Read Karang Mbete 2 Timote 3 Bible Online

Mbete 2 Timote 3 - Karang bible

Mbete 2 Timote 3

¹Mú tu fe-ay ɓa teh-u : Sew a ɔh tɔruri-ay, namuri ɓay kpuh mbamba,

²ɓayu ké nzukri ɓay ker ɓay tul woyri mbew yaŋ, ku ná ɗaka lari, ku gár ɓay, ku ndá giri, ku mbí riŋ Ŋgerzah ke riŋ nzukri ɓay ɓah keni suya, kpúh tul ziŋ nzuk-mbuŋ niri ɓay ƴo ri, tú suki ɓay el ke tumbɔl ɓay ta-a, sáŋ Ŋgerzah ɓay ƴo ri,

³mgbá in ɓay ta-a, gɔ́l hani ɓay ta-a, ku ɓál riŋ nzukri, sú̧ tukala si wɔrɔk ɓay ƴo ri, ku mgbɔ́r kandɔk fe mgbam, kaɓna a suki ké ta̧w nzukri ku ɓay sa-a,

⁴ku té ya̧hri, ku láɓ fe lɔr lɔr, hú̧h tul ɓay hew niri guŋguŋ, ku yíh ɓay zay mun woyri el fu̧y Ŋgerzah.

⁵Ku ƴo laɓ mun eŋ nzukri ké law woyri ƴo mbew ziŋ Ŋgerzah, mí fe laɓna woyri ƴo ma̧y ŋgerna ye. Mú gen sam nzuk a kandɔkawri-aw gen.

⁶Ké sakra woyri-aw, nzuk a haniri ƴo rih ɓil kerpuhri, ku mgba wu̧yri ɓa mgbal. Sam wu̧y a a̧wri ra suya ƴo tehre niri hi̧ rew mbaŋ law woyri. Ɗaka fe laɓna haymun ɓoɗ ɓoɗ rah niri.

⁷Ku ƴo firma fe kpatara, mí mgbá ɓay a ketina zi niri.

⁸Nzukri ra ku na kandɔk Zanes ke Zambere a woyri ké lewsa̧ ku ɓer ɓay ziŋ Moyiz kaŋ pi, mí ku ƴo ɓer ɓay ké na ɓoɗ ke ɓay a ketina. Kerɓay nzukri ké rih sakra woiri-aw ɓa ɓeɓna. Kanlaw woyri tul Ŋgermbay ɓa kuna.

⁹Mí ku ta si keni ma pol ya ɓayu ké kerɓay woyri ké ta-a ra ɓay ten mun ké nun nzukri gbam kandɔk fe laɓna Zanes ke Zambere ké ten mun kaŋ.

¹⁰Mí a wo ra mu dih fal bi ke fe firma, ke siŋ sina, ke fe ké mi mbi mun bi ɓay laɓu, ke kanlaw tul Ŋgermbay, ke iklaw, ke law sana, ke su̧hlaw,

¹¹ke sɔ́k nun sehri ké nzukri laɓ ziŋ mi, ke kosehri ké ziŋ mi ké Antiyos, ké Ikoniyum, ké Listere pi. Sam kosehri ké mi su̧h law ɓilu ya ta-a. Keni-aw kara Gaŋ tul feri riw ten mi ke ɓilu gbam.

¹²Mí nzukri ké mbi tul woyri dih fal Ŋgerzah ɓay riŋ Mbay Zezu le, nzukri ɓay laɓ niri koseh gaŋ.

¹³Nzuk law a pipiri-uri ke nzuk-laɓ sa̧wkpuhri rah keni nzukri ba, ku si wɔrɔk ke fe laɓna woyri ma pol, ku ƴo laɓ hi̧ nzuk a ɓoruri reh ful pi, a woyri kara ku ƴo reh ful pi.

¹⁴Mí a wo le, mú ƴo tul fe firmari ké mu tih keni, ké law wo te sa tulu. Mu tu nzukri ké mu firma fe ké ta̧w woyri tu-tu[5].

¹⁵Ke lele wo sa̧ kaŋ mú-u tu mbete Ŋgerzah. Mbete-u mah hi̧ mu ru̧na ké ƴo si ziŋ mu rih ɓil ɔkna ké Ŋgerzah hi̧ ɓay nzuk ké law ye te sa tul Mbay Zezu.

¹⁶Fe vbehna-awri riw sa̧wu ti̧h ke nzak Ŋgerzah, mí fe vbehnari-aw gbam ti̧h suk ti̧h. Ɓayuri na ɓay firma nzuk ɓay Ŋgerzah, ɓay ndar kperu ɓay, ɓay ndar nzuk, ɓay hi̧ nzuk mbi siŋ sina a teh-u hi̧ nzuku ƴo ke Ŋgerzah ɓa záh ye dale,

¹⁷nzuk Ŋgerzah ɓay mah laɓ sam sukiri ɓoɗ ɓoɗ kandɔk ké ɓayuri hi̧ nzuk ŋgerna laɓu.