Read Karang Mbete Tiɗ 2 Bible Online

Mbete Tiɗ 2 - Karang bible

Mbete Tiɗ 2

¹Mí a wo le, mú firma nzukri ɓay a a̧y ké si ke fe firma a ketina.

²Mú sɔk ŋgernzukri, kú na ɓa nzukri ké nun woyri te-teh, ké siŋ sina woyri mah hȩkna nzukri, ké kerɓay woyri na ɓa suki, siŋ sina woyri si ke gelu gelu ké ɓil kanlaw, ké ɓil law sana, ké ɓil su̧hlaw.

³Mú sɔk ŋgerwu̧yri kaŋ pi. Kú na ɓa wu̧yri ké siŋ sina woyri mah dim Ŋgerzah, kú na ɓa wu̧yri ké laɓ nani ya, ké ɓa mgbal yim ya, ké hi̧ nzak hewna a suki

⁴ɓay hi̧ wu̧y a leleri ɓá ru̧ ɓay hi̧ kú na ɓa wu̧yri ké sa wah woyri, ku ɓa wu̧yri ké ƴo sa gun woyri,

⁵ké ƴo ker ɓay ɓa suki, ké mun woyri ɓa nunu a Ŋgerzah, ké ƴo mgba sa̧w kerpuh woyri ɓa suki, mí ku hȩk wah woyri kaŋ. Le nzukri ta ɓeɓ ɓay Ŋgerzah ya.

⁶Kaŋ pi mí mú hew sekeri,

⁷kú ker ɓay ɓa suki ɓil feri gbam hi̧ kú ko siŋ sina wo a suki ké mu ƴo nda pol woyri keni mah ndɔlna. Mú hew niri ke fe firma ké ƴo ke gelu gelu ɓa suki, ké mah hȩkna,

⁸ké ɓayu ɓa ɓay a ketina, ké mah zɔmna ya. Le su̧hru ɓay se nzukbaa ŋgu̧y ŋgu̧y, ke ta ziŋ nzak-ɓah ɓay a hani-u ké tul wah ya.

⁹Mú hew mgbalri kú na ɓa nzukri ké hȩk bahgaŋ woyri ɓil feri gbam hi̧ law bahgaŋ woyri ɓá rih ké tul woyri. Kú ma̧y nzak bahgaŋ woyri ya,

¹⁰kú lɔm fe bahgaŋ woyri ya. Le kú sɔk siŋ sina ɓa suki ke law mbew. Kaŋ mí ku mbar keni fe sɔkna Ŋgerzah nzuk-ya̧ na ɓil feri gbam hi̧ fe sɔkna Ŋgerzah ɓá na ɓa fe a ndɔh-u.

¹¹Mú sɔk nzukri ɓay ké si ke fe firma a ketina ra ɓayu ké lawsuki Ŋgerzah ké ɓa sa̧w-ya̧ nzukri ten mun hi̧ nzukri gbam ko.

¹²Lawsuki ra ƴo firma na ɓay náh sɔɓ fal hi̧ law-saŋ Ŋgerzah ke ɗaka fe tukalari ɓay hi̧ kaɓna wah sew a aŋay ɓá na ɓa káɓ ke kerɓay a suki, ɓá na ɓa káɓ mbew ziŋ Ŋgerzah ɓa záh wah, ɓá na ɓa káɓ ke law-hȩk Ŋgerzah.

¹³Nah ƴo geŋ ke law rihna ɓay ko suki ké Ŋgerzah sam fe ku̧ tul wah, nah ƴo geŋ ke law rihna nam ké Ŋgerzah nzuk a luki a ye ɓay ten riŋ ɗina ye hi̧ na ko, riŋ ɗina-aw ɓa nzuk-ya̧ na a ye Ŋgermbay Zezu.

¹⁴Ke hi̧ tul ye ke mun hi̧ hul ɓay tul wah mí ke ten na ke ɓil sam póŋ bolkusol Ŋgerzahri ɓoɗ ɓoɗ gbam dale, ke el hi̧ law wah pu ɓa sa̧w ye hi̧ law wah ri̧h si̧w ɓay laɓ sukiri gbam.

¹⁵Kaŋ mí mú ɓah ɓay ɓa teh-u hi̧ nzukri, mú hew niri, mú ndar kperu ɓay woyri keni. Nzuk mbew ɓá ko mu ɓa gun ya.