Read Karang Mbete 2 Timote 4 Bible Online

Mbete 2 Timote 4 - Karang bible

Mbete 2 Timote 4

¹Mi ƴo ɓah hi̧ mu ɓa teh-u ké nun Ŋgerzah, ké nun Mbay Zezu a ye ké-e ɓay kehr nzuk a ƴo ke ɔknari ke hulri, ɓay mun ye ké-e ten ké haŋsekle wah pi, ɓay lák mbay ye pi, mi ƴo ɓah hi̧ mu ɓahri,

²mú ka-kah ɓay Ŋgermbay, mú ƴo tul bɔk ɓil sa̧wseh a suki ɓil sa̧wseh a suya-u, mú ndar kperu ɓay nzukri, mú hah nzukri ɓay kú mbi ful a suki, mú hew nzukri. Ɓil fe-uri gbam mú laɓ ke iklaw mú firma nzukri ɓay Ŋgerzah keni,

³ɓayu ké sew ƴo gina ké yá̧ fe firma ɓay a ketina ɓay se-se, nzukri ɓay fa̧h nzuk a a̧yri ké ɓay ɓahna woyri ɓa nzak rihna hi̧ kú firma niri fe kandɔk ké law woyri tasa̧y lah-u.

⁴Ku sa lah ɓay a ketina ya, ku mbíh suk woyri, ku él lah tuku ɓayri ké nzukri tuk.

⁵Mí a wo le, ɓil feri gbam mú kaɓ ke nun a teh-u, ɓil koseh mú su̧h law, mú laɓ pihna nzuk-ka-kah ɓaysuki hul Ŋgermbay, mú laɓ pihna wo ɔh ke gelu gelu.

⁶Ɓayu ké mun bi ɓa yim-ku̧ tul fe puhna hi̧ Ŋgerzah wara. Sa̧wseh gahru bi ka̧h da.

⁷Mi ruh ŋgermu a suki, mi ɗuk kpu̧ru ka̧h gbu̧h gel kpak ɗukna, mi mgba sa̧w nzak pihna kanlaw tul Ŋgermbay.

⁸Mí aŋay le fe ké ƴo geŋ mi ɓa guɓatul ké ɓa kpaŋndɔk-ti̧h pol ké na ɓay nzukri ké ƴo mbew ke Ŋgerzah ɓa záh woyri. Gaŋ tul feri riw ɓay ndoh mi nam ké ɓay gi-u-aw ra a ye nzuk-kuŋ salɓay ké-e ƴo tul ɓay ye. Ke ndóh mi ke hȩk ya. Le ke ndóh nzukri gbam ké tasa̧y nam-ten mun ye pi.

⁹Timote, kɔkrɔya mú takra gi ta̧w bi ɓa gah-u.

¹⁰Ɓayu ké a ye Demas sa̧y-su̧ tukala-ay rih law ye, mí ke poŋ mi. Ke tɔr ma Tesaloni. Gersaŋ si laɓ pihna ma Galaɗ. Tiɗ ba, si laɓ pihna ma Dalmati.

¹¹Luk ke hȩk ye mí toŋ ké ta̧w bi. Mú maŋ Marki ɓá gi ziŋ mu kandɔk ké-e ti̧h mi suk ɓil pihna mbamba.

¹²Tikus le, mi pih ni si ma Efeze.

¹³Mu ƴo gina le, mú mbi gar tel ké mi poŋ ké Torowa ké ta̧w Karpu. Mú fa̧h mbete fe vbehnari gi keni pi. Wara le fe vbehnari a vbeh ɓil ho̧ko a taŋu mú yȩkre ya.

¹⁴Aleksander nzuk-tuh fe, ke laɓ mi suya ŋgi̧ mbamba, mí Gaŋ tul feri riw ɓay el ke suya-u ku̧ tul ye mah gel fe laɓna ye ɓáy.

¹⁵Ke ɓer ɓay ke ŋgerna. Ɓay ye reh ɓoɗ ke nzak pihna wah. Mú ko tul wo ger ɓay tul ye.

¹⁶Ke seh-lu lakna ɓay bi a titilu ké ndiseŋe ra, nzuk ké ƴo fal ŋgaŋ bi ta-a. Gbam woyri ku poŋ mi diw. Mi yih ɓay hi̧ salɓay poŋna kú-u poŋ mi ra ɓá mgba tul woyri ya.

¹⁷Mí Gaŋ tul feri riw ƴo ziŋ mi. Ke hi̧ mi ŋgerna, mí-i ɓah ɓaysuki hul ye ɓa teh-u hi̧ sa̧wnzuk a ɓoruri lah. Kaŋ mí ke ten mi ke nzak mbaki.

¹⁸Ke ɓay ten mi ké ɓil ɓay a pipiri-uri ké nzukri lek gbam. Ke hí̧ mi ti̧h ke ɓilu ɓay mí rih ɓil lák mbay ye a nunmbam. Riŋ ɗina ɓa nzuku a ye sew ke sew ɓa ŋgɔh. Gelu munu !

¹⁹Mú vah Pirisil ke Akila ke nzukri ké kaɓ kerpuh Onisifor pi.

²⁰Arasi kaɓ Kɔrente. Torofin ba, mi poŋ ni ɓa sena ké Mileɗ.

²¹Mú takra ká̧h ta̧w bi dara belem ɓá laɓ ɓáy. Ebulu ke Pudaŋ ke Linos ke Kolodiya ke yi̧n ɓil Ŋgermbay a ɓoruri gbam ku vah mu.

²²Gaŋ tul feri riw ƴo ziŋ tem wo. Lawsuki Ŋgerzah kara ƴo ziŋ wuri gbam pi.