Read Karang Mbete 1 Timote 4 Bible Online

Mbete 1 Timote 4 - Karang bible

Mbete 1 Timote 4

¹Tempuki ɓah ɓa teh-u ɓahri, sew a ɔh tɔru le, nzuk a haniri ɓay el ke mun woyri ma fal poŋ Ŋgermbay. Ku él mbi mun woyri dih fal záh nzak rɔknari ke fe firma záhri-aw.

²Ku láh keni ɓay ɓahna foh nzukri kú-u mu̧h kpɔl ɓil law woyri. Law nzukri-aw kpuh kandɔk korono̧k da̧y kaŋ,

³mí ku gboh yá̧ hani, ku sɔk nzukri ɓahri, su-su ɓay saŋ fe su̧na a haniri. Ŋgerzah ba, laɓ fe-uri hi̧ nzukri ké kan law sa tul ye, kú-u tu ketina ye tu le, ku ya̧ ndɔk seɗe ke tumbɔl.

⁴Ɓay fe le feri gbam ké Ŋgerzah laɓ ɓa fe a suki. Fe mbew ké mah saŋna ta-a, mí fe-uri, ku ƴo ya̧ ndɔk seɗe ke tumbɔl, ɓayu ké góŋ Ŋgerzah nzukri ke ɓay ké Ŋgerzah ɓah ra[5] mí hi̧ fe-uri mah nun ye.

⁶Kandɔkaw mí ɓayuri ké mu ɓay ɓah-u, mu ten teh-u hi̧ yi̧n ɓil Ŋgermbayri lah le, mu ná ɓa gun-laɓ pihna Mbay Zezu a suki. Ɓay kanlaw tul Mbay Zezu ke ɓay fe sɔkna a suki ké mu mgba ma law wo ra ƴo hɔl mu.

⁷Mú ɗi-ɗih ke kɔk ɓay ɓahna nzukri ke ɓay tuku mah kpɔkrɔri pi. Mú ruh mun wo ɓay ƴo ke Ŋgerzah ɓil hȩkna ma.

⁸Rúh mun ti̧h suk ndi̧ mí ƴó ke Ŋgerzah ɓil hȩkna ti̧h suk dan gbu̧h-u. Díh fal Ŋgerzah ra hi̧ suki seway kaŋto ya, mí hi̧ suki sew a a̧y ké ƴo gina pi.

⁹Ɓay ra ƴo gelu gaŋ ɓa ketina mah ya̧ ke law mbew.

¹⁰Ɓay ziŋ suki-aw, nah ruh mun, nah kah rohna ɓay fe le, law wah te tul Ŋgerzah Ŋgɔhnzuk ké ɓa nzuk-ya̧ nzukri gbam. Ke ya̧ nzukri ké ƴo ziŋ ni ya̧-ya̧.

¹¹Ɓayaw mí mú hew nzukri keni, mú firma niri.

¹²Nzuk hani ɓá ko mu ɓa kɔk fe ya, ɓá ɓahri mu ɓa gun kaŋto ya. Le fe laɓna wo ɓá mah hi̧ nzuk-kan law tul Ŋgermbayri ɓá ndɔl, ɓil ɓay ɓahna, ɓil siŋ sina, ɓil law sana, ɓil kanlaw, ɓil lawpuki pi.

¹³Kpu̧ru mah ka̧hna bi ké ta̧w wo, mú hi̧ tul wo hi̧ kí̧ ɓay Ŋgerzah hi̧ nzukri, hí̧ nzak hewna hi̧ nzukri, fírma nzukri ɓay ye.

¹⁴Mú poŋ ŋgerna fe ké Tempuki hi̧ mu ra ke fal ndɔk ya. Ŋgerna fe ké Tempuki hi̧ mu ra, Tempuki ɓaŋ ɓayu ndoh ɓil law yi̧nri mí ku ɓah si tul wo. Ŋgernzuk vul misoŋri ba, el kan ndɔk tul wo.

¹⁵Mú ta mun wo ɗik tul feri-aw ma, mú ƴo tulu ɓay hi̧ nzukri gbam ɓá ko tí̧h suk wo ké si ma pol pol.

¹⁶Mú ru̧ ke mun wo ɓay tul wo ke fe firma ɓay Ŋgerzah wo. Kandɔkaw mí mu tí̧h ɓil ɓay pi dara mí nzukri ké ƴo lah mu-aw ɓay ti̧h ziŋ mu pi.