Read Karang Mbete 1 Timote 1 Bible Online

Mbete 1 Timote 1 - Karang bible

Mbete 1 Timote 1

¹A bi Pɔl mi vah mu Timote. Law wah ké te tul Ŋgermbay mí hi̧ mu ɓa gun bi a ketina. Mi vah mu ke lawsuki, law in, ɗeŋ, gbamaw ur ké ta̧w baah Ŋgerzah, ké ta̧w Mbay Zezu Gaŋ wah pi. A bi Pɔl gun nzak pihna Mbay Zezu, kandɔk nzak pihna ké a ye Ŋgerzah nzuk-ya̧ na ke a ye Mbay Zezu ké law wah te tul ye, pih mi keni, mí-i laɓ pihna-aw.

³Tɔrna bi ma tusiɓa Maseduwan, mi hew mu ɓay mú kaɓ Efeze[1], mú hah nzuk a hani-uri ké ƴo firma nzukri ɓay Ŋgerzah mí fe firma-aw reh ɓoɗ ke ɓay Ŋgerzah.

⁴Mú hah niri kú mgba ma̧ra ke tú tuku ya, kú ki̧ sa̧w zihri ké gbu̧h-u ta-a ra ke riŋu riŋu ya pi. Ɓayuri ƴo gi ke fahɓay hi̧ nzukri poŋ kerɓay pihna ké Ŋgerzah ndoh ɓil law nzuk ké te sa tul ye ra.

⁵Mí hahna-u ɓá hi̧ law sana ɓá ƴo haŋsekle woyri, law sana ké ur ke law a puki ke kerɓay a suki ke kanlaw tul Ŋgermbay ké mu̧h ɓay ya.

⁶Nzuk a hani-uri vbol mahful law sana-aw. Ku sak tul woyri si wɔrɔk wɔrɔk ke fahɓayri ké ti̧h suk ya.

⁷Ku yih na ɓa ŋgernzuk-sɔk bolkusol Ŋgerzah, mí ku lah mahɓayu ya pi, ku tu sa̧w ɓay kú-u ƴo ɓah-u ke ŋgere ra ya pi.

⁸Nah tu ɓahri, bolkusol ra su-su, gelke nzuk ƴo laɓ pihna keni ke mahfulu kandɔk ké mahɓayu sɔk.

⁹Nah tu ɓahri se, nzukri ké ƴo mbew ziŋ Ŋgerzah ɓa záh woyri ra, bolkusol na ɓay tul woyri ya. Le bolkusol na ɓay tul nzuk-ɓeɓ bolkusolri ke nzuk tul kpuhnari, nzuk-saŋ Ŋgerzahri ke nzuk-reh mahfulri, nzukri ké ko fe Ŋgerzah ɓa fe a garu ke nzukri ké ko fe Ŋgerzah ɓa kɔk fe ké nun woyri, nzukri ké yih ɓay i mah woyri ke bah woyri, nzuk-i hulri,

¹⁰nzuk-laɓ nun pukiri, wo̧ronzuk ké hil mbaŋ ye wo̧ronzuk, nzuk-mgba nzukri yeh ɓa mgbal, nzuk-kuŋ ɓayri, nzukri ké hah mun woyri kuŋ ɓay ku̧ nzak mbaŋ woyri keni mini sam fe a suŋ suŋ gbam ké si mbew ke ɓay Ŋgerzah a ketina ra ya mí bolkusolaw na ɓay tul woyri.

¹¹Ɓay Ŋgerzah a ketina ra si mah hani ke ɓaysuki hul Ŋgermbay ké Ŋgerzah ɓaŋ ku̧ ndɔk bi. Ɓaysuki-u ra mgbe-mgbe ɓa fe riŋ ɗina Ŋgerzah ké ɓa nzuk sa̧w pol tehna.

¹²Mi el ke tumbɔl hi̧ Mbay Zezu a ye Gaŋ wah ké-e hi̧ mi ŋgerna ɓay fe le, ke ko mi mah mgba sa̧w pihna ye, mí ke mbi mi kan ɓil pihna-aw.

¹³Lewsa̧ mi ƴo mbi riŋ ye ɓah keni suya, mi pahra sa̧w in yeri, mi laɓ niri koseh, mí keni-aw kara ke mgba in ziŋ mi ɓay fe le, mi laɓ fe-u va̧h, law bi kpuh ké tul ye.

¹⁴Mí lawsuki Gaŋ wah ké ku̧ tul bi gbɔh gbɔh ŋgi̧ kal ŋgɔŋ. Lawsuki ra ƴo ke law mbew ke law sana ké mi ziŋ ké ta̧w Mbay Zezu.

¹⁵Ɓay ra ƴo gelu gaŋ ɓa ketina mah ya̧ ke law mbew : Mbay Zezu gi tukala ɓay ya̧ nzuk-laɓ suyari, mí a bi, mi ɓa mbay-laɓ suya.

¹⁶Sa̧wu mí ke mgba in ziŋ mi, a bi mbay-laɓ suya, ɓay hi̧ Mbay Zezu ɓá mbi mun bi sɔk keni ik law ye gbam hi̧ nzukri ké ɓay kan law sa tul ye hi̧ ku ƴo ke ɔkna sew ke sew.

¹⁷Mbay tul sewri, a ye Ŋgɔhnzuk, a ye ké nzukri mah ko ni ke nun ya, a ye Ŋgerzah mbew yaŋ, mah pirna ke riŋ ɗina sew ke sew. Gelu munu.

¹⁸Gun bi Timote, hahna ké mi sɔk mu ɓay mú hah keni nzukri ra si sina ke ɓayri ké Tempuki ɓah si tul wo ɓay hi̧ mú ruh ŋgermu a suki ke kanlaw tul Ŋgermbay ke law a teh-u. Nzuk a hani-uri el ke mun woyri ma fal mí hi̧ kanlaw woyri ri-riŋ.

²⁰Ké sakra woyri-aw Himene ke Aleksander ƴo ri. Mi poŋ niri hi̧ nzukbaa, a ye mbay záh tukala. Mi poŋ niri ɓay ndar niri kú poŋ ɓeɓ riŋ Ŋgerzah.