Read Karang Mbete Ebereri 9 Bible Online

Mbete Ebereri 9 - Karang bible

Mbete Ebereri 9

¹Sal in a pol ƴo ke bolkusol ké sɔk mahful dimna ke pihna ɓil vul kani Ŋgerzah a tusiɓa.

²Vul kani-u ƴo ke ɓilu seɗe. Ɓil vul a titilu ra lampe ƴo ri, tabele ƴo ri. Peŋ kú-u hi̧ ɓa fe puhna ku̧ tul tabele ra. Ku ɗi gelu ɓa gel kani.

³Gar kuŋ ɓil vul a titilu ke a seɗe-u. Gel a seɗe-u ra ku ɗi ɓa gel ƴona Ŋgerzah.

⁴Ké gelaw gel fe puhna kú-u mboh ke lari lɔr kú-u ƴo nzuh rekna kpuh ƴo ri, sanduku kú-u roŋ ke lari lɔr ƴo ri. Sanduku-aw na ɓay bolkusol sal in ké Ŋgerzah vbeh kan kasaw a felu hi̧ Moyiz[27]. Kasaw ra na ɓil sanduku-u. Ŋgoro lari lɔr kú-u ku̧ fe su̧na ké riŋu ɓa man na ɓilu[28], ka̧wkpuh Aroŋ ké el fu funa[29] kan gelu pi.

⁵Ké tul sanduku ra tem nzak pihna riŋ ɗinari ƴo nzak talu. Tem nzak pihnari ra ku vbo ke lari lɔr, ku ɗi niri ɓa serabeŋ. Tem ta̧y woyri pɔr tul talu ɓa gel-mi̧h sem fe puhna[30]. Mí aŋay le sa̧wseh ɓah ɓay tul vul kani-aw ke gelu gelu gbam ta-a ɓáy.

⁶Fe pihnari-ay gbam mbu̧h ku̧ bale, nzuk kaniri ƴo rih ɓil vul a titilu nam ke nam ƴo laɓ pihna woyri.

⁷Ké ɓil vul a seɗe-u ra ŋgernzuk kani mí rih bɔk mbew ɓil mbihmbam mbew ke sem fe puhna ɓay suya ye pi ɓay suya sa̧w nzuk yeri kú-u laɓ dan tu-u pi.

⁸Kandɔkaw mí Tempuki ƴo sɔk ɓahri se, mahful ɓay si gel ƴona Ŋgerzah a kpakpaŋu mgbur ya, ɓayu ké vul kani a tusiɓa ƴo ri ɓáy.

⁹Vul kani-aw ɓa tem fe ké sɔk fe ke sewu-aw, mí ku ƴo si ke fe hi̧na pi fe puhna pi, keni-aw kara pihna kú-u ƴo laɓu mah hi̧ law nzuk teh ɓa suki ya.

¹⁰Pihna-aw kú-u laɓ hi̧ Ŋgerzah ra ɓa fe laɓna bolkusol ye ké tusiɓa kaŋto, ɓa gí ke fe su̧na, ɓa gí ke fe nzona, ɓa gí ke sam lú ɗikmari ɓoɗ ɓoɗ, feri-aw gbam ku laɓ gi ka̧h nam ké Ŋgerzah lek feri gbam ɓa foyu.

¹¹Dale Ŋgermbay rih ɓil vul kani a kpakpaŋu ké mba tul vul kani a tusiɓa. Ke rih ɓil vulu ɓa ŋgernzuk kani fe sukiri ké ti̧h. Vul kani-aw ta ɓa nzuk pirmatul mí laɓ ya. Sɔk ɓahri, vul kani-u ɓa fe ké Ŋgerzah laɓ ké tusiɓa ya.

¹²Mí ke rih bɔk mbew si ka̧h gel ƴona Ŋgerzah, ke rih ke sem guy ya, ke rih ke sem gun nday ya pi. Le ke rih ke sem ye gaŋ mí ke soh tul wah keni ɓa ŋgɔh.

¹³Nzuk kani a mi̧hri Aroŋ ƴo mi̧h sem guy, ƴo mi̧h sem bah nday, ƴo fa̧h seh hɔrɔ mah nday kú-u nzuh tih ké tul nzukri kú-u mah nun Ŋgerzah ya. Fe puhna a kandɔkawri hi̧ mun nzukri teh mah dim Ŋgerzah ké vul kani ra wa, ani mí sem Ŋgermbay ɓáy le ?

