Read Karang Mbete Ebereri 11 Bible Online

Mbete Ebereri 11 - Karang bible

Mbete Ebereri 11

¹Kanlaw ɓa fe ké ten munɓay suki ké law wah ƴo geŋu, ɓa fe ké sɔk tehɓay feri ké nah ko ke nun ya.

²Nzuk a lewsa̧ri, law woyri ké te sa tul Ŋgerzah mí te-teh ɓay woyri.

³Ɓay law wah ké te sa tul Ŋgerzah mí nah ya̧ ɓahri, ke titilu sa̧ fe mbew ta-a, mí Ŋgerzah ɓah ɓay lek keni feri gbam ɔh ke gelu gelu hi̧ fe-uri ti̧h.

⁴Ɓay law Abel[36] ké te sa tul Ŋgerzah mí ke dim Ŋgerzah ke fe puhna ké ndɔh mba nunu a Kayin. Fe puhna-aw[37] te-teh ɓay ye ɓahri se, ke ƴo mbew ziŋ Ŋgerzah. Ŋgerzah gaŋ mí te-teh ɓay sal in ké-e ŋga̧h ziŋ Abel ɓay tul dimna ye. Ke hu-hu kara fe puhna ye ƴo ɓah ɓay ɓáy.

⁵Ɓay law Hanok[38] ké te sa tul Ŋgerzah mí Ŋgerzah mbi ni ke nun ma ta̧w ye, hul i ni ya. Nzukri ziŋ hul ye ya ɓay fe le, Ŋgerzah mbi ni ke nun. Dara ké mbi ni ra le, ku te-teh ɓay ye ɓahri, ke rih law Ŋgerzah mbamba.

⁶Mí law wo te sa tul Ŋgerzah ya le, mu mah rih law Ŋgerzah ya pi ɓayu ké nzukri ké si ta̧w Ŋgerzah mah ɓay kú tu ɓahri, ke ƴo ri, ke ɓa nzuk-hi̧ kpaŋndɔk hi̧ nzukri ké nzah ni[39].

⁷Ɓay law Nuwe[40] ké te sa tul Ŋgerzah mí ke lah nzak Ŋgerzah ɓay mbih ké ƴo gina ké nzuk ko bɔk mbew ya. Ke ɗiŋ tul hi̧ Ŋgerzah, mí ke ɓar vul tul mbih ya̧ keni nzuk kerpuh yeri. Vul tul mbih-aw sɔk kanlaw ye mí ke ten keni suya nzuk tukalari hi̧ salɓay hul mgba tul woyri. A ye ba, ke ti̧h ɓa gun-ya̧ fe baah Ŋgerzah ké ɓa sal in ké ŋga̧h ni ziŋ Ŋgerzah ɓay law ye ké te sa tul Ŋgerzah.

⁸Ɓay law Abaraham[41] ké te sa tul Ŋgerzah mí ke lah nzak Ŋgerzah, ke ur tɔr ma tusiɓa ké Ŋgerzah lek ɓay ké kaɓ ri. Tɔrna ye-aw ke tu tusiɓa a suŋ mí ke sí ma mari ya ɓáy.

⁹Ɓay law ye ké te sa tul Ŋgerzah mí ke kaɓ ɓa nzuk a gi-u ké tusiɓa ké Ŋgerzah wahɓay hi̧ ni ra. Ke na vul a pɔru. Gun ye Isak[42] ke gun zih ye Zakoɓ[43] kara na vul a pɔru pi, a woyri kú-u ɓa gun-ya̧ fe wahɓayu ziŋ ni.

¹⁰Ke na vul a pɔru ɓayu ké-e ƴo geŋ puh a a̧y ké diŋu kpu-kpuh. Ŋgerzah mí ɓa nzuk goso-u, ke ɓa nzuk mboh-u.

¹¹Ɓay law Sara ké te sa tul Ŋgerzah mí ké-e ɓa tuh, ke kpɔ-kpɔkrɔ kara ke ziŋ ful-mbuŋ gun kandɔk ké-e ko nzuk wahɓay ra ɓa nzuk ƴo tul ɓay ye[44].

¹²Sa̧wu mí ké tul nzuk mbew ké mun ye kpɔkrɔ mah hul ra, ke mbuŋ gun ɓa mi̧hri. Sa̧w ye ŋgi̧ eŋ ŋgi̧na gunwu̧y nunmbamri, ŋgi̧na-u mah ki̧na ya eŋ ŋgi̧na sikɔkre ɓel mbih kaŋ.

