Read Karang Mbete 2 Timote 2 Bible Online

Mbete 2 Timote 2 - Karang bible

Mbete 2 Timote 2

¹Kaŋ le a wo gun bi, mú poŋ hi̧ lawsuki ké na ta̧w Mbay Zezu ra ɓá hi̧ mu ŋgerna.

²Ɓay a ketinari ké mu lah ké ta̧w bi ké nun daɓa nzukri ra, mú el ku̧ ndɔk nzukri ké law woyri ƴo ziŋ Ŋgermbay ɓil feri gbam, mí a woyri kara kú mah firma nzuk a ɓoruri pi.

³Mú rih ɓil koseh ɓa soze Mbay Zezu a kpakpaŋu.

⁴Soze ta mgba bɔh fe laɓna ziŋ nzuk a garuri ya ɓay hi̧ law ŋgernzuk ye ɓá rih ni.

⁵Kaŋ pi mí nzukri ké ƴo kpak hani gelke nzuk ruh mun ye ke mahfulu ya le, nzuku ɓay ta ziŋ kpaŋndɔk-ti̧h pol ya.

⁶Nzuk pay ké kah rohna le, a ye mí ke su̧ fe payu pol.

⁷Mú ker ɓay tul ɓay bi-ay ɓa ɗih-u ɓayu ké Gaŋ tul feri riw ɓay hi̧ mu kerlaw ɓil feri-aw gbam.

⁸Mú ker ɓay si tul Zezu a ye Ŋgermbay ké ti̧h ké sakra hulri ke pa̧ymun a foyu, ke ɓa mi̧hri Daviɗ mbay a luki, ɓayu ɓa ɓaysuki ké mi ka-kah-u.

⁹Ɓay tul ɓaysuki-aw mí-i ƴo ko seh ɓayu mí si ziŋ mi ka̧h ŋga̧hna kú-u ŋga̧h mi ke sen-ay mí ɓay Ŋgerzah ba, mahful ŋga̧h-u ta-a.

¹⁰Sa̧wu mí-i ƴo su̧h law ɓil feri gbam ɓay tul nzukri ké riŋ Ŋgerzah kan tul woyri ɓay hi̧ kú mgba ɔkna ké na ta̧w Mbay Zezu pi, kú mgba riŋ ɗina ye ké mgbe ɓa ŋgɔh pi.

¹¹Ɓay ra ƴo gelu gaŋ ɓa ketina ɓayu ké nah hu ziŋ ni le, nah káɓ ke ɔkna ziŋ ni[2].

¹²Nah ƴo su̧h law le, nah lák mbay ziŋ ni pi, mí nah ma̧y riŋ ye le, a ye kara ke má̧y riŋ wah pi.

¹³Nah poŋ wahɓay wah le, a ye ke ƴo tul ɓay ye, ɓayu ké-e ta ma̧y ɓay ye ke mun ya.

¹⁴Mú el dum law nzukri ke ɓayri-ay, mú ɓah tehɓayuri hi̧ niri ké nun Ŋgerzah, kú ɗi-ɗih ke fahɓayri ké ti̧h suk ya. Fahɓayuri ƴo gbur law nzukri ké ƴo lah-u.

¹⁵Mú ta mun wo ɗik ɓay ƴo ɓa teh-u ké pol Ŋgerzah ɓay na ɓa gun-laɓ pihna ké siŋ sina ye ta ɓaŋ su̧hru kan nun ye ya. Le pihna wo ƴo ndar ful ɓay a ketina ɓa teh-u hi̧ nzukri.

¹⁶Kɔk mberem a kalari ɓá kal ɓa ɗih-u ke ɓel wo. Nzukri ké ƴo lu mberem kɔk ɓayri ra law-saŋ Ŋgerzah si ma pol pol ké ta̧w woyri.

¹⁷Fe sɔkna woyri eŋ no̧k da̧y ké su̧ mun hay nzuk kaŋ. Himene ke Fileɗ kara ƴo laɓu.

¹⁸Ku kew oh ketina. Ku ƴo ɓahri, zíŋ pa̧ymun a foyu laɓ kal da, mí ku gbur keni law nzuk-kan law tul Ŋgermbay a haniri.

¹⁹Mí diŋ vul Ŋgerzah na ŋgi̧w ŋgi̧w. Zezele fe ké sɔk ɓahri, diŋ vul ɓa nzuku a ye vbeh kan ri kandɔkay : Gaŋ tul feri riw tu nzuk yeri tu, mí nzukri ké ɗi riŋ Gaŋ tul feri riw ra, kú ɗi-ɗih ke fe laɓna-saŋ Ŋgerzah[3].

²⁰Ké ɓil kerpuh a ah-u, fe pihnari ƴo ri ɓoɗ ɓoɗ. Fe pihna kú-u laɓ ke lari lɔr ƴo ri, fe pihna a lari a puki ƴo ri pi. Mí fe pihna a ŋgoro ke a pa̧y ƴo ri pi. Fe pihna a hani-uri ndɔh ké nun nzuk, a ɓoruri ba, ɓa fe-laɓ pihna namri gbam.

²¹Gelke nzuk lu feri ké sih law ye le, ke ná ɓa fe pihna ké ndɔ-ndɔh ké nun nzuk puh-u, ke ɓa fe pihna a puki mah laɓ pihna a sukiri ɓoɗ ɓoɗ gbam.

²²Mú ɗuk ɓa ɗih-u ke fe laɓna ɗaka haymun sekeri. Ƴó mbew ke Ŋgerzah, law ké te sa tul Ŋgermbay, law sana, ɗeŋ, feri-ay gbam mú faŋ falu ziŋ nzukri ké ƴo ɗi Gaŋ tul feri riw ke law a teh-u.

²³Mú gen vbiɓay a kɔkɔ-uri ké nzukri fakla ke law. Mu tu ɓahri se, sam vbiɓayri-aw kú-u ten ƴo gi ke ɓal hani.

²⁴Gun-laɓ pihna Gaŋ tul feri riw ra ta ɓa-ɓala ya. Le ke ɓa nzuk-si siŋ sina law a voh-u ké ta̧w nzukri, ke mah firma nzukri ɓay ma-mah, ke ik law pi.

²⁵Ke kusol a voh-u ke ƴo ndar nzukri ké nzuk-ɓer ɓayri ƴo gbur law woyri[4]. Ko ya le, Ŋgerzah ɓay hi̧ niri mahful mbí law woyri ɓay kú el tu ketina,

²⁶mí kerɓay woyri el teh hi̧ kú ti̧h ɓil ndaw nzukbaa ké mgba niri hi̧ ku ƴo laɓ fe ké law ye yih.