Read Karang Mbete Ebereri 10 Bible Online

Mbete Ebereri 10 - Karang bible

Mbete Ebereri 10

¹Bolkusol Ŋgerzah ké Moyiz vbeh ke sewu-aw ra ɓa tem fe sukiri ké ƴo gina. Mbí bolkusol laɓ keni pihna ta ɓa mun fe sukiri-aw ya. Sew ke sew fe puhnari ké nzukri ƴo gi keni hi̧ Ŋgerzah fal hani fal hani mah hi̧ nzukuri-aw na ɓa nzuk pirmatul a suki ya.

²Ku ti̧h ra ɓa nzuk pirmatul a suki le, ku ɓay gi ke fe puhna ɓáy lo ? Ku ti̧h ra ɓa nzuk a suki gaŋ le, law woyri teh da pi. Law woyri ɓay ta laɓ ɓay kan tul woyri mba, kaŋ ya le wo ?

³Mí ketina le fe puhnari-aw ƴo dum law nzuk mbihmbam ke mbihmbam tul suya ye

⁴ɓayu ké sem nday mini sem guy mah lu suya ké tul nzuk ya.

⁵Sa̧wu mí gina Ŋgermbay ké tukala ra ke ɓah hi̧ Ŋgerzah ɓahri : Ɓa ra fe puhna mini fe hi̧na kara mu sa-a. Pa̧ymun mí mu laɓ hi̧ mi.

⁶Fe puhna ɓay lu ɓay ké tul nzukri mu sa ya̧ ya, fe puhna kú-u nzuh se kpɔlɔk kpɔlɔk hi̧ mu kara rih law wo ya pi.

⁷Bale ke ɓah hi̧ ni ɓahri : Mi ƴo-ay. Ŋgerzah bi wo mi ƴo ɓay laɓ fe ké mu yih ra kandɔk ɓayri ké ɓil mbete bolkusol ɓah si tul bi[31].

⁸Ɓay ké Ŋgermbay ɓah ra ɓahri se, fe puhna, fe hi̧na, fe puhna a se hɔrɔ kpɔlɔk kpɔlɔk, fe puhna ɓay lu suya, feri-aw gbam rih law Ŋgerzah ya, ke sa-a, mí fe puhnari-aw ra ba, ku gi keni kandɔk ké bolkusol sɔk.

⁹Bale Ŋgermbay Zezu ɓahri, mi ƴo-ay ɓay laɓ fe ké mu yih ra, mí ke lu pihna vul kani a titilu ké tusiɓa ra ma fal. Ke el hi̧ mun pihna-u laɓ ké vul kani a kpakpaŋu.

¹⁰Ke hi̧ mun ye ɓa fe puhna bɔk mbew hi̧ law wah pu ɓa nunu a Ŋgerzah kandɔk ké-e yih.

¹¹Kandɔkaw mí nzuk kaniri ké laɓ pihna ke bolkusol a titilu ƴo vul kani ƴo laɓ pihna woyri nam ke nam. Ku ƴo puh fe le, el puh ra ɓáy, pihna-u sɔɓ ya kpatara, mí mah lu suya wu̧m ya.

¹²A ye ba, ke si ke mun ye ɓa fe puhna bɔk mbew mí lu suya ké tul nzukri wu̧m bale, ke el na ɓa ndɔk lakna Ŋgerzah.

¹³Ke ƴo geŋ hi̧ Ŋgerzah ɓá mgba nzukbaa yeri mbew mbew gbam ɓa gel-ku̧ bɔk ye

¹⁴ɓayu ké ke fe puhna mbew mí ke lu ɓay wu̧m ké tul nzukri ké-e hi̧ law woyri pu ɓa nunu a Ŋgerzah.

¹⁵Mí Tem lawpuki kara te-teh ɓayu hi̧ na.

¹⁶Ke mbi ɓay ké Gaŋ tul feri riw ɓah pol ɓahri : Sal in a foyu ké mi ŋga̧h ziŋ niri mí na-ay : Ɓil namuri mi ndoh bolkusol bi ɓil kerɓay woyri, mi vbeh ɓay bi kan law woyri.

¹⁷Ke el ɓahri se, mi ta ker ɓay tul suya woyri mba, ku ƴo tul sal in a pol ya kara, suya woyri-aw mi ta ker ɓayu mba.

¹⁸Mí gel a a̧y ké suya lu ké tul nzukri dale, fe puhna ɓay lu suya ta mba.

¹⁹Kaŋ le yi̧n biri mahful-si gel ƴona Ŋgerzah na ŋgah hi̧ na ɓay sem Zezu, nah ƴo ka̧h ta̧w ye.

