Read Karang Mbete 2 Tesaloniri 2 Bible Online

Mbete 2 Tesaloniri 2 - Karang bible

Mbete 2 Tesaloniri 2

¹Dale yi̧n wahri, ɓay gina Gaŋ wah Ŋgermbay Zezu pi, ke ɓay mbu̧hna wah ma ta̧w ye pi ra, nah ƴo goŋ wuri,

²kerɓay ɓá zɔklɔ wuri hi̧ law woiri ɓá tehre ya. Ɓa ra tén sa̧wɓay ké záh hi̧ nzuk ten, ɓa ra nzak pihna, ɓa ra mbete mí nzukri leh nzak wah keni ɓahri, nam Gaŋ tul feri riw ra gi da kara í ya̧ ɓayu ya.

³Gelke nzuk gi ta̧w woiri ke mahful a suŋ suŋ kara í ya̧ nzak rɔkna ye ya. Ɓay hi̧ Gaŋ tul feri riw ɓá ka̧h le, nzuk-sɔɓ fal hi̧ Ŋgerzahri ɓá ŋgi̧ mah kuŋ salɓay dara ɓáy. Nzuk tul kpuhna a ye nzuk sa̧w zina ra ɓay ten mun,

⁴a ye nzukbaa-aw ra ke fáh záh a suŋ suŋ gbam kú-u ɓahri, riŋ Ŋgerzah kan tulu, ke ndá giri tul feri gbam ké mah dim Ŋgerzah. Kaŋ mí ke káɓ gel ƴona Ŋgerzah ké vul kani[1] ƴo sɔk mun ye ɓa Ŋgerzah.

⁵I yȩ-yȩkre le ? Sew ké mi ƴo ziŋ wuri ra mi ɓah ɓay feri-aw hi̧ wuri ka̧yri ka̧yri.

⁶Mí aŋay i tu ɓahri, fe ké gboh gina Gaŋ tul feri riw ɓa géŋ tén mun nzukbaa ke sew ye.

⁷Ɓayu ké pihna-sɔɓ fal hi̧ Ŋgerzah ƴo tul laɓu ɓáy, mí tú sa̧wu se-se. Le a ye nzuk gboh-u ra, ke ƴo gboh-u kpu̧ru ka̧h sew ké nzukbaa ɓá ten tul yol ké sakra-u.

⁸Dale nzuk tul kpuhna ra ɓay ten mun, a ye ké Gaŋ tul feri riw ɓay ɓeɓ ni ke kuna ké ɓay ti̧h ke haw ye. Gaŋ tul feri riw ké nzukri ko ni ke gina ye, ke zí̧rma nzukbaa keni.

⁹Gina ye ra ɓay si ke pihna ké mbay záh tukala ƴo laɓ ké sakra nzukri ke sam fe saŋri ke sam fe-se hȩkmeri

¹⁰ke sam nzak rɔknari ɓoɗ ɓoɗ ké ƴo sih law nzukri hi̧ ku poŋ Ŋgerzah. Nzukuri ƴo zina ɓayu ké law woyri sa ya̧ ketina ké mah sel niri ke ndɔk hul ra ya.

¹¹Sa̧wu mí nzukri ké kan law tul nzuk nzak rɔkna ra Ŋgerzah pih záh vbolna a hani ma ta̧w woyri ƴo laɓ pihna ɓil law woyri hi̧ ku kaɓ kaŋ.

¹²Kaŋ dale ke kéhr nzuk yeri ke nzukri gbam ké sa lah ketina ya, law nzukri-aw ba, zay ké tul fe a pipiri-u.

¹³Mí su-su ɓay a wah ra náh el ke tumbɔl kpatara hi̧ Ŋgerzah ɓay tul woiri yi̧nri ɓil Ŋgermbay. I ɓa gun sana Gaŋ tul feri riw. Nah el ke tumbɔl ɓay fe le, Ŋgerzah lu wuri. I na kandɔk tul fe pay, i ɓa titil nzukri ké sakra nzuk-kan lawri ké-e ya̧ ke ndɔk hul tumbɔl Tempuki ké hi̧ law woiri pu pi, tumbɔl ketina ké law woiri te sa tulu pi.

¹⁴I rih ɓil ɔkna-aw sew ké Ŋgerzah ɗi wuri ke ɓaysuki hul Ŋgermbay ké nah ka-kah-u, mí riŋ ɗina Gaŋ wah Ŋgermbay Zezu ɓa nunu a woiri pi.

¹⁵Mí-aw le yi̧n wahri í ɓer gi̧w ɓa kpuh-u tul sa̧w fe Ŋgerzah ké i firma ké ta̧w wah, ɓa ra ɓay ké nah sɔk wuri, ɓa ra mbete ké nah vbeh hi̧ wuri, í ƴo tulu.

¹⁶A ye Gaŋ wah Ŋgermbay Zezu, a ye Bah wah Ŋgerzah, ɓay lawsuki ye ra ke sa na, ke hi̧ law wah voh ɓa ŋgɔh, ke hi̧ law wah geŋ suki a ndɔh-u.

¹⁷Ké hew wuri, ké hi̧ i ƴo ɓa kpuh-u ŋgi̧w ŋgi̧w ɓil fe laɓna a sukiri gbam, ɓil ɓay ɓahna woiri a sukiri gbam pi.