Read Karang Mbete Ebereri 4 Bible Online

Mbete Ebereri 4 - Karang bible

Mbete Ebereri 4

¹Mí le aŋay ké wahɓay-mbu̧h ziŋ ni ɓil ɔkna ye ƴo ri da-ay, náh laɓ wuri hȩkme ɓayu rɔkɔ nzuk a hani ké sakra woiri ɓá toŋ fal.

²Mí a wah ra nah lah ɓay a suki kandɔk a woyri-aw ké Moyiz ten niri ra pi. Wara le ɓay a suki kú-u lah ra ku sa kan law woyri tulu ya bale, ɓayu ti̧h niri suk ya.

³Kandɔkaw mí ke hah fe ku̧ tul ye ke haŋ fa̧hna ɓahri, hul ye dara kú mbu̧h ziŋ ni ɓil ɔkna ye ɓáy, mí a wah ké nah kan law tul ɓaysuki hul Ŋgermbay ra nah ƴo mbu̧h ziŋ ni ɓil ɔkna ye. Mbú̧h ɓil ɔkna-aw mí ɓa sa̧w pihna Ŋgerzah ké-e lek sew ké-e laɓ nunmbam ke tusiɓa.

⁴Kandɔk kú-u vbeh ɓay ɔkna-u ké gel ki̧na a hani si tul nam a toŋndɔk sayu ɓahri, nam a toŋndɔk sayu, Ŋgerzah ɔk ke pihna ye[12].

⁵Ɓay ɔkna ra ɓáy ɓil fe hahna ye ra ke ɓahri se, hul ye dara kú mbu̧h ziŋ ni ɓil ɔkna ye ɓáy.

⁶Ɓay ɔkna-aw kaŋ le tɔr nzuk a haniri toŋ ké ɓay mbu̧h ziŋ ni ɓil ɔkna ye ɓáy, mí nzuk a lewsa̧ri kú-u lah ɓay a suki ye ra, ku mbu̧h ziŋ ni ɓilu ya ɓay fe le, ku mba nzak ye Ŋgerzah.

⁷Le ke lu nam a ɓoru ké-e ɗi ɓa Guri. Ɓay Guri ra mbihmbam mah fe fal mbá nzak Ŋgerzah nzukri-aw bale, ŋgermbay Daviɗ ten ɓay nam a ɓoru-aw ké-e ɗi ɓa Guri ra pol dara mí namu ka̧h ɓáy kandɔk ké-e ɗi siŋ ɓahri, Guri, i lah kusol ye le, í kpuh law woiri ya[13].

⁸Fal hul Moyiz ra Zozuwe nda pol gun zih nzuk a lewsa̧ri-aw rih ɓil tusiɓa ké Ŋgerzah wahɓay hi̧ niri. Ku rih ra ɓil ɔkna rih le, Ŋgerzah ta ɓah ɓay nam a ɓoru ké-e ɗi ɓa Guri ya.

⁹Kaŋ dale ɔkna ké ƴo geŋ sa̧wnzuk ye ɓa ɔkna ye a nam a toŋndɔk sayu ra mí ka̧h ya ɓáy.

¹⁰Ɓayu ké nzuk ké ƴo mbu̧h ziŋ Ŋgerzah ɓil ɔkna ye le, nzuku ƴo ɔk tul ye kandɔk Ŋgerzah ké ɔk ke pihna ye kaŋ.

¹¹Dale náh hi̧ tul ɓay mbu̧h ziŋ ni ɓil ɔkna ra rɔkɔ nzuk mbew ɓá zi ɓil fe laɓna mbá nzak ké eŋ fe laɓna nzuk a lewsa̧ri ra. Náh hi̧ tul ɓay mbu̧h ziŋ ni ɓil ɔkna-u ɓayu ké ɓay Ŋgerzah ƴo ɔ-ɔkna.

¹²Ɓay Ŋgerzah mah laɓ pihna mí oh pelem pelem mba mahwu̧y ké nzaku fál seɗe mbɔk o-oh. Ɓayu ƴo kehr tem nzuk ke tem mun nzuku. Ɓayu ƴo kehr gel ɗɔmna mun[14] ke num huhru. Ɓayu ƴo kehr kerɓay nzuk ke kerlaw nzuku.

¹³Fe mbew ké mu̧-mu̧h pol ye ta-a. Feri gbam na mun ndikpo ké nun ye. Feri gbam yi̧h ké pol ye, a ye mí nah ɓáh nzak wah hi̧ ni.

¹⁴Kaŋ dale náh mgba ketina ye ké ƴo ti̧h ke nzak wah ra ɓa kpuh-u ɓahri, nah ƴo ke ŋgernzuk kani ké ka̧h gel ƴona Ŋgerzah ké nunmbam ɓa a ye Zezu gun Ŋgerzah.

¹⁵Ŋgernzuk kani ra ɓa ŋgernzuk kani a a̧y ké tu sena wah tu-tu. Ɓay fe le fe-leh lawri ɓoɗ ɓoɗ gbam ké ziŋ nzuk pirmatul ra ziŋ ni ziŋ, mí ke laɓ suya ɓilu ya.

¹⁶Kaŋ dale náh si huh bohro mbay Ŋgerzah Nzuk lawsuki ke selmun ɓay hi̧ náh ziŋ sona ke sa̧wseh-u ɓay law in ke lawsuki ké nah ƴo ya̧-u ké ta̧w ye.