²⁰Sem ra hi̧ na ful-kal gar ké kuŋ gel ƴona Ŋgerzah ke gel ƴona nzukri wara. Mahfulu ɓa foyu, ɓa mun ye ké ƴo ri kpatara,

²¹mí nah ƴo wuri ke nzuk kani a luki ké ƴo ko tul gun Ŋgerzahri.

²²Le náh si wuri ta̧w Ŋgerzah ke law a puki ke kanlaw ké ɓar sa̧w ɓa kpuh-u ké tul Ŋgermbay. Lawu, sem gun mi̧h ku̧ ri hi̧ ɓay a pipiri-u ruklu law nzuku ya, mun ba, ke wɔk teh ke mbih law puki.

²³Suki ké ƴo geŋ na, ké ɓayu ƴo ti̧h ke nzak wah ra náh mgba wuri ma law giri giri ɓayu ké nzuk ké wahɓay ra ndɔk ye ɗɔr sal inu ya.

²⁴Náh ker ɓay tul haniri síɓa síɓa ɓay náh kpak haniri ke láɓ law sana, ɓay náh kpak haniri ke láɓ suki.

²⁵Nzuk a haniri ké sakra wah tih ke póŋ mbu̧h hani. Póŋ mbu̧h hani wah ɓá ta-a. Mí héw haniri ɓá ƴo ri ma. Kaŋaw mí náh si ma pol pol ké i ko namu-aw ƴo ka̧hna toŋ ɗih ya,

²⁶ɓayu ké nah tu wuri ketina da. Mí nah mbi tul toŋ laɓ suya gak le, fe puhna a ɓoru ɓay tul suya ta mba.

²⁷Wara le fe-se hȩkme ké ɓa salɓay a luki ke baw hɔrɔ ké ɓay duh nzukbaari mí toŋ.

²⁸Gelke nzuk inri seɗe mini say ɓah tehɓay tul nzuk in ké poŋ sal in ké Ŋgerzah hi̧ Moyiz vbeh ra le, ku ƴo i nzuku dan ker seh ye[32].

²⁹Nzuk a a̧y ké ko gun Ŋgerzah ɓa fe gel garu, ké ko sem ye ké ŋga̧h sal in a foyu mah nun ya dara mí ke sɔɓ fal hi̧ lawsuki ké Tempuki ƴo hi̧-u ra, sam koseh ye ɓay na ani ɓáy le ?

³⁰Ɓayu ké nah tu ni a ye ké-e ɓahri, dalbaa ɓa fe bi. A bi mí-i púh mbɔlu. Ke ɓah ra ɓáy ɓahri, Miƴori ɓay kuŋ salɓay tul nzuk yeri[33].

³¹Fe ké se hȩkme mbamba ɓa sam nzuk a a̧w ké toh ndɔk Ŋgerzah Ŋgɔhnzuk.

³²Í ker ɓay si tul nam woiri a pol sew ké gel tehna teh law woiri. Ke sewu-aw i su̧h law ɓil kosehri ɓoɗ ɓoɗ ké ɓil baw ŋgermu.

³³Ku far wuri ké gel daɓa, ku laɓ wuri koseh ké gel yi̧hna ké nun daɓari, nzukri ké ƴo ɓil sam koseh-awri, i mbu̧h ziŋ niri pi.

³⁴I yih tul mgbalri. Nzukri nah fe ziŋna woiri kara i ya̧ ɓayu ke law rihna. I tu-tu, i ƴo ke fe ziŋna a kpakpaŋu ké na ɓa ŋgɔh.

³⁵Mí kaŋaw le Ŋgerzah ké hi̧ na nah ƴo ta̧w ye ke selmun, í poŋ ya. Selmun ké nun ye ra ɓa fe ziŋna a luki gaŋ.

³⁶Mi ɓah kaŋ ɓayu ké aŋay le i ƴo tul su̧hlaw ra ya. I su̧h law dale, i ɓay mgba fe ké Ŋgerzah wahɓayu. Fe ké Ŋgerzah yih ra i poŋ ya.

³⁷Toŋ ndi̧ kaŋto hi̧ ni a ye ké-e ƴo gina ra ɓay ké ka̧h. Ke ta geŋ sal sal ya[34].

³⁸Nzuk ké ŋga̧h sal in ziŋ ni ɓa záh ye le, sa̧w ɔkna nzuku ɓa law mbew ké ɗɔr sal in ya, mí nzuk el ke mun ma fal le, law Miƴori rih tul nzuku ya[35].

³⁹Nah ta ɓa nzukri ké ƴo el ke mun ma fal ɓay zi-u ya. Wara le nah ɓa nzukri ké law wah te sa tul Ŋgermbay ké-e ya̧ na, mí nah ziŋ pa̧ymun a foyu.