Read Karang Mbete Ebereri 2 Bible Online

Mbete Ebereri 2 - Karang bible

Mbete Ebereri 2

¹Sa̧wu mí na ra ani ani gaŋ kara náh hi̧ tul wah ɓay lah ɓay ké Ŋgerzah ɓah hi̧ na ke kusol gun ra. Mah ɓay náh si keni ma pol pol rɔkɔ náh reh ful.

²Lewsa̧ Ŋgerzah hi̧ tem nzak pihnari ŋga̧h bolkusol ye ziŋ zih wahri. Nzuk mba nzak ɓay mbew mini poŋ ɓay mbew kal le, salɓayu ƴo toh tul ye.

³A wah ba, nah poŋ ɓay ɔkna ke fal ndɔk dale, nah tí̧h ɓil salɓay hul ani ɓáy le wo ? Ɓay ɔkna wah ra ŋge-ŋger ɓa ɓay ké Ŋgerzah ŋga̧h ziŋ na, mí nah lah ké nzak nzukri ké ya̧ ké ta̧w Gaŋ tul feri riw.

⁴Ŋgerzah te-teh ɓay ɔkna-u ke fe saŋri ké sɔk ɓayu, ke teh ɓayu ke fe-se hȩkmeri dara mí ke teh ɓayu ke ŋgernari ɓoɗ ɓoɗ ké Tempuki wal hi̧ nzukri kandɔk ké-e yih.

⁵Kandɔkaw Ŋgerzah ɓaŋ tusiɓa a foyu ké ƴo gina hi̧ tem nzak pihnari ko tulu ya. Ɓay ra nah ɓahri, tusiɓa a foyu ra ke hi̧ nzuk pirmatul ko tulu.

⁶Mí nzuk a hani te-teh ɓay ɓil gel ki̧na ɓahri : Nzuk pirmatul ké ɓay pu-puŋ ɓa fe gaŋ mí mu ko kona ma tul ye le ? Nzuk pirmatul ɓa fe gaŋ mí mu ɗer gi ko ni le ?

⁷Mu hi̧ tem nzak pihnari ɓa ŋgereri ƴo tul ye sew ndi̧. Mí mu el hi̧ riŋ ɗina mgbe ké tul ye, mu mbar ni ke gay mbay.

⁸Feri gbam mu ku̧ ndɔk ye[8]. Kandɔk ké feri gbam na ndɔk ye ra, fe mbew ké-e ɓa mbay tulu ya ta-a. Wara le nah ko lák mbay ye tul feri gbam ke nun ya ɓáy.

⁹Mí nah ko a ye Zezu, ke ko seh hul mí tem nzak pihnari ɓa ŋgereri ké tul ye sew ndi̧, nah el ko ni ke riŋ ɗina ké mgbe tul ye, ke gay mbay ké mbar ni ɓa lawsuki Ŋgerzah ɓay tul nzukri gbam mí ke poŋ mun ye ko seh hul hi̧ ke ziŋ hul keni.

¹⁰Ɓayu ké a ye ké feri gbam ƴo ɓay tul ye, ké feri gbam laɓ ke ndɔk ye, kaŋaw mí si ke gelu gaŋ, Ŋgerzah hi̧ Zezu ŋger ɔh ɓa suki ke koseh ké ziŋ ni-aw a ye ke ɓa nzuk sa̧w ɔkna daɓa gunri mí ke el fa̧h niri rih ɓil riŋ ɗina ye.

¹¹Ɓayu ké a ye ké-e hi̧ law nzukri pu ɓa nunu a Ŋgerzah mí nzukri ké-e hi̧ law woyri pu ɓa nunu a Ŋgerzah ra, sa̧w záh nzukuri mbew ziŋ ni. Sa̧wu mí ɓay ɗi niri ɓa yi̧n yeri ra su̧hru-u se ni ya.

¹²Ke ɓahri : Mi dim riŋ wo Ŋgerzah hi̧ yi̧n biri lah, mi ɗi siŋ loŋ riŋ wo ké gel mbu̧h hani wah[9].

¹³Ke ɓah ra ɓáy : Law bi te sa tul Ŋgerzah. Ɓay ra ɓáy : Mi ƴo-ay ke gunri ké Ŋgerzah hi̧ mi mbɔk[10].

¹⁴Kaŋaw ba gunri-aw ɓa nzuk pirmatul ké ƴo ke sem ke mun hay a ye kara ke ti̧h ɓa nzuk pirmatul ziŋ niri dale, ke hu hul, mí hul ye-aw ke ɔh ŋgerna mbay záh tukala ké ƴo laɓ ɓay hul kan tul nzukri,

¹⁵mí ke sel nzuk a a̧yri ké hȩkme hul mgba niri ɓa mgbal ke sew kaɓna woyri ké tukala.

¹⁶Ɓayu ké-e gi ɓay so tem nzak pihnari ya wara le, ɓa ketina, ɓay tul mi̧hri zih wah Abaraham gaŋ mí ke gi ɓay so niri.

¹⁷Ɓayu mí na ani ani gaŋ kara ke ba niri ɓa nzuk pirmatul ba-ba, mí ke ti̧h ɓa yi̧n woyri hi̧ ke na ɓa ŋgernzuk kani woyri ké ƴo tul mgba in pi, ké ƴo tul sal in pi. Le ke ƴo pol Ŋgerzah mí ke ƴo lu salɓay ké tul sa̧wnzuk ye.

¹⁸Ɓayu ké-e ɓa nzuk pirmatul ra mí fe-leh law ziŋ ni, ke ko seh dale, ke mah so gbɔrɔ nzukri ké fe-leh law ziŋ niri.