Read Karang Mbete Ebereri 6 Bible Online

Mbete Ebereri 6 - Karang bible

Mbete Ebereri 6

¹Sa̧wu mí náh si ke fe firma ɓay Ŋgermbay ma pol ɓa ŋgereri wara. Náh el wuri si tul fe firma gunri ya rɔkɔ náh el ti diŋ vul ra ɓáy. Diŋ vulu ɓa fe firma-mbi law ké tul fe laɓnari ké ka-kal el kan law tul Ŋgerzah,

²fe firma ké si tul sam fe batemri ɓoɗ ɓoɗ ke fe firma ké si tul sam kán ndɔk ɓoɗ ɓoɗ ké tul nzukri, fe firma ké si tul ti̧hna záhri ke pa̧ymun a foyu ke fe firma-kuŋ salɓay ké na ɓa ŋgɔh. Gbamaw ɓa fe firma gunri.

³Ŋgerzah hi̧ na ful le, nah ɓay si ma pol ke ɓay Ŋgermbay wara.

⁴Ɓayu ké nzukri ké nun woyri mgbur da, kú-u leh fe hi̧na a nunmbam ke nzak rim woyri, kú-u mgba bɔh ke Tempuki, kú-u leh ke nzak rim woyri ɓahri, ɓay Ŋgerzah su mbamba, kú-u tu ŋgerna sew ké ƴo gina ke mun woyri, mí ku el rih ɓil sa̧w fe laɓna woyri a pol ra le, se mbamba ɓay kú el mbi law tul fe laɓna woyri-aw el gi ta̧w Ŋgermbay ra ɓáy. Nzukri-aw el ƴo ɓar gun Ŋgerzah ra ɓáy hi̧ daɓa nzukri sak ni.

⁷Na kandɔkay : gelke tusiɓa ziŋ gel vohna ɓil belem mí fe pay ké ɓil waka ŋger hi̧ nzuk waka-u le, mgbɔkɔ Ŋgerzah ku̧ tul waka-u.

⁸Mí ŋgatukru ke suy mí ŋger ké ri le, waka-aw ti̧h suk ya. Nazi ɓay ta waka-aw, ɔh tɔru ɓa nzúh ke hɔrɔ.

⁹Gun sanari, nah ɓah kaŋ kara nah tu-tu, ɓay ké si tul woiri na ɓa suki ké i ƴo ziŋ Ŋgerzah.

¹⁰Ŋgerzah ta laɓ nzuk suya ya, ke ta yȩkre fe laɓna suki woiri ke law sana woiri ké i laɓ ɓay riŋ ye ya, i so sa̧w nzuk yeri mí aŋay kara i ƴo tul só niri ɓáy.

¹¹Mí nah tasa̧y law nzuk a suŋ suŋ ké sakra woiri ɓá zaŋ wuɗ wuɗ tul suki a mbah-u tuɓ tuɓ ké ƴo geŋ wuri ka̧h gbu̧h-u rɔkɔ mun woiri ɓá hu ké tulu.

¹²Í ndɔl fe laɓna nzukri ké kan law tul Ŋgerzah kú-u su̧h law ɓilu, mí ku ɓa gun-ya̧ fe baah ké-e wahɓayu.

¹³Ŋgerzah ŋga̧h wahɓayu ziŋ Abaraham ke fe hahna. Kandɔk ké ŋgerna ye mba feri gbam ra, ke hah mun ke riŋ ye.

¹⁴Ke ɓahri : Ketina, mgbɔkɔ bi ku̧ tul wo ku̧, mi̧hri wo ɓay gaŋ ndekle ndekle[19].

¹⁵Kandɔkaw mí Abaraham geŋ ke iklaw, mí ke ziŋ fe wahɓay ra gaŋ ba.

¹⁶Gelke nzukri hah mun woyri ke riŋ fe ké ŋger mba niri dale, háh mun woyri-aw ŋga̧h tul ɓay woyri mí hi̧ fahɓay ta-a.

¹⁷Kaŋ mí Ŋgerzah tasa̧y sɔk nzuk-ya̧ fe wahɓayri ra kú tu ɓa teh-u ɓahri, ke ta vbir wahɓay ye ya wu̧m, mí ke hah mun ye gbaɗ gbaɗ ɓahri, ke kaɓ tul wahɓayu gaŋ.

¹⁸Ɓayri ké ti̧h ke nzak Ŋgerzah ké seɗe-ay sɔ-sɔɓna ya, Ŋgerzah ta kuŋ ɓay ya dale, a wah ké nah ɗuk soh fal ye le, náh ya̧ baw hewna ɓay mgba suki ké na pol wah-ay ndɔk seɗe.

¹⁹Suki ké nah ƴo geŋu ra ɓa fe ké ɓar na ziɓ ɓa kpuh-u, ɓa fe-ŋga̧h na hi̧ nah ƴo ŋgi̧w ŋgi̧w ƴo hi̧ nah kal gar ké kehr gel ƴona Ŋgerzah ke nzukri ra[20] rih ɓilu si ka̧h ta̧w ye.

²⁰Gelu ɓa gel ké Zezu ka̧h ri, ke ɓa nzuk ké te mahful hi̧ na, ke ti̧h ɓa ŋgernzuk kani kandɔk Malki-sedek. Mí ke ɓa ŋgernzuk kani sew ke sew ɓa ŋgɔh.