Read Karang Mbete Ebereri 3 Bible Online

Mbete Ebereri 3 - Karang bible

Mbete Ebereri 3

¹Kandɔkaw mí yi̧n biri a woiri ké i ɓa sa̧wnzuk Ŋgerzah, ké riŋ woiri vbeh ké sakra riŋ yi̧nri ké vbeh ké nunmbam ra, í ker ɓay tul Zezu. Nzak wah ɓah ketina ye ɓahri, ke ɓa gun nzak pihna Ŋgerzah, ke ɓa ŋgernzuk kani wah.

²Ŋgerzah mbi ni ko tul nzukri ké a ye Ŋgerzah ƴo haŋsekle woyri, nzukuri ɓa kerpuh Ŋgerzah. A ye ra ke ƴo mbew ziŋ Ŋgerzah kandɔk Moyiz ké ƴo mbew ziŋ Ŋgerzah kaŋ. Moyiz ra Ŋgerzah hi̧ ni ko tul nzukri ké a ye ke ƴo haŋsekle woyri, nzukuri-aw ɓa kerpuh ye.

³Í ker ɓay tul Zezu kandɔk ké riŋ ɗina ye mba riŋ ɗina Moyiz mba-mba, ɓayu ké nzukri dim nzuk-ɗeh puh mba ɓil kerpuh mba-mba.

⁴Kerpuh a suŋ suŋ gbam nzuk laɓu ƴo ri, mí feri gbam ba, nzuk laɓu ɓa Ŋgerzah.

⁵Moyiz ra ko tul kerpuh Ŋgerzah ke law mbew ɓa gun-laɓ pihna hi̧ ni. Ke ƴo sɔk tehɓayri ké Nzuk puh ɓay ɓah-u.

⁶Ŋgermbay ba, ɓa gun ké ƴo tul gunri ké ɓil kerpuh Ŋgerzah. A wah mí nah ɓa kerpuh ye. Nah mgba ketina ye ke selmun, nah mgba suki ké nah vba̧ haŋ wah ƴo geŋu ɓa kpuh-u le, nah ɓa kerpuh ye.

⁷Sa̧wu mí mgbá ɓayu ɓa kpuh-u ra si mbew ke ɓay ké Tempuki ɓah-ay. Guri ké i lah kusol ye le,

⁸í kpuh law woiri kandɔk zih woiri ké kpuh law woyri ke sew Moyiz ra ya. Ku ƴo zɔr law bi Ŋgerzah ɓil lawkɔr, namawri ku ƴo fah mi.

⁹Zih woiri-aw ko fe saŋri ké mi toŋ laɓu mbihmbam bon niŋ gaŋ kara ku ƴo fah mi.

¹⁰Sa̧wu mí law bi fa̧h tul nzuk a sewu-awri. Mi ɓahri, kpatara law nzukri-aw ƴo rɔk niri hi̧ ku sak tul woyri si wɔrɔk, ku mbi siŋ sina bi ya.

¹¹Ke haŋ fa̧hna mí-i hah fe ku̧ tul bi kaŋ ɓahri, hul bi dara kú mbu̧h ziŋ mi ɓil ɔkna bi ɓáy.

¹²Yi̧n biri í ko wuri ger rɔkɔ law nzuk mbew ké sakra woiri ɓá sih, ɓá kpuh hi̧ ké el sɔɓ fal hi̧ Ŋgerzah Nzuk sa̧w ɔkna.

¹³Mí í hew haniri nam ke nam ɓil sew kú-u ɗi ɓa Guri[11] rɔkɔ nzuk mbew ké sakra woiri ɓá hi̧ Suya ɓá rɔk ni hi̧ law ye kpuh keni.

¹⁴A wah ra nah ƴo ɓa kpuh-u tul ketina ké nah ŋga̧h law tulu ke titilu da̧y kpu̧ru ka̧h ɔh tɔru le, nah ti̧h ɓa bɔh-ya̧ fe baah ziŋ Ŋgermbay.

¹⁵Ɓayay ra ɓahri se, Guri ké i lah kusol ye le, í kpuh law woiri kandɔk zih woiri ra ya. Ku ƴo zɔr law ye.

¹⁶Nzuk a suŋri mí lah kusol ye mí el zɔr law ye dɔɓ ri ɓáyaw le ? Ɓa a woyri ké Ŋgerzah hi̧ Moyiz ten niri ké Eziɓte ra, kaŋ ya le ?

¹⁷Nzuk a suŋri mí law Ŋgerzah fa̧h ni ké tul woyri mbihmbam bon niŋaw le ? Ɓa a woyri kú-u laɓ ni suya mí hul woyri ku̧ raɓ raɓ ɓil lawkɔr, kaŋ ya le ?

¹⁸Fe hahna ké Ŋgerzah hah ku̧ tul ye ɓahri, dara kú mbu̧h ziŋ ni ɓil ɔkna ye ɓáy ra, ɓayu mgba tul nzuk a suŋri le ? Ɓa a woyri kú-u to suyɓay ye ma fal.

¹⁹Nah ko wuri ger. Ku mbu̧h ziŋ ni ɓilu ya ɓay fe le, law woyri kpuh ké tul ye.