¹³Nzukri ké kan law sa tul Ŋgerzah-aw gbam woyri ku hu dan ya̧ fe wahɓay ra. Ku duh tul ko fe-u ɓa ɗih-u. Wahɓayu laɓ hi̧ niri ya ɓáy kara ku mgba ɓayu ndɔk seɗe ma law woyri, mí ku ɓahri se : « Nah ɓa gahruri, nah ɓa nzuk a gi-uri ké tusiɓa. »

¹⁴Ɓay ɓahna nzukri ra sɔk te-teh ɓahri se, ku ƴo ƴah sa̧w puh kaɓna a ɓoru.

¹⁵Mí ku ker ra si tul sa̧w puh kú-u ti̧h ké ri le, mahful él si ri ɓay ƴo ri.

¹⁶Le ku taw sa̧w puh a kpakpaŋu sɔk ɓahri, sa̧w puh záh woyri Ŋgerzah ké nunmbam. Sa̧wu mí ɓay ɗina kú-u ɗi Ŋgerzah ɓa záh woyri, su̧hru-u se Ŋgerzah ya. Ke lek puh geŋ niri da.

¹⁷Ɓay law Abaraham ké te sa tul Ŋgerzah mí ke hi̧ gun ye Isak ɓa fe puhna[45]. Hí̧ gun ye ké mbew yaŋ ra ɓa fe ké leh law ye, a ye ké-e ya̧ wahɓayri ndɔk seɗe ma law,

¹⁸a ye ké Ŋgerzah ɓah hi̧ ni ɓahri, sa̧w mi̧hri ké mi wahɓay hi̧ mu ɓa Isak[46].

¹⁹Abaraham ɓah ma law ɓahri se, ke i gun ye gaŋ kara Ŋgerzah ƴo ke huhrumun-tom ni. Le ke ɓay ten gun ye ra ke puh záh. Fe laɓna Abaraham ra sɔk ketina ké ƴo gina.

²⁰Ɓay law Isak ké te sa tul Ŋgerzah mí ke lu mgbɔkɔ ɓay tul feri ké ƴo gina hi̧ gun yeri Zakoɓ ke Esaw[47].

²¹Ɓay law Zakoɓ ké te sa tul Ŋgerzah mí seh ké-e na nun hul ra ke lu mgbɔkɔ hi̧ gun zih yeri ké Zezeɓ mbuŋ[48]. Mí ke tuŋ ka̧w ye, ke ɗiŋ tulu dim Ŋgerzah[49].

²²Ɓay law Zezeɓ ké te sa tul Ŋgerzah mí nam ye ƴo ɔhna bale, ke ɓah ɓay sew ké gun Izarayelri ɓay ti̧h ke Eziɓte. Ke ɓah hi̧ niri ɓahri se, kú suk huhru ye ti̧h keni si gɔr ma tusiɓa ké Ŋgerzah wahɓayu[50].

²³Ɓay law bah Moyiz ke law mah ye ké te sa tul Ŋgerzah mí ku mu̧h ni few say fal mbuŋna. Ku ko gun ra ɓa gun pol tehna, mí bolkusol ké Faroŋ mbay Eziɓte hi̧ ɓay i gun wo̧rori ké ɓa mi̧hri gun Izarayelri-aw, hȩkme-mba nzak bolkusolu se nzuk-mbuŋ Moyizri ya[51].

²⁴Moyiz ra gun Faroŋ a wu̧yu hɔl ni, ke hu̧h el ti̧h ɓa nzuk a luki. Mí ɓay law ye ké te sa tul Ŋgerzah, ke poŋ riŋ ɗina gun puh Faroŋ.

²⁵Ke sa su̧ tukala ɓil suya ké ɓay ka-kal ya. Ke hi̧ tul ye ɓay ko seh ziŋ sa̧wnzuk Ŋgerzah. A a̧w mí Moyiz ko su ké nun ye.

²⁶Ke ɓahri se, fe-se su̧hru ké laɓ Ŋgermbay ɓa baw fe ziŋna ké ŋgi̧ mba fe ziŋna tusiɓa Eziɓte. Ke sɔɓ nun ye ma tul kpaŋndɔk ké ƴo gina.

