Read Karang Mbete Tiɗ 1 Bible Online

Mbete Tiɗ 1 - Karang bible

Mbete Tiɗ 1

¹A bi Pɔl mgbal Ŋgerzah, mi ɓa gun nzak pihna Ŋgermbay Zezu. Nzak pihna ké mi ka-kah-aw si ke kanlaw nzukri ké riŋ Ŋgerzah kan tul woyri pi, si ke fe tuna ɓay a ketina gbam pi. Kanlaw tul Ŋgermbay ke fe tuna ra ɓa sam law a a̧y ké si mbew ke law Ŋgerzah.

²Nzukri ké law woyri si mbew ke law Ŋgerzah ra ƴo geŋ káɓ ke pa̧ymun a foyu ɓa ŋgɔh, mí Ŋgerzah a ye ké-e kuŋ ɓay ya ra ke wahɓay kaɓna-u lewsa̧ dara mí sewri laɓ ɓáy.

³Mí sa̧wseh ye ké-e lek ɓay sɔk ketina-u ka̧h bale, ke hi̧ mi, mi ka-kah ɓayu. Nzak pihna ké-e ɓaŋ ndoh ndɔk bi ra ɓa bolnzak Ŋgerzah nzuk-ya̧ na.

⁴Mi vbeh mbete-ay hi̧ mu Tiɗ gun bi a ketina ké nah ƴo mbew ɓay law wah ké te sa tul Ŋgermbay. Mi vah mu ke lawsuki ke ɗeŋ ké ur ké ta̧w baah Ŋgerzah ké ta̧w Mbay Zezu nzuk-ya̧ na.

⁵Mi poŋ mu kaɓ tusiɓa Kereɗ ɓay mú ɔh tɔr pihnari ké toŋ, mú lu ŋgernzuk vul misoŋ puh ke puh kandɔk ké mi sɔk mu ke gelu gelu ra.

⁶Gelke nzuk ƴo ri ké siŋ sina ye nda-ndar ké te-teh le, mú lu ni. Nzuku ɓá na ɓa nzuk ké ƴo ke wu̧y mbew yaŋ, gun yeri ɓá mah hi̧ nzukri ɓaŋ law kan tul woyri, nzukri ɓá goh niri ɓay fe laɓna va̧h ya, ɓay tul kpuhna ya,

⁷ɓayu ké ŋgernzuk-ko tul sa̧wnzuk Ŋgerzah ra ɓa nzuk ké siŋ sina ye nda-ndar ké te-teh. Nzuku ɓa nzuk ké ŋgu̧h tul ɓay ya, ké ti̧h wo̧ro ya, ké poŋ mun hi̧ yim ya, ké tur nun nzukri ya, ké ƴah lari ke mahful-rah nzukri rih ɓil fe laɓna a suya-u ya.

⁸Wara le nzuku ɓa nzuk-mgba gahru ndɔk seɗe, suki mí hi̧ ni law rihna, ke kɔr tul ye ɓa suki, ke ƴo mbew ke Ŋgerzah, law ye pu ɓa nunu a Ŋgerzah, ke mgba mun ye,

⁹ke mgba fe sɔkna ké si ke ɓay a ketina ké sɔ-sɔɓna ya ɓa kpuh-u ma law ye dale, ke mah hew nzukri ke fe firma a teh-u pi, ke mah ndar kperu ɓay nzuk-fah ɓayuri pi,

¹⁰ɓayu ké nzuk tul kpuhnari ké mbu̧h ziŋ wuri ŋgi̧ mbamba, ɓay ɓahna woyri ɓa kuna, ku ƴo rah nzukri ke ɓay ɓahna woyri wara le, sam nzuk tul kpuhna a kandɔkawri ŋgi̧na woyri ur ké sakra ziɓri.

¹¹Nzuk-fah ɓayri ra su-su ɓay tuh nzak woyri. A woyri-aw ku ƴo gbur kerpuhri ke ɓay Ŋgerzah woyri ké mah firma ya. Ku firma nzukri fe-aw ɓay su̧ ɓil woyri kaŋto, mí ɓa su̧hru.

¹²Nzuk tusiɓa Kereɗ a hani ké sakra woyri ké ɓa nzuk-ten sa̧wɓay woyri gaŋ mí ɓahri : « A wah nzuk Kereɗri nah ɓa nzuk-kuŋ ɓayri kpatara, nah mgbɔ-mgbɔr, nah ɓa nay kpah, nah ɓa zoh, nah ƴah ɓil wah kaŋto. »

¹³Ɓay ye-aw ra ɓa ketina. Sa̧wu mí mú ndar kperu ɓay woyri pol mbew hi̧ kú ƴo ɓa kpuh-u ɓil kanlaw tul Ŋgermbay,

¹⁴kú ya̧ ɓay tuku ké ziɓri tuk ya, kú ya̧ bolkusol nzuk pirmatulri ya pi. Nzukri-aw reh ke ɓay a ketina re-reh.

¹⁵Nzukri ké te-teh le, feri gbam te-teh ké nun woyri, nzukri ké law woyri si-sih kú-u poŋ ɓay a ketina ba, fe hani mbew ké te-teh ké nun woyri ta-a ɓay fe le, kerɓay woyri ke law woyri si-sih.

¹⁶Ku ƴo ɓahri, ku tu Ŋgerzah tu, mí fe laɓna woyri sɔk ɓahri, ku saŋ ni saŋ. Mí a woyri gaŋ Ŋgerzah ko niri ɓa fe ké fa̧h mun ye zir zir kandɔk kú-u deh nzak pihna ye. Fe laɓna woyri mah suki ya.