¹⁴Sem ye mí hi̧ law nzukri pu hi̧ ku ti̧h ɓa nzukri ké dim Ŋgerzah Nzuk sa̧w ɔkna. A ye ra ke ɓa fe puhna ké suya rɔɓlɔ ni ya, mí ke Tempuki ké na ɓa ŋgɔh ke kal ke sem ye ka̧h ta̧w Ŋgerzah mí hi̧ ku ti̧h ke ɓil fe laɓna vul kani a tusiɓa ké mah lu hul ké tul woyri ya.

¹⁵Sa̧wu mí ke ɓa nzuk sal in a foyu ké ƴo haŋsekle nzukri ke Ŋgerzah. Hul ye soh tul nzukri ké mba nzak bolkusol sal in a pol, a woyri ké Ŋgerzah ɗi niri ɓa gun-ya̧ fe baah ké na ɓa ŋgɔh mí ku ya̧ fe ké-e wahɓayu ra gaŋ.

¹⁶Gelke nzuk ŋga̧h sal in ziŋ nzuk a ɓoru le, ke ŋga̧h sal inu ke sem hi̧ sem ra ku̧ siɓa.

¹⁷Ɓayu ké hul hi̧ sal in a ŋga̧h-u ƴo ke ŋgerna. Gelke nzuk-ŋga̧h sal in hi̧ sem ku̧ siɓa ya le, ŋgerna sal inu ta-a.

¹⁸Kaŋ mí sal in a pol ra, sem ku̧ siɓa dara mí sal inu ziŋ ŋgerna ɓáy.

¹⁹Bol fal ké Moyiz ki̧ fal ɓayri ké na ɓil mbete bolkusol gbam hi̧ gun Izarayelri riw lah ɔh bale, ke mbi sem gun ndayri ke sem guyri, ke zukru semaw ke mbih. Ke mbi gar a si̧h-u ke gay kpuh hisoɓ, mí ke mi̧h keni sem ra ku̧ tul mbete pi, tul nzukri pi.

²⁰Mí ke ɓahri : « A a̧y ɓa sem ké Ŋgerzah ŋga̧h keni sal in haŋsekle woiri ke a ye. »

²¹Dale ke el mi̧h sem ku̧ vul kani ke fe pihna nzuk kaniri pi.

²²Eŋ kandɔk ku mi̧h sem ku̧ tul feri gbam kandɔk ké mbete bolkusol sɔk ɓay hi̧ fe-uri ɓá teh mah nun Ŋgerzah. Gelke sem ta-a le, lú suya kara ta-a pi.

²³Mí kaŋaw ba, fe laɓnari-aw ɓa tem fe ké sɔk ɓay fe a nunmbam. Fe temaw mí ƴo ke fe puhna ké teh gelu ké tusiɓa hi̧ mah nun Ŋgerzah wa, fe puhna ké gel kani a nunmbam ɓay na ani ɓáy le ? Gelu yih ɓay fe puhna a kpakpaŋu ké ndɔh mba fe puhna a tusiɓa mba-mba.

²⁴Ɓayu ké ta ɓa vul kani a tusiɓa mí Ŋgermbay rih ri ya. Vul kani a tusiɓa ra nzuk pirmatulri mí laɓ ɓa tem fe nunu a kpakpaŋu. Le ke rih ɓil vul kani a nunmbam gaŋ. Ke ƴo pol Ŋgerzah ɓay wah.

²⁵Ke na kandɔk ŋgernzuk kani a ɓoruri ya. Ke hi̧ mun ye ɓa fe puhna hi̧ Ŋgerzah bɔk mbew yaŋ. A woyri-aw ku ƴo rih ɓil vul a seɗe-u ké ɓa gel ƴona Ŋgerzah mbihmbam ke mbihmbam ke sem fe ɓa fe puhna hi̧ Ŋgerzah.

²⁶A ye ba, ke ƴo ra pol Ŋgerzah ɓay laɓ fe puhna ka̧yri ka̧yri le, mah ɓay ké ko seh le, el ko ra ɓáy ur ke sew-laɓ nunmbam ke tusiɓa ka̧h guri-ay. Mí a ye ke rih vul kani a nunmbam sew a ɔh tɔru-ay bɔk mbew si ƴo pol Ŋgerzah. Ɓay mun ye ké ɓa fe puhna, suya lu ké tul nzukri wu̧m.

²⁷Kandɔk ké nzuk pirmatulri gbam hu hul bɔk mbew falu le, Ŋgerzah kuŋ salɓay suya tul woyri,

²⁸kaŋ pi mí Ŋgermbay hu bɔk mbew ɓa fe puhna hi̧ suya lu ké tul daɓa nzukri. Mí ke ta el ti̧h nun nzukri a bɔk seɗe-u ɓay na ɓa fe puhna ɓay suya nzukri mba. Le ke tí̧h nun nzukri ké ƴo geŋ elna ye hi̧ kú ziŋ pa̧ymun a foyu wara.