Read Karang Mbete Ebereri 1 Bible Online

Mbete Ebereri 1 - Karang bible

Mbete Ebereri 1

¹Lewsa̧-aw Ŋgerzah ɓah sam ɓayri ɓoɗ ɓoɗ ɓa ŋgi̧-u hi̧ zih wah gun Izarayelri lah ke fulri ɓoɗ ɓoɗ. Ku lah ke nzak gun nzak pihna yeri.

²Mí sew a ɔh tɔru-ay dale, ke ɓah ɓay ke nzak gun nzuk mí hi̧ na, nah lah a ye mí Ŋgerzah mbi ni ɓa gun-ya̧ fe yeri riw, a ye mí gelri ke sewri gbam laɓ ke ndɔk ye,

³mun gun ra ndu̧-ndu̧y ɓa ndu̧yna riŋ ɗina Ŋgerzah, ke ɓa mun Ŋgerzah gaŋ, feri gbam ké nunmbam ke tusiɓa ra ƴo ɓay ŋgerna ɓay ɓahna ye. Ke hi̧ mun ye ɓa fe puhna ké lu suya nzukri, mí ke el si na ɓa ndɔk lakna Mbay a luki ké síɓa.

⁴Kandɔkaw mí riŋ ɗina ké gun ya̧ ké ta̧w bah ye ra ŋger mba riŋ ɗina tem nzak pihnari mba-mba.

⁵Bɔk mbew ye gel-ɓah ɓay kandɔkay hi̧ tem nzak pihna ta-a. Le gun ra mí ke ɓah hi̧ ni ɓahri : A wo mu ɓa gun bi. Ur ke guri-ay mu ɓa mi̧hri bi[1]. A bi mi ná ɓa bah wo, a wo ba, mu ná ɓa gun bi[2].

⁶Sew ké-e ɓaŋ gun pol kan sakra gunri ké tusiɓa le, ke ɓah ra ɓáy hi̧ tem nzak pihnari gbam ɓahri, kú dim ni[3].

⁷Mí a woyri tem nzak pihnari ba, ke ɓah ɓay si tul woyri ɓahri, ke laɓ niri ɓa gun-laɓ pihnari, mí ke ƴo pih niri ɓa kuna ye, ɓa hɔrɔ ye kaŋ[4].

⁸Mí gun ra ba, baah Ŋgerzah ɓah hi̧ ni ɓahri, a wo Ŋgerzah sew ke sew mu kaɓ tul arŋgaw-lak mbay, ka̧w-lak mbay ké na ndɔk wo mu kuŋ salɓay keni ɓa a ndaru.

⁹Ƴó tul sal in bi ɓa law sana wo, sáŋ bolkusol bi ba, ɓa fu̧yna wo. Sa̧wu mí-i fer num law rihna ku̧ tul wo mbi mu ɓa mbay ké sakra bɔh wori gbam[5].

¹⁰Ɓay a ɓoru mí na-ay, ke ɓahri : Gaŋ tul feri riw, a wo mú-u ti diŋ tusiɓa ke titilu da̧y, nunmbam ba, ɓa fe ké mu laɓ ke ndɔk wo.

¹¹Gbam ɓay zi-zi mí a wo mu ƴo ri. Nunmbam ke tusiɓa ɓay ti̧h ta̧w kandɔk gar kaŋ.

¹²Mu káh nunmbam ke tusiɓa, tusiɓa ke nunmbam ɓay sɔɓu kandɔk gar ké nzukri sɔɓ kaŋ, mí a wo ba, mu ƴo ri. Gbu̧h mbihmbam wo ta-a[6].

¹³Bɔk mbew ye gel-ɓah ɓayay ɓahri : Mú kaɓ ɓel bi. Mu ɓa ndɔk lakna bi, mi ƴo ɔh ŋgerna nzukbaa wori hi̧ kú ti̧h ɓa gel-ku̧ bɔk wo[7], ke ɓah kaŋ hi̧ tem nzak pihna ya.

¹⁴Tem nzak pihna Ŋgerzahri ra gbam ku ɓa gun-laɓ pihnari, kaŋ ya le ? Ke ƴo pih niri ɓay tul nzukri ké ƴo ya̧ ɔkna, ɔkna-u ɓa fe baah kú-u ziŋ.