Read Karang Mbete 1 Timote 6 Bible Online

Mbete 1 Timote 6 - Karang bible

Mbete 1 Timote 6

¹Nzuk-kan law tul Ŋgermbay a a̧yri ké ɓa mgbal, ké gel pihna woyri gbam kú hȩk bahgaŋ woyri hȩk, rɔkɔ pihna suya woyri-aw ɓá hi̧ nzuk a ɓoruri ɓeɓ riŋ Ŋgerzah pi, ɓeɓ fe firma ké si tul ye keni pi.

²Mgbal a a̧yri ké bahgaŋ woyri ɓa nzuk-kan law tul Ŋgermbay pi ra, ko-ko kú ko bahgaŋ woyri-aw mah nun ya, ker ɓahri se, ɓa yi̧n bi kaŋto. Le kú lah nzak bahgaŋ woyri-aw kal bahgaŋ a ɓoruri ka-kal. Ɓay fe le bahgaŋri ɓa nzuk-kan law, ku ɓa maŋlawri, mí ku ƴo ziŋ suki ɓay pihna mgbalri-aw. Ɓayaw mí mú firma niri, mú hew niri keni.

³Nzuk ké firma nzukri ɓay Ŋgerzah ke fe firma ké reh ɓoɗ ke ɓay Ŋgerzah ra, hí̧ tul ye firma nzukri ketina ɓay Gaŋ wah Ŋgermbay Zezu, ke hi̧ ya, hí̧ tul ye firma nzukri ƴó ke Ŋgerzah ɓil hȩkna kara ke hi̧ ya pi. Le nzuku hu̧h tul, ke hew guŋ guŋ. Ke tu fe ya, mí sena ye ɓa dám ɓay, ɓa fáh ɓay tul gun fe vbehnari, mí ti̧h sere, ti̧h fáh hani, ti̧h farna, ti̧h kó hani ŋgi̧w, ti̧h zúkru hani. Kerɓay ye ra̧-ra̧h, ketina poh ni. Ke ker ɓahri se, pihna Ŋgerzah ɓa mahful ké-e ziŋ fe keni.

⁶Gelke nzuk ƴo ke law rihna ké tul fe ndi̧ ké na ndɔk ye le, láɓ pihna hi̧ Ŋgerzah ɓa baw fe ziŋna gaŋ.

⁷Nah gi ke fe hani ké tukala-ay ya sɔk ɓahri, nah ta mbi fe hani ɓay tɔr keni ya pi.

⁸Gelke nah ƴo ke fe su̧na ke gar ndohna le, mah na seeh.

⁹Mí nzuk ké ƴah fe ziŋna le, ke ƴo rih ɓil fe-leh law, ɓil ndaw, ɓil ɗaka kɔk feri ɓa ŋgi̧-u ké ɔh suya. Fe-uri ƴo hi̧ nzukri rih ɓil ɓeɓna ké riŋ niri ɓa zina woyri.

¹⁰Sa̧w suyari gbam ɓa ɗaka lari. Nzuk a hani-uri faŋ falu, mí ku vbɔl ɓa ɗih-u ké ta̧w Ŋgerzah. Law woyri ƴo mbew ziŋ ni ya. Mí ku laɓ mun woyri koseh ɓoɗ ɓoɗ ɓa ŋgi̧-u ke mun.

¹¹Mí a wo nzuk ké Ŋgerzah mbi mu ɓay laɓ pihna ye ba, mú ɗuk feri-aw ɓa ɗih-u, mú hi̧ mun wo ɓay ƴo tul sal in ké Ŋgerzah ŋga̧h ziŋ mu, mú hi̧ mun wo ɓay ƴo ke law Ŋgerzah, ƴo tul kanlaw, ƴo tul law sana, ƴo tul sú̧h law, ƴo tul law a voh-u ma.

¹²Kanlaw tul Ŋgermbay ɓa ŋgermu a suki, mú ruh mun ɓilu. Mú mgba ɔkna sew a ɔh tɔru ra giri giri ndɔk seɗe kandɔk ké Ŋgerzah ɗi mu ɓayu seh ké mu te-teh ɓay a suki-aw ké nun daɓa nzukri.

¹³Mi hi̧ mu ɓayay ké nun Ŋgerzah a ye ké-e hi̧ feri gbam ɔ-ɔkna, ké nun Mbay Zezu a ye ké-e te-teh ɓay a suki-aw ra seh ké-e ƴo pol guvener Pilaɗ[9].

¹⁴Ɓay ké mi hi̧ mu ra te-teh, ɓayu mah zɔmna ya, mú kɔr kaŋ kpu̧ru ka̧h sew ké Ŋgerzah lek ɓay hi̧ Gaŋ wah Ŋgermbay Zezu ɓá sɔk mun. A ye Mbay a Ŋgeru mbew yaŋ, ke ɓa nzuk pol tehna, Mbay tul mbayri, Gaŋ tul gaŋri,

¹⁶Ŋgɔhnzuk mbew yaŋ, ke kaɓ ɓil gel tehna ké nzuk mbew mah ka̧h ri ya, a ye ké nzuk ko ni bɔk mbew ya, nzuk mah ko ni ya pi. Dimna ke huhrumun ɓa nzuku a ye sew ke sew. Gelu munu.

¹⁷Mí nzukri ké ƴo ke fe ziŋna sew a tukala-ay, mú sɔk niri, kú nda giri ya, kú ɓaŋ law woyri te tul fe ziŋna a seway ké ɓa fe ziŋna ké ɓay ka-kal ra ya. Kú ɓaŋ law woyri te tul Ŋgerzah ma a ye ké-e sel ndɔk wal feri hi̧ na ɓay náh zay mun keni.

¹⁸Le kú na ɓa balak nzuk, kú hi̧ fe laɓna a suki ɓá ka̧y tul hani ka̧y tul hani, kú sel ndɔk law mbew poroɗ, kú laɓ law mbew ke fe woyri ziŋ haniri.

¹⁹Kaŋ mí ku ƴo mbu̧h fe ziŋna a ndɔh-u ɓay sew ké ƴo gina le, kú mgba ɔkna a kpakpaŋu ra giri giri ndɔk seɗe.

²⁰Timote mú kɔr ɓayayri ké Ŋgerzah ɓaŋ ku̧ ndɔk wo, mú to suy kɔk ɓayri ma fal kandɔk ɓay a ndá gosori ke ɓayri ké si ɓoɗ kú-u ɗi ɓa fe tuna. Nzuk a haniri ƴo tulu ɓahri se, kanlaw tul Ŋgerzah munu. Bale ku reh da. Timoteri, lawsuki ƴo ziŋ wuri.