Read Karang Mbete Ebereri 13 Bible Online

Mbete Ebereri 13 - Karang bible

Mbete Ebereri 13

¹Law in ɓá ƴo sakra woiri.

²Í yȩkre mgba gahruri ya. Ɓayu ké nzuk a haniri mgba tem nzak pihnari gahru dan tu-u.

³Í ker ɓay si tul nzukri ké na vul mgbal eŋ kandɔk a woiri kara i na vul mgbal ziŋ niri pi. A woyri ra, nzukri ƴo laɓ niri koseh, í ker si tul woyri kandɔk a woiri kara i ƴo ziŋ niri ɓa mun mbew pi.

⁴Yá̧ hani wu̧y ke wo̧ro ɓa fe ké mah hȩkna. Hih nam woyri ta ɓa fe ké rɔɓlɔ ke ȩm ya ɓayu ké nzuk-laɓ nunpukiri ke nzuk-mbi wu̧y mbaŋ woyri, Ŋgerzah ɓay kuŋ salɓay ku̧ tul woyri.

⁵Káɓ tukala woiri na ɓay ɗaka lari ya, ɓa fe ké law woiri rih wuri tul fe ké i ƴo keni ɓayu ké-e ɓahri : Mi ta yȩkre mu ya pi, mi ta poŋ mu tul mun wo ya pi[67].

⁶Kaŋ mí nah ɓah nzak wah ɓa teh-u ɓahri, Gaŋ tul feri riw ɓa nzuk-so mi. Mi ta laɓ hȩkme ya. Nzuk pirmatul ɓay laɓ fe mí ziŋ mi lo ?

⁷Mi dum law woiri si tul nzukri ké nda pol woiri, ku sɔk wuri ɓay Ŋgerzah. Siŋ sina woyri ke kaɓna woyri ka̧h ɔh tɔr nam woyri, i ko ɓa teh-u, í ndɔl kanlaw woyri-aw.

⁸Ŋgermbay Zezu ra sɔ-sɔɓna ya, ke ƴo ri kelew, guri kara pi. Ke ƴo ri sew ke sew ɓa ŋgɔh.

⁹Í poŋ ful hi̧ fe firma a kalari ɓoɗ ɓoɗ ɓá kɔklɔ wuri par par ya ɓayu ké su-su ɓay hi̧ lawsuki Ŋgerzah ɓá ŋga̧h law woiri ma. Ta ɓa fe su̧na mí ŋga̧h na ziŋ Ŋgerzah ya. Kerɓay fe su̧na ké nzukri ƴo tulu ti̧h niri suk ya.

¹⁰A wah ké ŋgernzuk kani wah ɓa Zezu, nah ƴo wuri ke fe su̧na ké gel fe puhna nunu a wah ké nunmbam. Nzuk kaniri ké ƴo laɓ pihna vul kani Ŋgerzah a tusiɓa ra ku ta ke ful-su̧ fe ké gel fe puhna wah ya[68],

¹¹ɓayu ké nam ké gun Izarayelri si ke sem fe hɔlnari ɓay lu salɓay ké tul woyri le, ŋgernzuk kani ya̧ sem fe hɔlnari si keni gel ƴona Ŋgerzah bɔk mbew ɓil mbihmbam mbew, mí ku nzuh mun nayuri hi̧ se hɔrɔ kpɔlɔk kpɔlɔk ké fal puh Zurusalem[69].

¹²Sa̧wu mí Zezu kara ko seh ké fal puh-u-aw hi̧ law nzuk yeri pu ke sem ye.

¹³Dale náh ti̧h wuri ma ta̧w ye ké fal puh si ya̧ fe-se su̧hru ké ziŋ ni[70] kan tul wah pi,

¹⁴ɓayu ké puh wah ké ɓay ƴo kpatara ta tusiɓa ya, wara le puh a nunmbam ké ƴo gina mí nah ƴo tawu.

¹⁵Náh kal wuri ké ta̧w Zezu kpatara ke fe puhna hi̧ Ŋgerzah. Fe puhna ra ɓa pirna, sɔk ɓahri, nzak wah ƴo ɓah ketina ye.

¹⁶Dale í yȩkre láɓ suki ya, í yȩkre mbú̧h haniri ke law in ya, ɓayu ké sam fe puhna a kandɔkaw mí Ŋgerzah ya̧ ke law rihna ya̧-ya̧.

¹⁷Í ya̧ ɓay nzukri ké nda pol woiri, í te suk ma ta̧w woyri ɓayu ké ku kaɓ keh ke nzakbɔk ɓay tul woiri. Ku ɓay ki̧ fal pihna woyri hi̧ Ŋgerzah. Kaŋ mí í hi̧ kú laɓ pihna-aw ke law rihna dan sú̧ sel ɓilu. Ku su̧ sel le, ta ti̧h suk nzuk mbew ya.

¹⁸Í goŋ Ŋgerzah ɓay tul wah ɓayu ké nah tu ɓahri, law wah te-teh, nah yih si siŋ sina a suki ɓil feri gbam.

¹⁹Mi hew wuri le, el hew ra ɓáy, í goŋ Ŋgerzah tul bi ɓay mí ziŋ ful él si ta̧w woiri ɓa gah-u.

²⁰Ŋgerzah nzuk sa̧w ɗeŋ ké-e ten nzuk-hɔl sami a ŋgeru ké sakra hulri, a ye Gaŋ wah Zezu, ké-e ten ni ɓay sem ye ké ŋga̧h sal in sew ke sew ɓa ŋgɔh, ké-e ƴo kal ké ta̧w Ŋgermbay Zezu ƴo laɓ pihna ké ta̧w wah ké ndɔh ké nun ye Ŋgerzah, ɓá ŋger ndɔk woiri ɓay í laɓ fe sukiri gbam ɓo í laɓ fe ké-e yih, riŋ ɗina ɓa nzuku a ye sew ke sew, gelu munu.

²²Kandɔkaw mí yi̧n biri, mi ƴo hew wuri, í ik law tul ɓayri ké mi hew wuri keni-aw ɓayu ké mi vbeh ɓay ɓa peh-u hi̧ wuri ya.

²³Mi yih ɓay i tu ɓahri, yi̧n wahri Timote ra ku sel ni da. Ke ka̧h ta̧w bi ɓa gah-u le, nah sí ke hani ɓay ko wuri.

²⁴Í vah sa̧w nzuk Ŋgerzahri ke nzukri ké nda pol woiri, gbam í vah niri. Yi̧n wahri ké Itali vah wuri.

²⁵Mi vah wuri ke lawsuki ké ƴo ziŋ wuri gbam.