Read Karang Mbete Ebereri 12 Bible Online

Mbete Ebereri 12 - Karang bible

Mbete Ebereri 12

¹A wah ké daɓa nzuk-kan law a lewsa̧ri ɓa ŋgi̧-u ƴo ɗoŋ na gbuk gbuk, ku ɓa nzuk-teh ɓay dale, a wah ké nah poŋ suknari gbam ké yih na vbu siɓa, ké nah ɗɔr fe suya-u ké kahra na vbu siɓa, náh ɗu-ɗukna ke ŋgermu ké na pol wah-ay ke su̧hlaw wara.

²Nah ko kona wori wori ya, nun wah na ka̧ah tul Zezu ké-e ɓa nzuk sa̧w kanlaw, ké a ye ke si keni ka̧h gbu̧h-u. Ke ko kona siŋriŋ tul law rihna ké ƴo geŋ ni, mí ke su̧h law, ke ko su̧hru hul ké tul kpuh vbatay ɓa fe ya. Aŋay ba, ke kaɓ ɓel arŋgaw Ŋgerzah ɓa ndɔk lakna ye.

³Í ker ɓay si tul su̧hlaw ye rɔkɔ mun woiri ɓá voh hi̧ í ta̧h. Ke su̧h law ké ndɔk nzuk suyari ké lek ɓay ndih ni.

⁴Ɓil ŋgermu woiri ke Suya ra i ɓer gi̧w ka̧h hul ya ɓáy.

⁵Mí hewna ké Gaŋ tul feri riw ɓah hi̧ wuri gunri i yȩ-yȩkre, ke ɓahri : Gun bi, mi ndar mu le, mú ko ndarna-u ɓa kɔk fe ya. Mi zɔm mu le, mú ta̧h mun wo ya,

⁶ɓayu ké Gaŋ tul feri riw ndar nzukri ké-e sa niri, ke zɔr nzukri ké-e tu niri ɓa gun yeri ke ndeh[58]

⁷ɓay hi̧ í hu̧h ɓa suki. Le í su̧h law ge. Ŋgerzah mbi wuri ɓa gun ye. Uwa, gun a suŋ gaŋ mí bah ye ndar ni ya lo ?

⁸I ɓa gun yeri le, ke ƴo ndar wuri. Vba̧na toh tul woiri ya dale, i ɓa gun ndi̧w mbana, i ɓa gun ye ya.

⁹Nah ƴo wuri ke bah-mbuŋ nari ɓoɗ ɓoɗ ké tusiɓa-ay. Ku ndar na mí nah hȩk niri wa, bah wah ké hi̧ tem wah ɔ-ɔkna ba, nah ta ɗiŋ tul hi̧ ni ya le ?

¹⁰A woyri-aw ku ndar na nam ndi̧ kaŋto mah ke kerɓay woyri kú-u ko su-su, mí Ŋgerzah ba, ndar na ɓay suki wah hi̧ law wah pu mah ke law ye.

¹¹Ndarnari gbam ké ziŋ gunri ta ɓa fe law rihna ya. Le ɓa fe-sa̧h law, mí falu bale, el gi ke ɗeŋ ɓa lehna-u. Nzukri ké ruh mun woyri ké fal ndarna-aw, kpaŋndɔku ɓa ƴó ke Ŋgerzah ɓa záh woyri.

¹²Sa̧wu mí ndɔk woiri ké hu yɔh ra í el hi̧ ndɔku ŋgerna, nzaktuh woiri ké si sina gburuk gburuk ra í el hi̧ nzaktuh-u ŋgerna[59].

¹³Í lek mahful ɓá mah hani ɓay hi̧ bɔk nzuk kpereri ɓá fikri ya. Le bɔku ɓá el kpuh ma[60].

¹⁴Í ruh mun ɓay hi̧ ɗeŋ ɓá ƴo sakra woiri ke nzukri gbam, í ruh mun ɓay hi̧ law woiri ɓá pu ɓa nunu a Ŋgerzah pi. Kaŋ ya le i ɓay ta ko nun Gaŋ tul feri riw ya.

¹⁵Í ru̧ ke mun woiri rɔkɔ lawsuki Ŋgerzah ɓá poh wuri. Ko-ko í hi̧ sa̧w fe a zuŋu ké ɓa pom ɓá ƴo sakra woiri ɓay hi̧ law daɓa nzukri ɓá sih keni.

¹⁶Ko-ko nzuk mbew ké sakra woiri ɓá laɓ nunpuki mini ɓá ko ɓay Ŋgerzah ɓa kɔk fe kandɔk Esaw ké kom ŋgerna gun pol ye ɓay fe su̧na ɓil ye[61].

