Read Karang Mbete Ebereri 7 Bible Online

Mbete Ebereri 7 - Karang bible

Mbete Ebereri 7

¹A ye Malki-sedek ra ke ɓa mbay Salam, ke ɓa nzuk kani Ŋgerzah, záh ké deɓ ye ta-a. Ke nzɔh nun Abaraham seh ké Abaraham ƴo el ke gel ŋgermu ké-e haw ké tul mbayri, mí ke lu mgbɔkɔ hi̧ Abaraham[21].

²Abaraham mgba tul feri ké-e fa̧h ké gel ŋgermu gel boh boh, mí ke lu mbew mbew hi̧ ni. Tɔh riŋ Malki-sedek sɔk ɓahri, mbay sal in. Tɔh riŋ puh Salam ba, sɔk ɓahri, ɗeŋ. Ke ɓa mbay ɗeŋ.

³Nzuk ko bah ye ya, ko mah ye ya, ko zih yeri ya pi. Nzuk lah ɓay mbuŋna ye ya pi, lah ɓay hul ye ya pi, kaŋ mí ke ɓa nzuk kani dan gbu̧h-u. Ke ba hani ke gun Ŋgerzah.

⁴Í hekre ŋgerna nzukay, í ko. A ye ra, Abaraham ké ɓa zih sa̧w gun Izarayelri kehr feri ké-e fa̧h ké gel ŋgermu gi keni hi̧ ni ɓa fe dimna.

⁵Mí Levi gun mbew ké sakra gun Izarayelri Ŋgerzah lu sa̧w ye ɓa nzuk kani ké sakra yi̧n yeri, mí bolkusol Ŋgerzah hi̧ niri ful-ya̧ fe gel mbew mbew ké ɓil fe gel boh boh ké ta̧w yi̧n yeri-aw. Levi ra ɓa mi̧hri Abaraham.

⁶Malki-sedek ba, ɓa nzuk kani ké sa̧wu na ɓoɗ ke sa̧w Levi, mí ke ya̧ fe gel mbew mbew ɓil fe gel boh boh ké ta̧w Abaraham. Ke el lu mgbɔkɔ hi̧ Abaraham nzuk ké Ŋgerzah wahɓay ziŋ ni.

⁷Fahɓay ta-a, ŋgernzuk mí lu mgbɔkɔ hi̧ gun.

⁸Dale nzuk kaniri ké sa̧w Levi ƴo ya̧ fe gel mbew mbew ɓil fe gel boh boh, mí ku ƴo hu-hu. Le a ye Malki-sedek ra ku ɓahri se, ke ƴo ke nun kpatara

⁹sɔk ɓahri, sa̧w Levi kú-u mbuŋ niri fá-fal, kú-u ƴo ya̧ fe gel mbew mbew ɓil fe gel boh boh-aw kara ku hi̧ fe gel mbew mbew ɓil fe gel boh boh hi̧ Malki-sedek ke sew Abaraham pi, ɓayu ké Levi ɓa gun mbihndi̧w Abaraham. Sa̧wu mí Levi hi̧ fe-u hi̧ Malki-sedek ke sewu-aw pi.

¹¹Kaŋaw ba, fe puhna ké mi̧hri Aroŋ gun zih Leviri[22] ƴo puh-u kandɔk ké bolkusol Ŋgerzah sɔk gun Izarayelri laɓu, mí fe puhna-aw mah hi̧ ku na ɓa nzuk pirmatul a suki ba, laɓ ani mí Ŋgerzah lu nzuk kani a ɓoru ɓoɗ ke mi̧hri Aroŋ le ? Nzuk kani a ɓoru ra na kandɔk Malki-sedek.

¹²Ɓayu ké sa̧w kani a suŋ suŋ ƴo ke bolkusol ye bolkusol ye, mí sa̧w kani sɔɓ le, bolkusol kara sɔɓ pi.

¹³Ké bolkusol sɔɓ ra mí nzuk kani a ɓoru ƴo ri ké sa̧w ye na ɓoɗ ke sa̧w Levi. Sa̧w kani-aw ra puh fe ké gel fe puhna sa̧w Levi ya.