²⁷Ɓay law ye ké te sa tul Ŋgerzah mí ke ti̧h ke Eziɓte. Law fa̧hna mbay Faroŋ se ni hȩkme ya[52]. Law ye ɓar sa̧w ɓa kpuh-u kandɔk ké-e ƴo ko nzuk ké nzukri ko ke nun ya.

²⁸Ɓay law ye ké te sa tul Ŋgerzah mí suŋ ké Hul gi i gun polri ké Eziɓte ra ke hi̧ gun Izarayelri vbeh guy buma[53], mí ku nu̧h semu ké nzak vulri gboh Hul ríh kerpuh gun Izarayelri[54].

²⁹Ɓay law ye ke law gun Izarayelri ké te sa tul Ŋgerzah mí ku kal ké haŋsekle Mahmbih a Si̧h-u kandɔk nzukri ké si sina ké tusiɓa a ho̧ku, mí soze Eziɓteri dih fal woyri bale, mbih kal niri ndu̧y[55].

³⁰Ɓay law Zozuwe ke law gun Izarayelri ké te sa tul Ŋgerzah mí ku si sina ɗoŋ fal mahol puh Zeriko bɔk mbew nam mbew ka̧h nam toŋndɔk say bale, mahol ké ɗoŋ puh-aw dir wuruk[56].

³¹Rahaɓ wu̧y nunpuki ké Zeriko-aw, ke ya̧ gun Izarayelri ké gi hekre puh ɓay laɓ ŋgermu ra ndɔk seɗe. Ɓay law ye ké te sa tul Ŋgerzah mí seh ké mahol dir kú-u i nzuk-kpuh tulri ké Zeriko ra, ku i ni ya.

³²Ɓay fe mí-i ɓah-u ɓáy le ? Ɓay mí ndazi ɓay nzuk a ɓoruri le, sa̧wseh mah ya, kandɔk ɓay Zedeyoŋ, Barak, Samsoŋ, Zefte dara mí ɓay Daviɗ ke Samuyel ke gun nzak pihna Ŋgerzahri.

³³Ɓay law woyri ké te sa tul Ŋgerzah mí ku haw ŋgermu tul puh lakna a ɓoruri, ku si siŋ sina ké hi̧ sal in Ŋgerzah laɓ pihna, ku ya̧ fe wahɓayri, ku tuh nzak mbakiri,

³⁴ku rim hɔrɔ ké se bilam bilam, ku ti̧h ke hul mahwu̧y, ku ziŋ ŋgerna ɓil ta̧hma woyri, ku ti̧h ɓa nzuk goso ŋgermu, ku ni̧h soze sa̧wnzuk a ɓoruri.

³⁵Wu̧yri ké nzuk woyri hu le, hul woyri el kaɓ ke nun. Nzuk-kan law a ɓoruri, ku ɗur niri mah hul kara ku hi̧ nzukri ten niri ke ɓil koseh-aw ya. Pa̧ymun a foyu ra su mba kaɓna woyri ké tukala.

³⁶Nzuk a ɓoruri ɓáy ku sak niri gbaw gbaw, ku vboŋ niri, ku ŋga̧h niri, ku mbih niri ké vul mgbal.

³⁷Nzuk a ɓoruri ɓáy ku vbuk niri ke kasaw i niri, ku kuŋ niri ke haŋsekle, ku i niri ke mahwu̧y. Nzuk a ɓoruri fe ké mah hi̧ niri kaɓ tukala ta mba, mí ku ndoh ho̧ko sami ya le, ho̧ko guy ɓa gar, ɓay koseh ké nzuk tukalari laɓ niri.

³⁸Nzukri-aw, tukala mah kaɓna woyri ya, ku ha̧rma ma gini ma sa̧ ɓil lawkɔr, tul kasaw, tah kasaw ke hohri ké tusiɓa pi.

³⁹Gbam woyri-aw law woyri ké te sa tul Ŋgerzah mí te-teh ɓay woyri. Suki ké Ŋgerzah wahɓayu ra ku ya̧ ke sew kaɓna woyri ya,

⁴⁰ɓayu ké Ŋgerzah lek suki a ndɔh mbamba-u pol sa̧ ɓay tul wah, mí suki-aw ké-e lek ɓay tul gun yeri ta laɓ ɔh poŋ na ya[57].