Read Karang Mbete 2 Tesaloniri 3 Bible Online

Mbete 2 Tesaloniri 3 - Karang bible

Mbete 2 Tesaloniri 3

¹Mí yi̧n wahri tɔr ɓay a ɓoruri ké nah yih sɔk wuri mí na-ay : í goŋ Ŋgerzah ɓay tul wah, í goŋ ni, ké hi̧ ɓay Gaŋ tul feri riw ɓá ya̧ gelri ɓa gah-u hi̧ kú pir ɓayu kandɔk a woiri kaŋ pi.

²Í goŋ ni ɓay ké ten na ke ndɔk nzuk tukalari, law woyri sih mbamba. Í goŋ Ŋgerzah ɓay tul wah ɓayu ké ta ɓa nzukri gbam mí kan law tul Ŋgermbay ya.

³Gaŋ tul feri riw ra ndɔk ye ɗɔr sal in ya. Ke hí̧ wuri i ƴo ɓa kpuh-u ŋgi̧w ŋgi̧w, ke kɔ́r wuri rɔkɔ nzuk law a sih-u ra ɓá za wuri.

⁴A wah ra ɓay tul Gaŋ tul feri riw mí law wah te tul woiri ɓahri, ɓayri ké nah ɓah hi̧ wuri-aw i laɓ fe-u la-laɓ, mí i ƴo tul laɓu ɓáy.

⁵Gaŋ tul feri riw ɓá maŋ wuri ɓa ndaru hi̧ law woiri si ka̧h law sana Ŋgerzah, si ka̧h su̧hlaw Ŋgermbay pi.

⁶Yi̧n wahri, nah ƴo ɓah hi̧ wuri ke riŋ Gaŋ wah Ŋgermbay Zezu, í ɗi-ɗih ke yi̧n a a̧y ké siŋ sina ye na kpo̧k, ké siŋ sina ye mah ke sa̧w fe Ŋgerzah ké i firma ké ta̧w wah ra ya.

⁷A woiri gaŋ i tu ani mí i ndɔ́l siŋ sina wah tu ɓay fe le, kaɓna wah ké sakra woiri ra nah si sina va̧h ya.

⁸Nah su̧ fe nzuk ke gaɓa ya. Le nah kah rohna, mun wah ta̧h, nah laɓ pihna suŋ ke seh rɔkɔ náh ti̧h ɓa sukna tul nzuk ké sakra woiri.

⁹Sɔk ɓahri, nah ƴo ke ŋgerna ké tul woiri kara nah mbi ya. Wara le nah ƴo sɔk wuri siŋ sina a suki ke mun wah ɓay í ndɔl.

¹⁰Ké nah ƴo ta̧w woiri ra, nah toŋ ɓah ɓayay hi̧ wuri ɓahri, nzuk sa laɓ pihna ya le, fe su̧na kara ké su̧ ya pi.

¹¹Nah ɓah kaŋ ɓayu ké nah lah ɓahri, nzuk a haniri ké sakra woiri siŋ sina woyri na kpo̧k. Ku laɓ pihna a hani ya, fe laɓna woyri ɓa ríh ɓil ɓay nzuk a ɓoruri ké ɓayu ko niri ya.

¹²Nah ƴo ɓah hi̧ sam nzuk a kaŋawri pi, nah hew niri ke riŋ Gaŋ tul feri riw pi, a ye Ŋgermbay Zezu ɓahri, kú laɓ pihna ke ndɔk woyri ɗeŋ. Le ku hɔ́l mun woyri keni.

¹³Dale a woiri ra yi̧n wahri, law woiri ɓá voh tul láɓ suki ya.

¹⁴Gelke nzuk mba nzak ɓayri ké nah vbeh hi̧ wuri-ay le, í ndoh ndɔk ma tul ye, í mgba ma̧ra ziŋ ni ya pi dale, kerɓay ɓay ruklu law ye ɓáy.

¹⁵Mí í ko ni ɓa nzukbaa ya. Le í kɔklɔ suk ye kandɔk yi̧n woiri ma.

¹⁶Gaŋ tul feri riw a ye nzuk sa̧w ɗeŋ, ké hi̧ law woiri ɓá na ɗeŋ kpatara ɓil feri gbam. Ke ƴo ziŋ wuri gbam.

¹⁷Vahna-ay ɓa ndɔk bi Pɔl gaŋ mí-i vbeh. Mi ik ndɔk tul mbeteri ké mi vbeh kaŋ kaŋ mí ɓa fe vbehna bi.

¹⁸Nah vah wuri gbam ke lawsuki Gaŋ wah Ŋgermbay Zezu ké ƴo ziŋ wuri.