Read Karang Mbete Kolosiri 1 Bible Online

Mbete Kolosiri 1 - Karang bible

Mbete Kolosiri 1

¹A bi Pɔl gun nzak pihna Mbay Zezu kandɔk ké Ŋgerzah yih, a bi ke yi̧n wahri Timote nah vbeh mbete-ay hi̧ wuri ké i ƴo ziŋ Ŋgermbay, ké i ƴo mbu̧h hani ké Kolosi, ké i ɓa sa̧w nzuk Ŋgerzahri, ké law woiri te sa tul Ŋgermbay. Nah vah wuri ke lawsuki ke ɗeŋ ké ur ké ta̧w bah wah Ŋgerzah.

³Ɓil góŋ Ŋgerzah wah, nah el ke tumbɔl hi̧ ni kpatara ɓay tul woiri a ye ké-e ɓa bah Ŋgermbay Zezu Gaŋ wah.

⁴Nah lah ɓahri se, i kan law sa tul Mbay Zezu, i el laɓ law sana ziŋ sa̧w nzuk Ŋgerzahri pi.

⁵Kerɓay woiri na kaŋ ɓay tul suki ké ƴo geŋ wuri ké nunmbam. I lah ketina suki-aw ke seh ké i lah ɓaysuki hul Ŋgermbay.

⁶Ɓaysuki ra gi ka̧h wuri kandɔk tusiɓa a ɓoruri gbam. Ɓaysuki-aw ɓa mi̧hri kú-u ruh, ké ti̧h mí lehna-u ŋger, kaŋ pi mí lehna ɓaysuki ƴo ŋger ké sakra woiri ur ke seh ké i lah, ké i tu ketina lawsuki Ŋgerzah tu.

⁷Lehna ɓaysuki ra ŋger si ke fe firma ké Epafara firma wuri, a ye ké-e ɓa maŋlaw wah, ɓa bɔh pihna wah. Ke ƴo tul pihna Ŋgermbay ɓa kpuh-u soh gel wah[1].

⁸Law sana Tempuki ké i ƴo keni ké na law woiri, ke ndazi ɓayu hi̧ na gaŋ.

⁹Sa̧wu mí a wah kara ur ke seh ké nah lah ɓay woiri-aw, nah yȩkre goŋ Ŋgerzah ɓay tul woiri ya. Nah ƴo vbi ni, ké hi̧ wuri í tu fe ké-e yih ra ka̧h gbu̧h-u ɓil ru̧na a Tempuki pi, ɓil goso fe tuna a Tempuki pi

¹⁰hi̧ í si siŋ sina ké si ke riŋ Gaŋ tul feri riw. Sam siŋ sina-aw mí Ŋgerzah ya̧ ke law rihna. Ke fe laɓna-awri gbam i ɓa nzukri ké leh lehna a suki, ké tu Ŋgerzah ma pol pol ɓa teh-u.

¹¹Ke fe laɓna-awri gbam i ziŋ ŋgerna ké si mbew ke huhrumun riŋ ɗina Ŋgerzah ra, i su̧h law, i ik law dara mí

¹²i el ke tumbɔl ke law rihna hi̧ baah a ye ké-e sɔɓ wuri ti̧h ɓa gun gel tehnari ké mah ya̧ fe ye ké-e mbek geŋ sa̧w nzuk yeri gbam pi. Nah ƴo vbi ni kaŋ.

¹³A ye ké-e ten na ke ndɔk záh tirim, ke loh na gi ɓil lák mbay gun sana ye.

¹⁴A ye gun sana ra ke soh tul wah sel na ké ndɔk hul. Salɓay suya ké mgba tul wah lu da.

¹⁵A ye ké nzuk ko ni ke nun ra, ke ba Ŋgerzah ké nzuk ko ke nun ya ɓa fe tem mun Ŋgerzah. Ke ɓa gun pol ké tul feri gbam ké Ŋgerzah laɓ.

