke ɔknari.

⁴Í laɓ wuri law rihna kpatara ɓa gun puh lakna Gaŋ tul feri riw. Mi ɓah ra ɓáy, í laɓ wuri law rihna.

⁵Hȩ́k hani woiri ɓá teh ké nun nzukri gbam. Gaŋ tul feri riw ƴo ri.

⁶Law woiri ɓá nzah ɓay ya. Le í sɔk fe zɔklɔ woiri ke bamu bamu ké pol Ŋgerzah. Í el ke tumbɔl hi̧ ni kpatara ɓil goŋna, ɓil vuhna woiri pi.

⁷Mí ɗeŋ Ŋgerzah ké mba tul kerɓay nzukri gbam mba-mba ra ɓay kɔr law woiri ke kerɓay woiri ké i ƴo ke Mbay Zezu.

⁸Yi̧n biri, mi ɓahri se, kerɓayri gbam ké si ke ɓay a ketina, ké si ke hȩ́k Ŋgerzah ke hȩ́k hani, ké si ke gelu gelu ke sal in Ŋgerzah, ké te-teh ké nun Ŋgerzah, ké hi̧ mgbá hani, ké hi̧ pír hani, sam kerɓay a kandɔkawri gbam ké mah hi̧ riŋ ɗina baah Ŋgerzah mgbe, í mgba ma law woiri.

⁹Feri ké i tih keni ké ta̧w bi, ké i ya̧, ké i lah, ké i ko mi ƴo laɓu ra, í ndoh mun woiri ɓilu. Ŋgerzah a ye nzuk sa̧w ɗeŋ ɓay ƴo ziŋ wuri.

¹⁰Law bi rih mi keɗ keɗ ɓay tul Gaŋ wah ɓa ŋgi̧-u ɓay fe le, i ker ɓay tul bi kpu̧ru ka̧h nam ké i ziŋ ful-pih sona hi̧ mi-ay.

¹¹Ta ɓa ɓayu ké fe poh mi mí-i ɓah kaŋaw ya. Mi tih ke law rihna ké tul fe bi.

¹²Mi tu káɓ ɓa ko̧hko tu-tu, mi tu káɓ ɓa vana tu-tu. Sa̧wsehri gbam ke gelri gbam, laɓi ɓil mbahna, laɓi ɗaka, laɓi vana, laɓi ko̧hko, gbam, mi i-i.

¹³Tukala bi na ani gaŋ kara mi ma-mah ɓayu ké Gaŋ wah Ŋgermbay Zezu ƴo hi̧ mi ŋgerna.

¹⁴Keni-aw kara suki ké i laɓaw, i mbu̧h ziŋ mi ɓil koseh bi.

¹⁵A woiri nzuk Filipiri, i tu wuri tu. Sew a titilu ra, ɓaysuki hul Ŋgermbay ka̧h Maseduwan tusiɓa woiri, mí-i tɔr. Tɔrna bi-aw, sa̧w in Ŋgermbay ké puh a ɓoruri ké mbu̧h ndɔk ziŋ mi ɓil ɓaysuki-u ta-a. Sa ɓa a woiri ke hȩk.

¹⁶Sew ké mi ƴo Tesaloni kara i pih ke sona hi̧ mi le, i pih ɓáy.

¹⁷Sa̧w ɓay ɓahna bi ta ɓa hál lehna kpuh ké nzakndɔk woiri ya. Mi ɓah kaŋ ɓay lehna-aw ɓá na uɓak uɓak hi̧ wuri.

¹⁸I pih yi̧n wah Epofodi. Ke ka̧h mi ka̧h, mí nzak pihna-u mah mi seeh. Nzak pihna woiri-ay, ba̧ri-u fu̧ Ŋgerzah buy buy rih law ye ɓa fe puhna ké-e ya̧-ya̧[8].

¹⁹Ŋgerzah wah ɓay mbar gel ké poh wuri ke ahna ndɔk ye ké mah ke riŋ ɗina ké mgbe ké tul Mbay Zezu.

²⁰Riŋ ɗina-u ɓa nzuku a Ŋgerzah a ye Bah wah sew ke sew ɓa ŋgɔh. Gelu munu.

²¹Í vah gun puh Mbay Zezuri gbam hi̧ mi. Yi̧n wahri ké ƴo ziŋ mi vah wuri pi.

²²A woyri gbam ké Ŋgerzah lu niri ɓa sa̧w ye, ku vah wuri, wara le a woyri kú-u ƴo ɓil kerpuh mbay sezar, ku vah wuri pi.

²³Lawsuki Gaŋ wah Ŋgermbay Zezu ƴo tem woiri mbew mbew gbam.