Read Karang Mbete 1 Tesaloniri 2 Bible Online

Mbete 1 Tesaloniri 2 - Karang bible

Mbete 1 Tesaloniri 2

¹Ké i ya̧ na ma law ra, a woiri yi̧n wahri i tu ɓahri se, ya̧na-u kal ndikpo ya.

²Ɓay fe le ké Filipi ra ku laɓ na koseh, ku laɓ na fe-se su̧hru kara ke ŋgerna Ŋgerzah nah ruh mun gi ka-kah ɓaysuki hul Ŋgermbay ké Ŋgerzah hi̧ na ɓa teh-u hi̧ wuri i lah.

³Nzak hewna wah ra gi ke ɓay ké reh ful ya ke kerɓay a pipiri-u ya ke nzak rɔkna ya pi.

⁴Wara le nah gi ɓa nzukri ké ketina wah ti̧h ɓa teh-u ké nun Ŋgerzah. Ke ɓaŋ ɓaysuki ra ku̧ ndɔk wah. Kaŋaw mí nah ɓah ɓayu hi̧ wuri. Nah ƴah law rihna nzukri ya. Le nah ƴah law rihna Ŋgerzah a ye ké-e ƴo hekre law wah.

⁵Sew ké nah ka̧h ta̧w woiri ra, nah gi ke nzak pa̧na ɓay rah wuri ya, i tu wuri tu. Nah mbi ɓay a kala lɔm keni fe ya pi, Ŋgerzah ɓa nzuk-lu lakna ɓay wah.

⁶Nah ƴah riŋ ɗina tukala ya, nah ƴah riŋ ɗina ké ta̧w woiri ya pi, ké ta̧w nzuk a ɓoruri ya pi.

⁷Ŋgermbay mí lu na ɓa gun nzak pihna ye. Ŋgerna ké-e hi̧ na-aw ƴo ri kara nah mbi siŋ sina law a voh-u ké sakra woiri eŋ mah gun ké hu̧hru gun ye ma law.

⁸Kandɔk mah gun ra mí law wah sa̧h ɓay tul woiri, nah ƴo ke law rihna ka-kah ɓaysuki Ŋgerzah ra hi̧ wuri kaŋto ya. Wara le nah ƴo ke law rihna póŋ mun wah hi̧ hul ɓay tul woiri pi ɓay fe le, i ti̧h ɓa maŋlaw wah.

⁹Rohna wah ke ta̧hma wah ra yi̧n wahri, i ƴo ker si tulu. Nah laɓ pihna suŋ ke seh hɔl keni mun wah rɔkɔ nah ti̧h ɓa sukna ké tul nzuk mbew ké sakra woiri, kaŋ mí nah ka-kah ɓaysuki Ŋgerzah ra hi̧ wuri keni.

¹⁰A woiri gaŋ i ɓa nzuk-lu lakna ɓay siŋ sina wah, Ŋgerzah kara lu lakna ɓayu pi. Siŋ sina wah ɓa siŋ sina lawpuki, siŋ sina a ndaru ké te-teh mí nah si ké sakra woiri nzuk-kan law tul Ŋgermbayri.

¹¹I tu-tu, nah kaɓ ziŋ wuri mbew mbew gbam kandɔk bah gun ké kaɓ ziŋ gun yeri.

¹²Nah hew wuri, nah voh law woiri, nah ɓah ketina hi̧ wuri ɓay í si siŋ sina ké mah nun Ŋgerzah a ye ké-e ɗi wuri kaɓ ɓil lák mbay ye, kaɓ ɓil riŋ ɗina ye pi.

¹³Sa̧wu mí a wah kara nah el ke tumbɔl hi̧ Ŋgerzah mgbiŋriŋ ɓay tul woiri pi ɓay fe le, i lah nzak pihna Ŋgerzah ké nah ɓah hi̧ wuri, mí i ya̧ ndɔk seɗe. I ya̧ nzak pihna-u ɓa ɓay nzuk pirmatul ya. Le i ya̧ nzak pihna-u ɓa ɓay Ŋgerzah gaŋ, mí ke ƴo laɓ pihna ye ké sakra woiri ké i kan law tul Ŋgermbay.

¹⁴A woiri yi̧n wahri ɓil Ŋgermbay fe ké ti̧h tul sa̧w in Ŋgerzah ké tusiɓa Zude-aw, ti̧h tul woiri pi. I ko seh ké ndɔk nzuk in woiri kandɔk a woyri kú-u ko seh ké ndɔk sa̧w in woyri ziɓri kaŋ.

¹⁵Ku i gun nzak pihna Ŋgerzah a lewsa̧ri, ku i Gaŋ tul feri riw a ye Zezu pi. Ku faŋ bol wah ƴo laɓ na koseh, ku tur nun nzukri gbam ke ɓay, ku ta rih law Ŋgerzah ya.

¹⁶Ku ƴo gboh na sɔ́k ɓay hi̧ sa̧wnzuk a ɓoruri rɔkɔ sa̧wnzuk a ɓoruri ɓá ziŋ ɔkna. Kaŋ mí ku ƴo mbar keni nzak suya woyri nam ke nam, mí law fa̧hna Ŋgerzah ba, na tul woyri mah gbu̧h suya woyri.

¹⁷Mí a wah ra yi̧n wahri, feri ké ziŋ na hi̧ nah kehr haniri ɓa ɗih-u sa̧wseh ndi̧ kara kerɓay tul woiri na law wah kpatara, mí nah tasa̧y él si ko nun woiri, law wah ɗaŋ kaɗ kaɗ ɓay tul woiri.

¹⁸Sa̧wu mí nah ƴah ful el si ta̧w woiri, wara le a bi Pɔl mi ƴah ful ka̧yri ka̧yri, mí nzukbaa ra ƴo yeŋ na.

¹⁹A woiri gaŋ mí i ɓa fe-vba̧ haŋ wah ké pol Ŋgermbay Zezu seh gina ye, law wah ƴo geŋ suki woiri, law wah zay ɓay tul woiri.

²⁰Ketina i ɓa riŋ ɗina wah pi, i ɓa law rihna wah pi.