Read Karang Mbete Kolosiri 3 Bible Online

Mbete Kolosiri 3 - Karang bible

Mbete Kolosiri 3

¹Mí kandɔk ké i hu ziŋ Ŋgermbay ra, i ti̧h ke puh záh ziŋ ni[2]. Dale í taw fe a fál síɓari, gel ké Ŋgermbay kaɓ ri, ke ɓa ndɔk lakna Ŋgerzah.

²Law woiri ɓá na ké tul fe a fál síɓari, law woiri ɓá na tul fe a fál siɓari ya.

³Ɓayu ké i hu ziŋ Ŋgermbay ra mí ɔkna woiri mu̧h lukluk ké ta̧w ye ké-e ƴo ke Ŋgerzah.

⁴Nam ké Ŋgermbay ké ɓa ɔkna woiri ra ti̧h nun nzukri gbam dale, a woiri kara i ɓay ti̧h ziŋ ni ke pa̧ymun a foyu ke riŋ ɗina pi.

⁵Dale í sɔɓ fal hi̧ sa̧w fe laɓna tusiɓa kandɔk nunpuki, fe laɓna a pipiri-uri, nzék law ɓay laɓ suya, ɗaka fe a suya-uri, ɗaka lari ké si mbew ke dím záh. Feri-aw gbam í lu ke law woiri ma fal.

⁶Sam fe laɓna a kaŋawri mí law fa̧hna Ŋgerzah ƴo toh tul nzukri ɓayu.

⁷Lewsa̧ ké i ƴo ɓil sa̧w fe laɓna sa̧w woiri-aw a woiri kara i si siŋ sina a kaŋaw pi.

⁸Mí aŋay ba, í poŋ wuri feri-aw gbam ma fal kandɔk haŋ fa̧hna, tí̧h wo̧ro, law sihna, ɓéɓ riŋ nzuk, nzak woiri ɓá ti̧h ke ɓay-se su̧hru ya.

⁹Í kuŋ ɓay hi̧ haniri ya ɓayu ké i lur sa̧w mbuŋna woiri a tusiɓa ke fe laɓna-uri gbam ma fal kandɔk ta̧w gar kú-u lu kaŋ,

¹⁰mí i el ndoh sa̧w woiri a foyu ɓa gar ndohna woiri. Fe tuna sa̧w woiri ké ƴo sɔɓ ɓa foyu ra si ke sam nzuk pirmatul ké Ŋgerzah laɓ hi̧ nzuku ɓá eŋ ni.

¹¹Kandɔkaw mí kehrna ta ké haŋsekle nzuk pirmatul a foyu ya : ziɓ ta-a, sa̧wnzuk a ɓoru ta-a, nzuk-kuŋ ndi̧wri ta-a, nzuk ndi̧w ɓɔlri ta-a, nzukri ké ɓah kɔk nzak ɓay ɓahnari ta-a,[3] dahdi̧hzeri ta-a[4], mgbalri mini nzuk a garuri ta-a wara mí a ye Ŋgermbay nzuku-awri gbam mbu̧h ɓa a ye, ɓa a ye ké ƴo ri ziŋ nzuku-awri gbam.

¹²Kandɔk ké i na ɓa gun sana Ŋgerzah pi, sa̧w woiri ɓa a ye pi, mí riŋ ye kan tul woiri dale, í mbar mun woiri ke law mgba in, fe laɓna sukiri ké ti̧h suk, ɗíŋ tul, sí siŋ sina law a voh-u, iklaw tul haniri.

¹³Gelke nzuk ƴo ke ɓay ziŋ mbaŋ ye le, í hi̧ law woiri ɓá voh tul haniri. Kandɔk Gaŋ tul feri riw sel law ye tul woiri ra, í sel law woiri tul haniri kaŋ pi.

¹⁴Ké tul fe-uri-aw gbam kara sal-ŋga̧h si̧h woiri ɓa law sana, salu mí mbar wuri ɓa ndɔh-u.

¹⁵Dale ɗeŋ Ŋgermbay ɓá lak mbay ɓil law woiri. Ɗeŋaw mí Ŋgerzah ɗi wuri ɓa mun mbew keni. Í el ke tumbɔl hi̧ ni kpatara.

¹⁶Í hi̧ ɓay Ŋgermbay ɓá ya̧ law woiri ya̧h ya̧h ke sam ru̧nari ɓoɗ ɓoɗ gbam : ɓa ra firma fe hi̧ haniri, ɓa ra héw haniri ke siŋ-dim Ŋgerzah, siŋ pirna, siŋ a ɓoruri ké Tem hi̧ wuri i ɗi. Í hi̧ ɓay Ŋgermbay ɓá ya̧ law woiri ke lawsuki ké hi̧ law woiri loŋ riŋ Ŋgerzah.

¹⁷Mí ɓayri gbam ké i ɓah, feri gbam ké i laɓ, gbamaw ɓá na ɓa fe ké hi̧ riŋ Gaŋ tul feri riw a ye Zezu kan ri, ɓa fe ké ƴo el ke tumbɔl hi̧ baah Ŋgerzah.

¹⁸Wu̧yri, í hȩk wah woiri mah siŋ sina gun Gaŋ tul feri riw.

¹⁹Wo̧rori, í sa wu̧y woiri, í mgba wu̧y woiri ɓu law ya.

²⁰Gunri, í lah nzak nzuk-mbuŋ wuri kpatara. A a̧w mí ɓa fe ké rih law Gaŋ tul feri riw.

²¹Bah gunri, í zɔr law gun woiri ya rɔkɔ ŋgerna woyri ɓá ta̧h.

²²Mgbalri, í lah nzak bahgaŋ woiri ke sa̧wsehri gbam. Í lah nzak woyri ké nun woyri kaŋto ya, wara le ke law a teh-u ké ƴo hȩk Gaŋ tul feri riw ma.

²³Pihna woiri a suŋ suŋ ké i ƴo laɓu í hi̧ tul woiri ɓilu kandɔk pihna ké i ƴo laɓ hi̧ Gaŋ tul feri riw, ta ɓa pihna ké i ƴo laɓ hi̧ nzukri ya.

²⁴I tu wuri tu, kpaŋndɔk woiri ɓa fe baah ké i ɓay ya̧-u ké ta̧w Gaŋ tul feri riw dale, bahgaŋ woiri ké i ƴo laɓ pihna hi̧ ni ra mí ɓa Ŋgermbay

²⁵ɓayu mí nzuk ké laɓ suya le, ke zíŋ kpaŋndɔk fe laɓna suya ye. Ké ta̧w Ŋgerzah, lú nun nzuk ta-a.