Read Karang Mbete 1 Timote 5 Bible Online

Mbete 1 Timote 5 - Karang bible

Mbete 1 Timote 5

¹Mú zɔr law ŋgernzukri ke ɓay ya. Wara le mú hew niri kandɔk ké mu hew bah-mbuŋ mu kaŋ, mú hew sekeri kandɔk yi̧n wori, mú hew ŋgerwu̧yri kandɔk mah-mbuŋ mu, mú hew tiklari kandɔk gun mah wori ke lawpuki ké pol Ŋgerzah.

³Mú mgba sa̧w wu̧y seh a ketinari.

⁴Mí wu̧y seh a hani-uri ƴo ke gun mini gun zah le, mi̧hri woyri-aw mí ɓá tih ke mgbá sa̧w woyri kaŋ mí ɓa ƴó ke Ŋgerzah ɓil hȩkna. Mgbá sa̧w woyri-aw ɓa púh mbɔl hi̧ nzuk-mbuŋ niri. A a̧w mí rih law Ŋgerzah.

⁵Wu̧y seh a ketina ké nzuk ye mbew ta-a dale, law ye te sa tul Ŋgerzah, mí ke ƴo tul goŋ Ŋgerzah, ke ƴo ɓah ɓay ziŋ ni suŋ ke seh.

⁶Mí wu̧y seh a a̧y ké law ye te sa tul sú̧ tukala ba, ke kaɓ ra ke nun kara, ké pol Ŋgerzah le, ke hu-hu.

⁷Kandɔkaw mí mú sɔk keni nzukri dale, nzuk a ɓoruri ta zɔm niri ya.

⁸Mí nzuk mgba sa̧w nzuk yeri ya, ke mgba sa̧w nzuk kerpuh yeri kara ya le, nzuku poŋ Ŋgerzah munu. Nzuk-puh záh mba ni mba-mba.

⁹Dara riŋ wu̧y seh ɓá vbeh ké sakra riŋ wu̧y seh a ketinari ra le, mbihmbam ye ɓá ka̧h bon tɔtɔklɔ, ké ya̧ wo̧ro a ɓoru fal hul wah ye ya.

¹⁰Ku tu ni ke fe laɓna suki ye kandɔk mgbá sa̧w gunri ké hu̧h ké ta̧w ye, mgbá gahruri, pór sa̧w nzuk Ŋgerzahri, só nzukri ké koseh ziŋ niri, mbí mun laɓ sam fe a sukiri gbam mí ke laɓ.

¹¹Wu̧y seh a leleri bale mú vbeh riŋ woyri ya. Ku sɔɓ fal hi̧ Ŋgermbay gelke sa̧y ya̧ wo̧ro se niri,

¹²mí ku laɓ ɓay kan tul woyri ɓay fe le, ku sel wahɓay woyri kú-u ŋga̧h ziŋ Ŋgermbay da.

¹³Ta ɓa sel wahɓayaw kaŋto ya, wara le ku tih ke láɓ zoh, mí ku ha̧rma kerpuh ke kerpuh pevbȩɗ pevbȩɗ. Ku tih ke láɓ zoh kaŋto ya. Le ku ƴo ɓah kɔk ɓayri, ku ƴo rih ɓil ɓay ké ko niri ya, mí ku ƴo ɓah ɓay ké mah ɓahna ya.

¹⁴Sa̧wu mí-i ɓahri, wu̧y seh a leleri le, kú ya̧ wo̧ro, kú mbuŋ gunri, kú mgba sa̧w kerpuh woyri. Nzukbaa Ŋgerzah ƴo kuhru gel, ɓay ɓeɓ riŋ wah. Kú poŋ ful ndi̧ hi̧ ni ya, ɓayu ké wu̧y seh a haniri sak tul woyri dih fal nzukbaa a ye mbay záh tukala.

¹⁶Mí wu̧y ké kan law tul Ŋgermbay ké wah ye ƴo ri, mí in ye ɓa wu̧y seh le, ké so ni, ké poŋ sukna-u kan tul nzuk vul misoŋri ya, ɓay kú so wu̧y seh a ketinari.

¹⁷Ŋgernzukri ké ƴo nda pol nzukri ke siŋ sina a suki, nzukri ɓá hȩk niri mah pihna woyri wara le, ŋgernzuk a a̧yri ké ƴo ko seh ɓil sɔ́k ɓay Ŋgerzah, ɓil fírma nzukri ɓay Ŋgerzah.

¹⁸Kandɔk ké mbete Ŋgerzah ɓahri, mu ta ŋga̧h nzak nday ké ƴo pa-pay ya,[6] mí gun-laɓ pihna mah ziŋ kpaŋndɔk ye[7].

¹⁹Ɓay sekna ké si tul ŋgernzukri ba, gelke nzuk-ɓah tehɓayri mah seɗe mini say ta-a le, mú mgba ɓayu ya[8].

²⁰Ŋgernzukri ké laɓ suya ba, mú ndar niri ké gel daɓa dale, ŋgernzuk a ɓoruri ɓay laɓ hȩkme.

²¹Mi ƴo ɓah teh ɓayayri ké nun Ŋgerzah, ké nun Mbay Zezu, ké nun tem nzak pihnari ké ƴo pol Ŋgerzah pi, mú ɓer gi̧w tul ɓayri-aw dan kehr nzukri, mú lu nun nzuk mbew ya.

²²Mú takra kan ndɔk tul nzuk ke riŋ Ŋgerzah ya, rɔkɔ salɓay suya nzuku ɓá mgba tul wo pi. Mú kɔr mun wo ɓa nzuku a Ŋgerzah.

²³Mú nzo mbih kaŋto mba. Le mú zukru ke yim ndi̧ ɓay sena ɓil wo ke senari ɓoɗ ɓoɗ ké zɔklɔ mu kpatara.

²⁴Ké ta̧w nzukri ké ƴo laɓ suya ra, nzuk a haniri suya woyri ten mun ƴo si ziŋ niri ma ndiseŋe. Ké ta̧w nzuk a ɓoruri ba, suya woyri ƴo dih fal woyri si ka̧h gel-kuŋ salɓay.

²⁵Kaŋ pi mí fe laɓna suki a haniri ten mun ké gel a teh-u, fe laɓna suki a ɓoruri ba, ta mu̧h mun kpatara ya.