Read Karang Mbete 2 Timote 1 Bible Online

Mbete 2 Timote 1 - Karang bible

Mbete 2 Timote 1

¹Mi vah mu Timote, gun sana bi. Mi vah mu ke lawsuki, ke law in, ke ɗeŋ, gbam ur ké ta̧w baah Ŋgerzah, ké ta̧w Mbay Zezu Gaŋ wah. A bi Pɔl gun nzak pihna Mbay Zezu kandɔk ké law Ŋgerzah yih. Nzak pihna-u si mbew ke wahɓay ɔkna ké na ta̧w Mbay Zezu.

³Mi el ke tumbɔl hi̧ Ŋgerzah a ye záh zih wahri ké mi dim ni ke law a teh-u. Ɓil góŋ Ŋgerzah bi suŋ ke seh le, law bi ker ɓay si tul wo kpatara.

⁴Mi ker si tul mbihnun wo dale, law bi tasa̧y kó mu ɓay hi̧ law bi ɓá el mbah ke law rihna.

⁵Kanlaw wo tul Ŋgermbay ké mu̧h ɓay ya-aw ra mi yȩkre ya. Kanlaw tul Ŋgermbayaw titilu ke law zah wo Luwize, ke law mah wo Enis. Kaŋ le mi tu-tu, kanlaw tul Ŋgermbay ƴo law wo pi.

⁶Sa̧wu mí-i ƴo dum law wo ɓay ŋgerna ké mu ziŋ ke seh ké mi kan ndɔk tul wo ra le, mú hi̧ ŋgerna ké Ŋgerzah hi̧ mu-aw ɓá el ŋgul.

⁷Ɓay Tem ké Ŋgerzah hi̧ na ra gi ke law hȩkme ya. Le Temu gi ke ŋgerna, ke law sana, ke kerlaw.

⁸Kaŋ dale mú laɓ su̧hru ɓay tul tehɓay Gaŋ wah ya pi, mú laɓ su̧hru ɓay ŋga̧hna kú-u ŋga̧h mi ɓay tul ye kan vul mgbal ya pi. Wara le mú rih ɓil koseh ɓay tul ɓaysuki hul Ŋgermbay ma. Ɓayu si mbew ke ŋgerna Ŋgerzah.

⁹A ye ke ya̧ na, ke ɗi na ɓa sa̧w ye ɓay fe laɓna suki wah ya. Wara le ɓa fe ké-e lek lewsa̧, ɓa lawsuki ye. Lekɓay ke lawsuki ké na ta̧w Mbay Zezu ra Ŋgerzah hi̧ na dara mí sewri laɓ ɓáy.

¹⁰Lekɓayu ke lawsuki-u ten mun aŋay ke gina Mbay Zezu nzuk-ya̧ na, a ye ké-e i ŋgerna hul. Mí ke hi̧ ɔkna ke pa̧ymun ké ɓay kaɓ kpatara ti̧h ɓa teh-u ké nun nzukri ɓay tul ɓaysuki hul ye.

¹¹Ɓayu mí ke lu mi ɓa mbay ka-kah-u, ɓa gun nzak pihna-u, ɓa nzuk-firma ɓayu hi̧ nzukri.

¹²Sa̧w koseh bi-ay munu. Keni-aw kara su̧hru se mi ya ɓayu ké mi tu ni ɓa a ye ké law bi te sa tul ye tu-tu. Mi tu ɓahri se, ke ƴo ke ŋgerna, ke kɔ́r fe bi ké mi ɓaŋ kan ndɔk ye ka̧h ɓil nam ké ɓay gi-u-aw[1] gaŋ.

¹³Siŋ sina wo ɓá mah ke ketina Ŋgerzah ké mu ko, mú ƴo tulu ke law mbew, ke law sana. Law mbew ke law sana ra ur ké ta̧w Mbay Zezu. Ketina ra mu lah ké ta̧w bi.

¹⁴Ɓay a suki-u ké-e kan ndɔk wo ra, mú kɔr ke ŋgerna Tempuki a ye ké-e ɗeh puh ké law wah.

¹⁵Mu tu ɓahri, nzukri ké tusiɓa Azi poŋ mi diw. Ké sakra woyri-aw Fizel ke Hermozen ƴo ri.

¹⁶Onisifor ba, gɔl mi ke fe laɓnari ɓoɗ ɓoɗ dara mí kú-u ŋga̧h mi-ay se ni su̧hru ya pi. Gaŋ tul feri riw ɓá laɓ law in ziŋ nzuk kerpuh yeri.

¹⁷Ke poŋ mi ya wara le, ke hi̧ tul ye ke ŋgerna ɓay ƴah mi ke ka̧hna ye ké Rɔm, mí ke ziŋ mi.

¹⁸Law in Gaŋ tul feri riw ɓá ƴo ziŋ ni ɓil nam ké ɓay gi-u-aw ra. Sonari ɓoɗ ɓoɗ ké-e laɓ ké Efeze ra, mu tu-tu. Mi mah ki̧ hi̧ mu ya.