Read Karang Mbete 1 Tesaloniri 1 Bible Online

Mbete 1 Tesaloniri 1 - Karang bible

Mbete 1 Tesaloniri 1

¹A bi Pɔl, Silas, Timote, nah vbeh mbete-ay hi̧ wuri sa̧w in Ŋgermbay ké i ƴo mbu̧h hani ké Tesaloni[1], a woiri ké i ƴo ziŋ baah Ŋgerzah, ké i ƴo ziŋ Gaŋ tul feri riw a ye Ŋgermbay Zezu. Nah vah wuri ke lawsuki ke ɗeŋ.

²Nah ƴo el ke tumbɔl hi̧ Ŋgerzah kpatara ɓay tul woiri gbam. Nah ƴo ɗi riŋ woiri mgbiŋriŋ ɓil goŋna wah ké pol Ŋgerzah ké ɓa Bah wah.

³Ɓil goŋna wah, nah yȩkre pihna ké i ƴo tulu ɓay law woiri ké te sa tul Ŋgermbay ra ya, nah yȩkre law sana ké i ta̧h ke laɓu ké tul nzukri ya, nah yȩkre su̧hlaw woiri ké i tasa̧y ko suki Gaŋ wah Ŋgermbay Zezu ké i ƴo geŋu ra ya pi.

⁴Yi̧n wahri ɓil Ŋgermbay i ɓa gunri ké Ŋgerzah sa wuri sa, ke ɗi wuri ɓa sa̧w ye,

⁵mí nah tu ɓahri, ɓaysuki hul Ŋgermbay ké nah ka-kah-u ké ta̧w woiri ra ɓa ɓay ɓahna kaŋto ya wara le, gi ke huhrumun pi, gi ke Tempuki pi dara mí ɓaysuki-u ɓar sa̧w ɓil law woiri, kandɔk ké i ko ké ɓil siŋ sina wah ɓay tul woiri.

⁶A woiri ra i ndɔl siŋ sina wah ke siŋ sina Gaŋ tul feri riw ndɔ-ndɔl. I ya̧ nzak pihna-aw ke koseh ɓa ŋgi̧-u pi, ke law rihna ké Tempuki hi̧ pi.

⁷Bale i el ti̧h ɓa fe ndɔlna hi̧ nzukri ké kan law tul Ŋgermbay ké Maseduwan pi, ké Akay pi.

⁸Ɓay tul woiri mí mberem Gaŋ tul feri riw ya̧ gel ké Maseduwan ke Akay kaŋto ya. Le mberem ké si tul law woiri ké te sa tul Ŋgerzah ra ya̧ gelri gbam. Kaŋ mí nah ta ke ɓay a ɓoru ké dɔɓ tul ɓayri ké si tul woiri ya.

⁹Nzukri ƴo ɓah ɓay tul woiri. Ku ƴo ndazi ani mí i ya̧ na ma law woiri, ani mí i sɔɓ fal hi̧ záhri el ko gel ma tul Ŋgerzah a ye záh ké-e ƴo ri sew ke sew, záh a kpakpaŋu, mí i ƴo laɓ pihna hi̧ ni,

¹⁰i ƴo geŋ elna gun ye Zezu ké nunmbam, a ye ké Ŋgerzah ten ni ke puh záh ke pa̧ymun a foyu ra, ke hi̧ na, nah ti̧h ɓil ɓay law fa̧hna Ŋgerzah ké ƴo gina.