Read Karang Mbete Ebereri 8 Bible Online

Mbete Ebereri 8 - Karang bible

Mbete Ebereri 8

¹Mahɓay wah mí na-ay : Nah ƴo wuri ke sam ŋgernzuk kani a luki mbew. Ke kaɓ ké nunmbam ɓel arŋgaw Ŋgerzah Mbay a luki ɓa ndɔk lakna ye.

²Ke ƴo ɓil vul kani a kpakpaŋu ƴo laɓ pihna ké gel kani. Vulu, Gaŋ tul feri riw mí laɓ. Nzuk pirmatul laɓ ya.

³Ŋgernzuk kani a ɓoruri gbam Ŋgerzah hi̧ niri ku ƴo si ke fe hi̧na pi fe puhna pi. Kaŋ mí Ŋgerzah hi̧ ŋgernzuk kani a mbewu-aw si ke fe ké-e hi̧-u pi.

⁴Pihna kani ye ƴo ra tusiɓa le, ke tá ɓa nzuk kani ya ɓay fe le, mbete bolkusol Moyiz hi̧ sa̧w Leviri na ɓa nzuk kani ké ƴo si ke fe hi̧na da.

⁵Nzuk kaniri ké ƴo laɓ pihna ké tusiɓa-ay ra gel vul kani woyri-aw ɓa tem fe ké sɔk ɓay mun pihna ké gel vul kani a nunmbam. Ŋgerzah sɔk Moyiz laɓ vul kani a tusiɓa eŋ vul kani a nunmbam ɓahri : « Mú laɓ vulu kandɔk vul ké ti̧h nun wo ké tul kasaw. »

⁶Mí aŋay Ŋgermbay mbi pihna kani ké deɓu ta-a, ke ŋga̧h sal in mbu̧h nzukri ziŋ Ŋgerzah, ke ɓa nzuk-ƴo haŋsekle woyri. Sal in ye ŋger mba sal in Moyiz, sal in ye ra ɓar sa̧w tul wahɓay ké ŋger mbamba-aw.

⁷Sal in Moyiz ké ŋga̧h Ŋgerzah ziŋ nzukri ɗɔr ya ba, mahful kom ke sal in a ɓoru ɓay ƴo ri le ?

⁸Ɓayu ké nzukri kew oh, mí Gaŋ tul feri riw wahɓay ɓahri : Í ko, nam ƴo gina mi ŋgá̧h sal in a foyu ziŋ gun Izarayelri ké Izarayel pi ké Zuda pi.

⁹Sal inu ɓay na kandɔk sal in a pol ké mi ŋga̧h ziŋ zih woyri nam ké mi mgba ndɔk woyri ten niri ké Eziɓte ra ya. Ɓay fe le ku ƴo tul sal inaw ya. A bi ba, kerɓay bi lu ké tul woyri pi. Gaŋ tul feri riw ɓah kaŋ.

¹⁰Gaŋ tul feri riw el ɓahri : Sal in ké mi ŋgá̧h ziŋ gun Izarayelri ra mí na-ay : Ɓil namuri-aw mi ndóh bolkusol bi ɓil kerɓay woyri, mi vbéh ɓay bi kan law woyri. Mi ná ɓa záh woyri. A woyri ba, ku ná ɓa sa̧w bi.

¹¹Dale nzuk ta firma yi̧n ye mini nzuk fál kɔr ye ɓahri : « Mú tu Gaŋ tul feri riw » ɓay fe le, ur ke tul gunri ka̧h tul ŋgernzukri, gbam ku tú mi tu-tu[25].

¹²Ku ƴo tul sal in a pol ya kara mi kér seh woyri, law bi ta ker ɓay tul suya woyri mba[26].

¹³Kaŋ mí nah ƴo ɓah ɓay sal in a foyu sɔk ɓahri, ke hi̧ sal in a pol ti̧h ta̧w. Mí fe ké ti̧h ta̧w, fe ké kpɔkrɔ ra toŋ ɗih ya ɓay zina wara.