Read Karang Mbete Ebereri 5 Bible Online

Mbete Ebereri 5 - Karang bible

Mbete Ebereri 5

¹Ɓayu ké ŋgernzuk kani Ŋgerzah a ɓoruri, gbam woyri Ŋgerzah ƴo mbi niri ke toŋna-u toŋna-u ké sakra nzukri. Ke lu ŋgernzuk kani-u hi̧ ke gi pol ye ƴo dim ni ke fe hi̧na nzukri, ke gi pol ye ƴo puh fe hi̧ ni ɓay suya nzukri[15].

²Ŋgernzuk kani-u mah lah nzukri kú-u tu fe ya kú-u vbol kandɔk ké a ye kara suya ké mgba tul woyri ɓa sena ye pi.

³Mí ké sena ye ƴo ri pi ra, ke puh fe hi̧ Ŋgerzah ɓay suya nzukri kaŋto ya wara le, ɓay suya ye pi.

⁴Nzuk ta mbi riŋ ɗina ŋgernzuk kani kan tul ye ke mun ya wara le, ɓa Ŋgerzah mí ɗi nzuk kandɔk ké-e ɗi Aroŋ ɓa ŋgernzuk kani a titilu[16].

⁵Kaŋ pi mí Ŋgermbay kara ɓaŋ riŋ ɗina ŋgernzuk kani kan tul ye ke mun ya. Le ke ya̧ ké ta̧w Nzuk ké ɓah hi̧ ni ɓahri : « A wo mu ɓa gun bi. Ur ke guri-ay mu ɓa mi̧hri bi[17]. »

⁶Ku vbeh ɓay ra ké gel ki̧na a ɓoru ɓáy ɓahri : « Mu ɓa nzuk kani sew ke sew ɓa ŋgɔh kandɔk Malki-sedek ké sa̧w kani ye na sew ke sew[18]. »

⁷A ye Ŋgermbay sew ké-e kaɓ tukala ɓa nzuk pirmatul a som siɓa, ke goŋna ye, ke vuhmun ye ké-e si keni pol Ŋgerzah, ke ƴo vba̧ nzak ɓeleŋ ɓeleŋ, ke ƴo vuh rew hi̧ Nzuk ké mah ya̧ ni ke ndɔk hul, mí ɓay hȩkna ye ra Nzuku lah goŋna ye la-lah.

⁸Ke ɓa gun mí ke tih ke hȩk bah ye ɓil kosehri.

⁹Kandɔk ké Ŋgerzah hi̧ ni ke ŋger ɓa nzuk pirmatul a kpakpaŋu ra, nzukri ké hȩk ni, ke ti̧h ɓa sa̧w-ya̧ niri ke ndɔk hul ɓa ŋgɔh.

¹⁰Mí Ŋgerzah vah ni ké pol daɓari ke riŋ ɗina ŋgernzuk kani kandɔk nunu a Malki-sedek.

¹¹Ɓay ké si tul ŋgernzuk kani-ay ra nah ƴo ke ɓayri ŋgi̧-ŋgi̧ ɓay ɓah-u, mí ndazi ɓayu hi̧ wuri í lah ra se mbamba ɓayu ké suk-lah ɓay woiri mbi-mbih.

¹²A woiri ra lewsa̧ kaŋ mí i mah na ɓa nzuk-firma nzukri ɓayri ké Ŋgerzah ɓah. Mí tú fe firma-aw, i tu ya, i yih ɓay nzuk ɓá dal fe firma a titilu hi̧ wuri ra ɓáy. I ti̧h ɓa gunri ké nzo pam ɓáy. Fe su̧na sel le i mah su̧-u ya.

¹³Gelke nzuk ƴo nzo pam le, ke tu si sina ɓil sal in ké Ŋgerzah ŋga̧h ziŋ na ya ɓayu ké nzuku ɓa gun nzak pam kaŋto.

¹⁴Mí fe su̧na sel le na ɓay nzukri ké ŋger da kandɔk kú-u tih ke ruh mun woyri hi̧ ku ker ɓay te-teh, mí ku na ɓa nzuk goso-kehr suki ke suya.