Read Karang Mbete 1 Tesaloniri 5 Bible Online

Mbete 1 Tesaloniri 5 - Karang bible

Mbete 1 Tesaloniri 5

¹Yi̧n wahri ɓil Ŋgermbay, ɓay nam Gaŋ tul feri riw ra nah vbeh ɓay sewu mini ɓay sa̧wseh-u hi̧ wuri ya kara vbiɓay ta-a.

²A woiri gaŋ, i tu te-teh, nam Gaŋ tul feri riw ra ɓay ti̧h tul wah kandɔk nzuk riɓa ké gi ke suŋ kaŋ.

³Sewu-aw nzukri ƴo ɓahri, tusiɓa na ɗeŋ, nah kaɓ ɗeŋ. Dale ɓeɓna ɓay ti̧h tul woyri mbu̧y kandɔk sena-kaɓ peŋe ké ndukru mahɓil kaŋ, mí ku ta ti̧h ke ɓil ɓeɓna-aw ya.

⁴Mí yi̧n wahri a woiri le i ƴo ɓil tirima ya. Nam ye-aw ra ta ndukru wuri kandɔk nzuk riɓa ya,

⁵ɓayu ké gbam woiri i ɓa gun gel tehnari, i ɓa gun se-sehri. Nah ɓa nunu a suŋ ya, nah ɓa nunu a tirima ya.

⁶Mí le náh ƴo wuri tul bɔk ke nun a teh-u, náh na wuri nam ya. Nzuk a ɓoruri na nam ɓil suŋ

⁷kú-u ɓa nunu a tirima ra suŋ mí ɓa gel woyri. Nzuk-ta yimri, suŋ mí ku ta yim ɓilu.

⁸Mí a wah ké nah ɓa nunu a se-seh bale, náh kaɓ wuri ke nun a teh-u, law wah ké te sa tul Ŋgermbay ke law sana mbɔk ɓa ŋgaŋ wah ké nah mgba pɔr keni haŋ wah, ti̧hna wah ke ndɔk hul ké nah ƴo geŋu ké ta̧w Ŋgerzah ba, ɓa guɓatul wah.

⁹Ɓay fe le Ŋgerzah lu na ti̧h ɓa nzuk-ya̧ law fa̧hna ye ya. Wara le ke lu na ti̧h ɓa nzukri ké ti̧h ke ndɔk hul ɓay ziŋ pa̧ymun a foyu tumbɔl Gaŋ wah Ŋgermbay Zezu[2]

¹⁰a ye ké-e hu ɓay tul wah. Dale nah kaɓ ke nun mini nah ta tukala ya kara nah ƴo ziŋ ni ke ɔkna.

¹¹Sa̧wu mí í hew wuri haniri, í so haniri ɓay í hu̧h ma pol pol ɓa vul Ŋgerzah kandɔk ké ɓa fe laɓna woiri da.

¹²Nah ƴo goŋ wuri yi̧n wahri, í tu nzukri ké ta̧h ɓay tul Gaŋ tul feri riw ké sakra woiri ɓa suki kú-u ƴo nda pol woiri ke siŋ sina a suki ɓay tul ye, mí ku ƴo kɔklɔ suk woiri ɓay ndar wuri pi.

¹³Ɓay tul pihna woyri ra í ko kona ma tul woyri ke law sana ké ŋgi̧ kal ŋgɔŋ. Í kaɓ ɗeŋ ke haniri.

¹⁴Nah ƴo hew wuri yi̧n wahri, í kɔklɔ suk nzukri ké ƴo laɓ fe va̧h, nzukri ké ta ke su̧hlaw ya í hew niri ɓay kú ziŋ ŋgerna, nzukri ké ta̧-ta̧h í so niri, í ik law tul nzukri gbam.

¹⁵Í ko-ko ɓay nzuk mbew ɓá dal baa suya ke suya ya. Kpatara í ƴah laɓ suki ké sakra woiri pi, dara mí ziŋ nzukri gbam pi,

¹⁶í ƴo wuri ɓil law rihna kpatara,

¹⁷í ɓah ɓay ziŋ Ŋgerzah mgbiŋriŋ,

¹⁸feri gbam ké ziŋ wuri le, í el ke tumbɔl hi̧ Ŋgerzah ɓayu. A a̧w mí ɓa fe ké Ŋgerzah yih, mí fe-u na ta̧w Mbay Zezu.

¹⁹Í rim hɔrɔ Tempuki ya,

²⁰ɓayri ké Tempuki ɓaŋ ndoh ɓil law woiri í ko ɓa kɔk ɓay ya,

²¹wara le í hekre sa̧w ɓayri gbam ɓa teh-u dale, í mgba ɓay a suki ma law.

²²Í ɗi-ɗih ke sam suya a suŋ suŋ gbam.

²³A ye Ŋgerzah nzuk sa̧w ɗeŋ ɓá hi̧ law woiri gbam gbam pu ɓa nunu a ye, ké kɔr tem woiri, kerɓay woiri, mun woiri gbam ɓay í ƴo ɓa teh-u dan zɔmna ke nam gina Gaŋ wah Ŋgermbay Zezu.

²⁴A ye ké-e ɗi wuri ra, ndɔk ye ɗɔr sal in ya, ke ɓay laɓu gaŋ ba.

²⁵Yi̧n wahri, í goŋ Ŋgerzah ɓay tul wah pi.

²⁶Í vah yi̧nri ɓil Ŋgermbay gbam ke law in a teh-u.

²⁷Mi bak wuri ke riŋ Gaŋ tul feri riw, í ki̧ mbete-ay hi̧ yi̧nri ɓil Ŋgermbay gbam kú lah.

²⁸Mi vah wuri ke lawsuki Gaŋ wah Ŋgermbay Zezu ké ƴo ziŋ wuri.