¹⁷Ɓay Esaw ra, a woiri i tu-tu. Bol falu-aw ke el yih ɓay mgbɔkɔ ké Ŋgerzah lu ku̧ tul bah ye ra, mí ke ziŋ mgbɔkɔ-u ké ta̧w bah ye ya, Ŋgerzah poŋ ni kan kala. Ke el goŋ law vohna ké ta̧w bah ye ke mbihnun kara fe mbew ké-e ziŋ ta-a[62].

¹⁸Í ruh mun ɓayu ké ta ɓa kasaw Sinay mí i gi bɔku ya. Nzuk a lewsa̧ri ke sew Moyiz gi bɔk kasaw Sinay, kasaw ké nzuk ko-ko, ké hɔrɔ se bilam bilam, ké gel sih nduŋ, ké tirima ɓa zir, ké kuna a bawu ku, ké baw ti̧w mgbe, ké kusol Ŋgerzah mgbe.

¹⁹Nzukri ké lah tiri kusolaw ku vuh ɓahri, kusolu ɓá ɓah ɓay a ɓoru hi̧ niri mba,

²⁰ɓayu ké bakɓayay kal ŋgerna woyri ka-kal, kasaw ké nzuk ko-ko ra mí nzuk ɓá za ya. Nzuk ké za le, ku vbuk ni ke kasaw i ni, nay kara kaŋ pi.

²¹Fe kona ké ƴo kalna-aw se hȩkme mbamba, mí Moyiz ɓahri : Law bi lu-lu, mun bi to-to[63].

²²Mí a woiri ba, í ruh mun ɓay fe le, i gi tul kasaw Siyoŋ, i gi puh kaɓna Ŋgerzah Ŋgɔhnzuk. Puh-u ɓa Zurusalem a nunmbam, i gi puh ké daɓa tem nzak pihnari ƴo laɓ mun rihna ti̧hmbih, tul woyri kal fe ki̧na sɔɗ sɔɗ boh gel sɔɗ sɔɗ boh (1.000.000) ka-kal mí el ka-kal ra ɓáy.

²³I gi puh ké sa̧w in Ŋgermbay ƴo ri, a woyri ku ɓa gun polri. Riŋ woyri vbeh na nunmbam vbe-vbeh. I gi ta̧w Ŋgerzah nzuk-kuŋ salɓay tul feri gbam, i gi puh ké nzuk a lewsa̧ri ƴo ri, a woyri ku tu Ŋgerzah ɓa záh woyri ke sew kaɓna woyri ké tukala,

²⁴i gi ta̧w Zezu nzuk-ƴo haŋsekle nzukri ke Ŋgerzah ɓay sal in a foyu, i gi gel ƴona Ŋgerzah ké sem Zezu mi̧h ku̧ ri[64] mí ƴo ɓah ɓay ɓa teh-u kal sem Abel ka-kal.

²⁵Í ko tul woiri ger rɔkɔ í saŋ ni a ye nzuk ké ƴo ɓah ɓay hi̧ wuri. Nzukri a sew Moyiz ké sa lah bakɓay Ŋgerzah ké tusiɓa-ay ya ra ku ti̧h ɓil vba̧na ya pi. A wah nzukri ké sew sal in a foyu-ay ba, nah sɔɓ fal hi̧ Ŋgerzah nzuk nunmbam le, laɓ ani mí nah tí̧h ɓil vba̧na ɓáy le wo ?

²⁶A ye ra kusol ye laŋ tusiɓa yik yik ke sewu-aw. Aŋay ba, ke el wahɓay ɓahri se, mi láŋ tusiɓa kaŋto ya, wara le nunmbam pi mi láŋ bɔk mbew ɓáy[65].

²⁷Láŋ bɔk mbew ɓáy ra ƴo sɔk téh feri ké mah kaɓ kpatara ya ɓay zi-u poŋ fe a a̧yri ké mah laŋna ya ƴo.

²⁸Kandɔk ké nah ya̧ wuri puh lakna Ŋgerzah ké ɓay ƴo kpatara dale, náh el ke tumbɔl hi̧ Ŋgerzah, náh dim ni keni ɓa sam fe puhna ké-e ƴo ya̧ ke law rihna, náh dim ni ke hȩkna pi ke law tona pi,

²⁹ɓayu ké Ŋgerzah wah ra ɓa hɔrɔ ké se fe kpɔlɔk kpɔlɔk[66].