Read Karang Mbete 1 Timote 2 Bible Online

Mbete 1 Timote 2 - Karang bible

Mbete 1 Timote 2

¹Mahɓay hewna ké mi hew mu ra mí na-ay : Náh ɓah ɓay ziŋ Ŋgerzah ke sam ful goŋnari ɓoɗ ɓoɗ ɓay tul nzukri gbam kandɔkay : náh goŋ ni ɓay tul fe zɔklɔri, náh vbi ni sonari, náh vuh hi̧ ni ɓay ya̧ nzukri, náh el ke tumbɔl ɓoɗ ɓoɗ hi̧ ni.

²Náh goŋ Ŋgerzah ɓay tul nzuk-lak tusiɓari ke ŋgernzuk ŋgomnari gbam pi ɓay náh kaɓ dan fe zɔklɔ ke ɗeŋ ke hȩknari ké nah hȩk Ŋgerzah, ke siŋ sinari ké mah hȩkna,

³na ɓa fe a suki ké rih law Ŋgerzah a ye nzuk-ya̧ na.

⁴A ye, ke yih nzukri gbam ɓá ti̧h ke ndɔk hul ɓay kú tu ketina tu-tu,

⁵ɓayu ké Ŋgerzah mbew yaŋ, Mbay Zezu ke ɓa nzuk pirmatul ké ƴo haŋsekle Ŋgerzah ke nzukri mbew yaŋ pi.

⁶A ye ké-e poŋ mun ye puh mbɔl hul ɓay tul nzukri gbam, a ye ke ɓa salɓay in[2] ké Ŋgerzah ŋga̧h ziŋ nzuk pirmatulri ɓa záh woyri, salɓay inu te-teh ɓay ke sewu,

⁷mí Ŋgermbay lu mi ɓa mbay ka-kah ɓay ye, ɓa gun nzak pihna ye. Ketina mí-i ɓah, mi kuŋ ɓay ya, a bi nzuk-sɔk fe hi̧ sa̧wnzuk a ɓoruri ɓay sɔk ɓay kanlaw tul Ŋgermbay ke ɓay a ketina pi.

⁸Dale mi ɓahri, gelke wo̧rori ké gelri gbam ɔr ndɔk woyri ɓay goŋ Ŋgerzah le, kú goŋ ni ke ndɔk a teh-u dan haŋ fa̧hna, dan fahɓay.

⁹Wu̧yri ba, kú sɔk mun woyri ke sam gar lari a ŋgeru ya, gar ké poŋ mun woyri ku̧ kala ya pi. Wu̧yri ke tiklari, kú ndoh gar ké mah hȩkna nzukri. Mgbá pirmatul woyri ɓá i sa̧wseh ya. Kú mbar mun woyri ke fe lari a ŋgeru ya, kandɔk lari lɔr mini zaw lari a ŋgeru mini mah gar lari.

¹⁰Le kú mbar mun woyri ke fe laɓna a suki ké mah riŋ ɗina wu̧yri ké nzukri tu niri ɓa wu̧y-dih fal Ŋgerzah.

¹¹Wu̧yri ɓá tih ke law ɗeŋ tu keni ketina, kú hȩk gel ƴona woyri ke toŋna-u toŋna-u.

¹²Mi hi̧ wu̧ynzuk firma ɓay Ŋgerzah hi̧ wo̧ronzuk ya, ké kaɓ tul wo̧ronzuk ya pi. Le law ye ɓá na ɗeŋ ma.

¹³Ŋgerzah laɓ Adam pol dara mí ke laɓ Eve ɓáy.

¹⁴Le ta ɓa Adam mí lah nzak rɔkna ya. A ye wu̧ynzuk mí lah nzak rɔkna bale, ke mba keni nzak Ŋgerzah.

¹⁵Dale ke tí̧h ke ɓil ɓay ke mbuŋna mi̧hri ye ké ɓa Ŋgermbay[3], kandɔkaw mí a woiri wu̧yri, gelke i ƴo tul kanlaw tul Ŋgermbay, tul law sana, tul siŋ sina ké mah nun Ŋgerzah ké si ke nun ru̧na.