Read Karang Mbete Kolosiri 2 Bible Online

Mbete Kolosiri 2 - Karang bible

Mbete Kolosiri 2

¹Mi ɓah kaŋ ɓayu ké mi yih ɓay í tu wuri ani mí-i ƴo ruh mun ɓay tul woiri, ɓay tul nzukri ké Lawdisi pi dara mí ɓay tul nzuk a ɓoruri ké ko nun bi bɔk mbew ya pi.

²I tu ɓay rúh mun bi dale, law woiri gbam ké mbu̧h hani ɓil law sana ɓá ziŋ hewna. A a̧w mí ɓay si ziŋ wuri ɓil goso fe tuna ke gelu gelu ɔh ɓa fe ziŋnari gbam, mí hi̧ i tu sa̧wɓay ké Ŋgerzah mu̧h tu-tu, sɔk ɓahri, ɓa a ye Ŋgermbay.

³Sam ru̧nari gbam, sam fe tunari gbam mu̧h ké ta̧w ye ɓa fe ziŋna a luki.

⁴Mi ɓah kaŋ rɔkɔ nzuk nzak pa̧nari ɓá rah wuri ké ɓil kerɓay woiri.

⁵Ké mi ta sakra woiri ke mun ya kara mi ƴo ziŋ wuri ke Tem. Law bi rih mi ɓayu ké mi ko fe laɓna woiri si ke gelu gelu, mí law woiri te sa tul Ŋgermbay ɓa kpuh-u.

⁶Kandɔk ké i ya̧ Zezu ɓa Mbay woiri ɓa Gaŋ tul feri riw dale, í si siŋ sina mbew ziŋ ni,

⁷a woiri ké i ɓar sa̧w ziŋ ni, i ƴo hu̧h ziŋ ni, kanlaw woiri ŋga̧h wuri ɓa nzuk mbew ziŋ ni. Gbamaw si kandɔk kú-u firma wuri mí tumbɔl woiri ké i el keni mbah zɔk gbɔh gbɔh.

⁸Í ko ger rɔkɔ nzuk ɓá mgba wuri ke ndaw ru̧na ké si ke sa̧w fe laɓna nzuk pirmatulri. Ru̧na-aw ɓa kuna, ɓa fe záhri ké sa̧wu ɓa tukala. Si ke Ŋgermbay ya

⁹ɓay fe le, mun Ŋgerzah ya̧ mun Ŋgermbay ɔh riw.

¹⁰Mí a woiri i ƴo mbew ke Ŋgermbay, mun ye ya̧ mun woiri ɔh gbam, a ye ké-e ƴo tul feri gbam, ɓa ra záh mbayri, ɓa ra záh-lak mbayri.

¹¹Ké ta̧w ye pi mí ndi̧w woiri kuŋ, sa̧wu laɓ ke ndɔk nzuk pirmatul ya. Sa̧w kúŋ ndi̧wu ur ké ta̧w Ŋgermbay, ta ɓa kúŋ ho̧ko mun ké ɓa fe tukala ra ya.

¹²Ndi̧w woiri ké kuŋ ra gɔr wuri ziŋ ni ké ɓil batem mí i ti̧h wuri ziŋ ni ké sakra hulri ɓay law woiri ké i kan sa tul ye, mí kanlawu ɓa huhrumun Ŋgerzah, ɓa huhrumun ké ten Ŋgermbay ké sakra hulri.

¹³Lewsa̧ ra, i ɓa hul, siŋ sina woiri ɓa mbá nzak Ŋgerzah, i kaɓ ɓa dem dan kúŋ ndi̧w a ké ŋga̧h sal in ziŋ ni, wara mí ke hi̧ wuri ɔ-ɔkna ziŋ Ŋgermbay. Ke hi̧ law ye sel ké tul fe laɓna mbá nzak Ŋgerzah wah gbam.

¹⁴Ke lu salɓayri ké tul suya ké na ɓil mbete bolkusol ye ma fal. Salɓayuri mgba tul wah, mí ke ɓar salɓay hul nazi-u kan tul kpuh vbatay.

¹⁵Ké tul kpuh vbatayaw mí ke i ŋgerna záh mbayri ke záh-lak mbayri. Ke mgba niri ɓa mgbal, ke nda pol woyri, ke si ziŋ niri ruk ruk ti̧h ké gel daɓa keni.

¹⁶Kaŋ dale ɓay fe su̧na, ɓay fe nzona, ɓay ti̧hmbih, ɓay nam ti̧hna few a foyu, ɓay nam ɔknari í poŋ nzuk mbew ɓá laɓ ɓay kan tul woiri ya.

¹⁷Fe laɓna-uri sɔk ketina ké ƴo gina lewsa̧ mí ketina-u le, ten mun ké mun Ŋgermbay.

¹⁸Í hi̧ nzuk mbew ɓá ndih wuri ya. Sam nzukri-aw ku ƴo laɓ law rihna-ɗiŋ tul ké nun nzukri, ku ƴo laɓ law rihna-dim tem nzak pihnari. Feri kú-u ko ɓil lɔlɔ ɓa kuna, ku hu̧h tul ndikpo ke kerɓay ké ur ke haymun.

¹⁹A woyri-aw ku sa hi̧ mun woyri mgbahla Ŋgermbay hi̧ ke ɓa tul woyri ya. A ye ra ke ɓa sa̧w ŋgerna mun ye gbam. Gel ɗɔmna mun ke niwri ƴo ziŋ ŋgerna mbu̧h ɓa nzuk mbew, mí mun ye hu̧h kandɔk ké Ŋgerzah hi̧.

²⁰I hu ziŋ Ŋgermbay sɔk ɓahri, i sɔɓ fal hi̧ sa̧w fe laɓna tukala da ba, ɓay fe ɓáy mí i hi̧ sa̧w kaɓna woiri eŋ sa̧w kaɓna tukala ɓáy le ? Ɓay fe le i ƴo lah bolkusol tukala.

²¹Ku ɓahri : « Mú su̧ fe-ay ya, mú leh fe-ay ke nzak rim wo ya, mú za fe-ay ya. »

²²Ɓayuri gbam si ke feri ké ɓay ɓe-ɓeɓ. Ɓayawri si ke bakɓay ke fe sɔkna nzuk pirmatulri.

²³Ɓayuri ra eŋ ru̧na ké ta̧w nzukri ɓay pihna-dim záh woyri, ɗíŋ tul woyri ké nun nzukri, sáŋ mun woyri, mí pirna fe laɓna-awri ɓa kuna. Fe laɓna-awri kara mah voh ɗaka haymun ya wu̧m.