¹⁴Kandɔk ké nah tu wuri te-teh, Gaŋ wah ra ti̧h ké sa̧w Zuda ké haŋsekle gun Izarayelri ɓa nzuk kani. Mí ke ta ɓa nzuk kani a sa̧w Levi ya. Moyiz ba, ɗi riŋ sa̧w Zuda ɓa nzuk kani ɓil mbete bolkusol ya.

¹⁵Kandɔk ké nah tu-tu, Ŋgerzah hi̧ nzuk kani a ɓoru ti̧h eŋ Malki-sedek. Ke ti̧h ɓa nzuk kani ɓay bolkusol ké sɔk pihna a haymun ya. Wara le nah tu ɓa teh-u ɓahri, ke ti̧h ɓa nzuk kani ɓay huhrumun ɔkna ké ɓeɓ ɓeɓna ya,

¹⁷ɓayu ké mbete Ŋgerzah te-teh ɓay ye ɓahri, ke ɓa nzuk kani sew ke sew ɓa ŋgɔh kandɔk Malki-sedek ké sa̧w kani ye na sew ke sew[23].

¹⁸Fe puhna bolkusol a pol ra ta ke ŋgerna ya dara mí so nzuk ya pi. Le mahful sɔɓu ƴo ri.

¹⁹Bolkusol ra hi̧ fe mbew ké tusiɓa ɔh ɓa fe a suki ya, wara le suki ké law wah te tulu gi. Suki-aw su mba bolkusol a pol, mí nah ƴo si ta̧w Ŋgerzah ɓayu.

²⁰A woyri sa̧w Leviri ba, ku ti̧h ɓa nzuk kani dan fe hahna Ŋgerzah. A ye Zezu nzuk kani a ɓoru-aw ra ke ti̧h ɓa nzuk kani ɓay fe hahna Ŋgerzah. Fe hahna ké Gaŋ tul feri riw hah mun ye gbaɗ gbaɗ ra, ke ta vbir ɓay ye ya[24]. Ke ɓahri : « Mu ɓa nzuk kani sew ke sew ɓa ŋgɔh. »

²²Kaŋaw mí sal in a foyu ké Ŋgerzah ŋga̧h ziŋ nzukri ra su mba bolkusol a pol ké Ŋgerzah ŋga̧h tul ɓayu ziŋ nzukri ke sew Moyizaw, mí sal inu ƴo ɓa ŋgɔh ɓay tul Zezu nzuk kani-u.

²³Kandɔkaw mí tul nzuk kani a polri ra ŋgi̧, ɓayu ké hul kuŋ niri hi̧ ku kaɓ tul pihna ya.

²⁴A ye nzuk kani a ɓoru-aw ba, ke ƴo ri sew ke sew ɓa ŋgɔh, nzuk-soh gel pihna kani ye ta-a.

²⁵Ké gel kani ye ke ƴo ke ŋgerna-ya̧ nzukri ke ndɔk hul wu̧m a woyri kú-u si pol Ŋgerzah ziŋ ni, a ye ké-e ƴo ke ɔkna kpatara, mí ke ƴo pol Ŋgerzah ke riŋ woyri.

²⁶Sam ŋgernzuk kani a kaŋaw mí ti̧h na suk. Ke ɓa nzuk lawpuki, ke tu suya ya, suya rɔɓlɔ ni ya, ke ta ɓil suya ya, riŋ mgbena ye ya̧ gelri gbam si ka̧h gel ƴona Ŋgerzah.

²⁷Ke na ɓoɗ ke ŋgernzuk kani a ɓoruri. A woyri ra ku ƴo si ke fe puhna nam ke nam ɓay suya woyri dara mí ɓay suya sa̧wnzuk woyri pi. A ye ba, ke si ke mun ye ɓa fe puhna bɔk mbew.

²⁸Bolkusol Ŋgerzah ké Moyiz vbeh-aw hi̧ mi̧hri Aroŋ na ɓa ŋgernzuk kani a woyri ké sena suya na tul woyri. Mí fe hahna Ŋgerzah hi̧ gun nzuk ti̧h ɓa ŋgernzuk kani fal bolkusol Moyiz, a ye ké-e ɓa nzuk pirmatul a kpakpaŋu sew ke sew ɓa ŋgɔh.