¹⁶Ɓay fe le feri gbam ƴo le, ƴo ɓay gun ra, feri ké ƴo nunmbam ke feri ké ƴo tusiɓa gbam, feri ké nzuk ko ke nun ke feri ké nzuk ko ke nun ya, ɓa ra záh ŋgermbayri, ɓa ra záh gaŋri, ɓa ra záh mbayri, ɓa ra záh-lak mbayri. Feri ɓoɗ ɓoɗ gbam laɓ ke ndɔk ye, mí ɓay el ma ta̧w ye.

¹⁷A ye ra, ke ƴo ri pol hi̧ feri gbam. Feri gbam ƴo kaɓ ɓay tul ye.

¹⁸A ye ra, ke ɓa tul sa̧w in Ŋgermbay, ku ɓa mun ye. Ke ɓa sa̧w woyri. Ke ɓa gun pol ké ti̧h ɗekrekrek ké sakra hulri, ke ƴo ke titilu hi̧ feri gbam.

¹⁹Ɓay fe le law Ŋgerzah na sa tul ye hi̧ mun ye ya̧ mun gun pol ra ɔh gbam,

²⁰law ye na sa tul ye ɓay mgba nzak nzaw ziŋ feri gbam ké tusiɓa, ké nunmbam ɓay gun. Mí feri gbam el ma ta̧w gunu. Ke sem ye ké ku̧ tul kpuh vbatay mí ɗeŋ gi tul feri gbam ké-e laɓ.

²¹A woiri kara lewsa̧ sa̧w woiri na ɓoɗ, i ɓa nzukbaa ɓay tul kerɓay woiri ké ɓil fe laɓna a pipiri-uri.

²²Mí aŋay ba, ke haymun ye ke mgba nzak nzaw ɓay hul ye hi̧ i ƴo pol ye ɓa sa̧w ye, hi̧ i ɓa fe ké ndɔh ké nun ye, hi̧ sék wuri ta mba.

²³Mgbá nzak nzaw ra le la-laɓ gaŋ. Dale law woiri ké ɓar sa̧w ɓa kpuh-u tul kanlaw ra í ƴo tulu ɓa ketina. Suki ké i ƴo geŋu ur ke seh ké i lah ɓaysuki hul Ŋgermbay, law woiri ra ɓá laŋ ké tulu ya. Ɓaysuki kú-u ka-kah-u ɔh gelri gbam, mí a bi Pɔl mi ti̧h ɓa gun nzak pihna-u.

²⁴Aŋay mi ƴo zay mun ɓay koseh ké Ŋgermbay ko ɓay tul woiri, mí haymun bi ɓa nzak ndɔk Ŋgermbay ké ziŋ kosehri ɓay tul sa̧w in ye kú-u na ɓa mun ye.

²⁵Mi ti̧h ɓa gun-laɓ pihna hi̧ wuri a woiri sa̧w in ye kandɔk ké Ŋgerzah ɓaŋ kan ndɔk bi ɓay hi̧ ɓay ye ɓá laɓ ɔh.

²⁶Sɔk ɓahri, sa̧wɓay ké-e mu̧h ke titilu da̧y ra aŋay ke ten ɓayu ké gel a teh-u hi̧ sa̧w nzuk yeri ko da.

²⁷A woyri le Ŋgerzah yih ɓay hi̧ kú tu baw riŋ ɗina ye ké ŋgi̧ hɔtɔk hɔtɔk. Riŋ ɗina-aw ra mu̧h ɓil sa̧wɓay ké-e ten hi̧ sa̧wnzuk a ɓoruri lah, sɔk ɓahri, Ŋgermbay ƴo mbew ké mun woiri mí ɓa riŋ ɗina ké law woiri te tulu ké i ƴo geŋu.

²⁸A ye mí nah ka-kah ɓay ye ke sam ru̧nari ɓoɗ ɓoɗ gbam. Nah ƴo hew keni nzukri gbam, nah ƴo firma nzukri gbam keni pi ɓay hi̧ nzukri gbam ké riŋ Ŋgermbay kan tul woyri, náh sɔk niri hi̧ Ŋgerzah ɓa nzukri ké ŋger ɓa gun yeri.

²⁹Kaŋ mí-i ƴo laɓ pihna-u. Mi ƴo ruh mun ke ŋgerna ké si ke huhrumun Ŋgermbay ké ƴo ŋger mi keni.