Read Karang Mbete Kolosiri 4 Bible Online

Mbete Kolosiri 4 - Karang bible

Mbete Kolosiri 4

¹Bahgaŋ mgbalri, í laɓ ketina ziŋ mgbal woiri ke mahful a teh-u. I tu-tu, a woiri kara bahgaŋ woiri ƴo ri ké nunmbam pi.

²Í ƴo tul goŋ Ŋgerzah. Gelke i ƴo goŋ Ŋgerzah le, í kaɓ sokoh ke nzakbɔk woiri, í el ke tumbɔl hi̧ ni.

³Í goŋ ni ɓay tul wah hi̧ ké mgbur ful-ɓah ɓay hi̧ na. Le náh ten sa̧wɓay Ŋgermbay[5] ké mi na vul mgbal ɓay tulu-ay,

⁴Ŋgerzah ɓá hi̧ mi, mí ten ɓayu ɓa teh-u hi̧ nzukri ɓá lah kandɔk ké ɓa pihna bi.

⁵Í si siŋ sina ru̧na Ŋgerzah ké ta̧w nzuk a kalari, nda ka̧w ke zaŋu.

⁶Ɓay ké ti̧h ke nzak woiri ɓá na ɓa ɓay ɓahna lawsuki hi̧ nzukri kandɔk tom a nuŋu. Le i tú yih nzak nzuk a suŋ suŋ ke ɓay ké si ke gelu gelu.

⁷Tikus yi̧n wahri ɓil Gaŋ tul feri riw ɓay sɔk wuri ɓay bi. A ye ra ke ɓa maŋlaw wah, ke ƴo tul pihna-so nzukri, ke ɓa bɔh pihna wah, ke ƴo ke Gaŋ tul feri riw.

⁸Mi pih ni ma ta̧w woiri. Sa̧wɓay pihna-ay ɓa sɔ́k wuri ɓay wah dara mí ke hí̧ wuri nzak hewna ɓay í ziŋ keni ŋgerna pi.

⁹Tikus ƴo maŋ Onesim yi̧n wahri ɓil Ŋgermbay a ye maŋlaw wah ké-e ƴo mbew ziŋ na. Ke ɓa nzuk woiri, mí ku si ke hani-aw. Ku ka̧h le, ku sɔ́k wuri ɓay feri gbam ké kal fál kɔray.

¹⁰Arisitar a ye bɔh-na vul mgbal ziŋ mi, ke vah wuri. Marki ké ɓa yi̧n Barnabas vah wuri. Marki ra mi pih nzak hewna ké si tul ye hi̧ wuri da. Ke ka̧h le, í ya̧ ni ndɔk seɗe.

¹¹Zoze kú-u ɗi ni ɓa Zusteŋ vah wuri. A woyri kú-u say yaŋaw mí ɓa ziɓri ké ɓa bɔh pihna bi ɓay puh lakna Ŋgerzah, ku ti̧h ɓa ndɔk bi.

¹²Epafara ké ɓa nzuk woiri ra, ke vah wuri, a ye ra ke ɓa mgbal Ŋgermbay. Ke ƴo ruh mun ke ŋgerna ɓil góŋ Ŋgerzah kpatara ɓay tul woiri ɓay hi̧ í ɓer gi̧w ɓa nzukri ké ŋger ɓil kanlaw tul Ŋgermbay hi̧ feri gbam ké Ŋgerzah yih, i laɓ ɔ-ɔh.

¹³Mi ƴo lu lakna ɓay ye ɓahri se, ke ta mun ye ɗik ɓay tul woiri, ɓay tul nzukri ké kaɓ Lawdisi, ɓay tul nzukri ké kaɓ Hirapoli pi.

¹⁴Maŋlaw wah Luk ké ɓa dɔkta vah wuri, Demas vah wuri pi.

¹⁵Í vah nzuk Lawdisiri ke manah wahri Nimfa ke sa̧w in Ŋgermbay kú-u ƴo mbu̧h hani ké kerpuh ye.

¹⁶I ki̧ mbete-ay hi̧ nzuk woiri lah le, í pih si hi̧ sa̧w in Ŋgermbay kú-u ƴo mbu̧h hani ké Lawdisi ɓá ki̧ pi. A woiri kara mbete ké mi vbeh hi̧ nzuk Lawdisiri ka̧h wuri le, í ki̧ pi.

¹⁷Í ɓah hi̧ Arkiɓ ɓahri se, ké mgba sa̧w pihna ké Gaŋ tul feri riw ndoh ndɔk ye-aw, ké laɓ ɔh.

¹⁸Vahna-ay ɓa ndɔk bi Pɔl mí vbeh. Í yȩkre tul bi ya, mi na vul mgbal. Mi vah wuri ke lawsuki ye ké ƴo ziŋ wuri.