Read Karang Mbete Tiɗ 3 Bible Online

Mbete Tiɗ 3 - Karang bible

Mbete Tiɗ 3

¹Mú dum law nzuk-dih fal Ŋgermbayri kú hȩk nzuk-lak mbay tusiɓari, kú lah nzak woyri, kú ƴo tul bɔk ɓay laɓ sukiri gbam,

²kú ɓeɓ riŋ nzuk ya, kú ɓa-ɓala ya, kú lah hani ke nzukri, kú si siŋ sina law a voh-u ziŋ nzukri gbam.

³A wah kara lewsa̧ kerɓay wah na kpo̧k, nah ya̧ ɓay Ŋgerzah ya, nah reh ful, nah ɓa mgbal ɗaka fe laɓna haymun ke fe-zay munri ɓoɗ ɓoɗ, pihna wah ɓa láɓ suya ɓa láɓ law si̧hna, nah mah saŋna, nah ƴo fu̧y haniri.

⁴Mí Ŋgerzah nzuk-ya̧ na hi̧ lawsuki ye ke law sana ké-e sa keni nzuk pirmatulri ten mun da,

⁵ke ya̧ na ɓay fe laɓna a suki ké nah ƴo laɓu ɓay ƴo mbew ziŋ ni ya. Wara le ke ya̧ na ɓay law in ké-e mgba ziŋ na mí Tempuki wɔk na ɓa nzuk a foyu hi̧ sa̧w wah ti̧h ɓa foyu.

⁶Tempuki ra, Ŋgerzah fer ku̧ tul wah gbɔh gbɔh ɓay nzuk-ya̧ na a ye Ŋgermbay Zezu hi̧ na ɓay náh ti̧h ɓa gun-ya̧ fe baah.

⁷Fe baah ké nah ƴo geŋu ra ɓa ɔkna ké na sew ke sew mí law wah te tulu kandɔk ké-e ŋga̧h sal inu ziŋ na ke lawsuki ye.

⁸Ɓay ra ƴo gelu gaŋ ɓa ketina. Mí-i yih ɓay mú ger tul ɓayawri ɓay hi̧ nzukri ké kan law tul Ŋgerzah kú hi̧ tul woyri nda pol ke fe laɓna a sukiri. A a̧w mí su pi, ti̧h suk hi̧ nzukri gbam pi.

⁹Dale mú ɗi-ɗih ke fáŋ sa̧w fe a kɔkuri pi ke kí̧ sa̧w zihri ké ɓa fe ndikpo pi. Mú ɗih ke fahɓayri ke turɓayri ké tul bolkusol mbete Ŋgerzah. Fe laɓna-awri ra na kpo̧k kaŋ, ti̧h suk ya pi.

¹⁰Nzuk ké ƴo gbur nzukri ke ɓay ké reh ɓoɗ le, mú kɔklɔ suk ye bɔk mbew, bɔk seɗe mí ke sa lah ya le, mú ten ni.

¹¹Mu tu-tu, sam nzuk a kandɔkaw sak tul ye si wɔrɔk, ke ɓa nzuk a suya-u, mí ke ya̧ salɓay hul kan tul ye ke mun.

¹²Gelke mi pih Artema mini Tikus si ta̧w wo le, mú takra ɓay gi ta̧w bi ké Nikopoli ké mi lek kerɓay bi ɓay kaɓ ri ɓil fewri ké mahful-si gahru tul mbih ta-a[1].

¹³Mú takra ɓay pih Zena nzuk goso fe tuna mbete bolkusol tusiɓa ke bɔh gahru ye Apolo hi̧ fe mbew ɓá poh niri ya.

¹⁴Su-su ɓay nzuk wahri ɓá tih ke ndá pol ke fe laɓna a sukiri ké ɓil pihna ké mah laɓu dale, kú kaɓ ndikpo ya.

¹⁵Nzukri gbam ké ƴo ziŋ mi ra ku vah mu. Mú vah nzukri ké yih ɓay wah kú-u mbu̧h ziŋ na mbew ke Ŋgermbay. Mi vah wuri gbam ke lawsuki Ŋgerzah ké ƴo ziŋ wuri.