Read Karang Mbete 2 Tesaloniri 1 Bible Online

Mbete 2 Tesaloniri 1 - Karang bible

Mbete 2 Tesaloniri 1

¹A bi Pɔl, Silas, Timote, nah vbeh mbete-ay hi̧ wuri sa̧w in Ŋgermbay ké i mbu̧h hani ké Tesaloni a woiri ké i ƴo ziŋ baah Ŋgerzah, ké i ƴo ziŋ Gaŋ tul feri riw a ye Ŋgermbay Zezu.

²Nah vah wuri ke lawsuki ke ɗeŋ ké ur ké ta̧w baah Ŋgerzah, ké ta̧w Gaŋ tul feri riw a ye Ŋgermbay Zezu.

³Yi̧n wahri, mah ɓay náh el ke tumbɔl hi̧ Ŋgerzah suŋ ke seh ɓay tul woiri. Él ke tumbɔlu ƴo gelu gaŋ ɓay fe le, kanlaw woiri tul Ŋgermbay ŋgi̧ kal ŋgɔŋ dara mí law sana woiri ké tul haniri mbew mbew gbam kara zɔk gbɔh gbɔh pi.

⁴Kandɔkaw mí a wah ra nah vba̧ haŋ ké gel-mbu̧h hani sa̧w in Ŋgerzahri ɓoɗ ɓoɗ ɓay tul su̧hlaw woiri pi, ɓay tul kanlaw woiri ra pi hi̧ ku kan law ɓa kpuh-u. Ɓil sam sɔ́k nun sehri ɓoɗ ɓoɗ ké nzukri laɓ ziŋ wuri, ɓil sam kosehri ɓoɗ ɓoɗ pi, i ƴo su̧h law, i ƴo tul law woiri ké te sa tul Ŋgermbay, mí i ik law ɓilu.

⁵A a̧w mí sɔk ketina sal in ké Ŋgerzah ŋga̧h ziŋ wuri mí kehr wuri ke nzukri hi̧ i mah riŋ ɗina lák mbay ye. Lák mbay ye-aw mí i ko seh ɓayu.

⁶Kaŋ mí kpaŋndɔk ké Ŋgerzah hi̧ si ke gelu gaŋ ɓay ké dal baa woiri ké tul nzukri ké laɓ wuri koseh-aw.

⁷A woiri ké i ƴo ko seh-aw ba, kpaŋndɔk ye si gelu ɓay ké hi̧ wuri í ɔk mun ziŋ na. Ɔ́k munaw si ke tén mun Zezu Gaŋ tul feri riw ké nunmbam ke tem nzak pihna ye a ŋgeruri.

⁸Ke tén mun ɓil rim hɔrɔ ké mgbe bilam bilam ɓay kuŋ salɓay tul suya nzukri ké sa tu Ŋgerzah ya a woyri kú-u sa ya̧ ɓaysuki hul Gaŋ wah Zezu ya.

⁹A woyri ra, salɓay ké mgba tul woyri ɓa ɓeɓna sew ke sew, ku ƴó ɓa ɗih-u ké ta̧w Gaŋ tul feri riw, ku ta tu riŋ ɗina huhrumun ye ya pi.

¹⁰Riŋ ɗina ye ké-e gi keni ra ɓay mgbe ké sakra sa̧w nzuk yeri. Nzuk-kan lawri gbam ɓay ko kona ka̧h ma tul ye ɓay fe le, tehɓay wah ké ta̧w woiri ra mí hi̧ nzukri kan law tul ye-aw.

¹¹Ɓay namu-aw pi mí nah ƴo goŋ Ŋgerzah suŋ ke seh ɓay tul woiri ɓahri, Ŋgerzah wah ɓá hi̧ wuri í mah ke ɗina ye ké-e ɗi wuri ɓa sa̧w ye. Ŋgerzah ɓá hi̧ wuri huhrumun ye ɓay í ɔh laɓ sukiri gbam ké i lek ɓay laɓu. Pihnari gbam ké i yih laɓu ɓay kanlaw woiri-aw, ké hi̧ wuri í laɓ ɔh pi.

¹²Kaŋ mí riŋ ɗina Gaŋ wah Zezu ɓá mgbe ké sakra woiri, ɓay tul ye mí riŋ ɗina woiri kara mgbe keni pi. Riŋ ɗina-u si mbew ke lawsuki Ŋgerzah wah ke lawsuki Gaŋ tul feri riw a ye Ŋgermbay Zezu.