Read Karang Mbete Filemoŋ 1 Bible Online

Mbete Filemoŋ 1 - Karang bible

Mbete Filemoŋ 1

¹A bi Pɔl ké mi na vul mgbal ɓay tul Mbay Zezu, a wah ke Timote a ye yi̧n wahri ɓil Ŋgermbay, nah vbeh mbete-ay hi̧ mu maŋlaw wah Filemoŋ a wo ké mu ɓa bɔh pihna wah.

²Nah vah mu, nah vah Afiya manah wahri ɓil Ŋgermbay, nah vah Arkiɓ bɔh ŋgermu wah, nah vah sa̧w in Ŋgermbay ké mbu̧h hani ɓil kerpuh wo pi.

³Nah vah wuri ke lawsuki ke ɗeŋ ké ur ké ta̧w baah Ŋgerzah, ké ur ké ta̧w Gaŋ tul feri riw a ye Ŋgermbay Zezu.

⁴Mi ƴo goŋ Ŋgerzah bi kpatara. Ɓil goŋna bi ra, mi ƴo ker ɓay si tul wo, mi ƴo el ke tumbɔl hi̧ ni,

⁵ɓayu ké mi ƴo lah ɓay law sana wo ke ɓay kanlaw wo tul Gaŋ tul feri riw a ye Zezu pi. Mi ƴo lah ɓay law sana ke kanlaw wo-aw ké ƴo laɓ pihna hi̧ sa̧w nzuk Ŋgerzahri pi.

⁶Mi ƴo goŋ Ŋgerzah ɓay ndɔk wo ké mu ƴo mbu̧h mbew ziŋ nzuk-kan law tul Ŋgermbayri ɓá ti̧h suk ke goso-tu fe laɓna a sukiri gbam. Suki ké nah ƴo keni ra mbu̧h na ziŋ Ŋgermbay.

⁷Gun Bah bi, law bi rih mi mbamba pi, law bi ziŋ ŋgerna mbamba pi, ɓay tul law sana wo-aw ɓay fe le, mu voh law sa̧w nzuk Ŋgerzahri le, mu el voh ra ɓáy.

⁸Kaŋaw mí ɓay sa̧w wah ké mbew ziŋ Ŋgermbay ra ful na ŋgah ɓay mí sɔk mu suki ké mu mah laɓu.

⁹Le ɓay law sana mí-i yih hew mu ma, a bi Pɔl ké mi ɓa ŋgernzuk mí aŋay mi na vul mgbal ɓay tul Mbay Zezu.

¹⁰Hewna bi ra mi ƴo hew mu ɓay tul gun bi-ay, a ye ké mi ti̧h ɓa bah ye ké ɓil vul mgbalay, a ye Onesim ra.

¹¹A ye ké lewsa̧ ke ɓa mgbal wo ké-e ti̧h zer ra, mí aŋay le, ke ti̧h na suk seɗe mbɔk, a wo pi, a bi pi.

¹²Mi pih ni el ma ta̧w wo, a ye ra ke ɓa law bi gaŋ.

¹³Mi yih ra mgba ni giri giri ma ta̧w bi ɓay ké ka-kah ɓaysuki hul Ŋgermbay ɓa sona wo ké mu hi̧ mi ké mi na vul mgbalay.

¹⁴Ɓay Onesim ra, su-su ɓay náh lah hani ɓay tul ye. Ɓay mí laɓ fe ke tul bi le, mi sa-a, mi sa ɓay hi̧ suki ké mi vbi mu laɓu ra ɓá ti̧h ɓa fe ké nzuk mgba mu ke ŋgerna ya, wara le ɓa fe ké law wo yih ma.

¹⁵Ko ya le sa̧w kéhr hani woiri ke Onesim ké laɓ sa̧wseh ndi̧-aw laɓ ɓay hi̧ ké el ƴo ziŋ mu kpatara kandɔk mgbal wo kaŋto ya,

¹⁶wara le ke kal mgbal ka-kal, ke ɓa nzuk yi̧n pi, ke ɓa gun sana pi. Ke na kandɔkaw ké ta̧w bi ra wa, ɓay laɓ ani ɓáy ké ta̧w wo ke ɓa gun sana fál a haymun pi, fál a Gaŋ tul feri riw pi, kaŋ ya le ?

¹⁷Kaŋaw ba, mu ko ɓahri, ndɔk wah mbu̧h mbew le, mú mgba ni ndɔk seɗe kandɔk ké mu mgba mi kaŋ.

¹⁸Ke laɓ fe-se law a hani ziŋ mu mini mu dih ni mbɔl kara mú ɓaŋ ɓayu kan tul bi ge.

¹⁹A bi Pɔl mí-i ik ndɔk bi tul ɓay mbɔlay. Nzak bi ta ɓah ɓay mbɔl a ɓoru ya, mu tu-tu le, a bi kara mbɔl bi na tul wo. Mbɔlu ɓa mun wo gaŋ. Mí keni-aw kara mi púh mbɔl wo-ay.

²⁰Ketina, gun Bah bi, mú hi̧ law bi rih mi ké nun wo ké nah ƴo ke Gaŋ tul feri riw. Mú voh law bi ké nah ƴo ke Ŋgermbay ge.

²¹Mi tu te-teh mbete ké mi vbeh hi̧ mu-ay, mu láɓ fe ké kal kerɓay bi-ay ka-kal gaŋ.

²²Ɓay a ɓoru mí na-ay : mú lek gel nam geŋ mi ɓayu ké mi ker ɓahri, tumbɔl góŋ Ŋgerzah woiri ra ku ɓay sel mi le, mi él si ta̧w woiri ɓáy.

²³Epafara ké na vul mgbal ziŋ mi ɓayu ké-e ƴo mbew ziŋ Ŋgermbay Zezu ra vah mu.

²⁴Kaŋ pi mí Marki, Arisitar, Demas, Luk a woyri bɔh pihna biri ku vah mu.

²⁵Mi vah wuri ke lawsuki Gaŋ tul feri riw a ye Ŋgermbay Zezu ké ƴo tem woiri.