Read Karang Mbete Zak 1 Bible Online

Mbete Zak 1 - Karang bible

Mbete Zak 1

¹Soko yi̧n bi, gun Izarayelri ké sa̧w wah vba ɓa boh falu seɗe. A bi Zak mgbal Ŋgerzah, mgbal Gaŋ wah Ŋgermbay Zezu, mi vah wuri, a woiri ké i gbakra haniri ké tusiɓari ɓoɗ ɓoɗ.

²Yi̧n biri, í el ke tumbɔl ɓay fe-leh lawri ɓoɗ ɓoɗ ké ziŋ wuri.

³I tu wuri ɓahri se, fe-leh law woiri ƴo vbo kanlaw woiri kandɔk lari mí lu vbi̧ri-u ma fal el poŋ munu. Pihna fe-leh law hi̧ i ɓer gi̧w tul ketina ɓay Ŋgermbay.

⁴Dale í hi̧ ɓer gi̧w ra ɓá hi̧ law woiri ndu̧y hi̧ í ŋger ɓa nzuk pirmatul, í na ɓa gun Ŋgerzah a ketina. Fe laɓna suki mbew ta poh wuri ya.

⁵Gelke ru̧na poh nzuk mbew ké sakra woiri dale, ké vbi ru̧na-u ké ta̧w Ŋgerzah ké ƴo hi̧ nzukri gbam par par ke law mbew dan zɔmna le, ke ɓay hi̧ nzuku ru̧na.

⁶Mí nzuku ɓá vbi ke law mbew. Law ye ɓá tehre ya. Nzuk ké fah ɓay ra na kandɔk ŋgoro ké na tul mbih, ké kuna kɔklɔ ma gini ma sa̧.

⁷Nzuk a kandɔkaw ɓá lu kerɓay-ziŋ fe a hani ké ta̧w Gaŋ tul feri riw ma fal.

⁸Sam law nzuk a kaŋaw kehr gel seɗe tehre ni ɓil siŋ sina ye.

⁹Yi̧n ɓil Ŋgermbay a a̧y ké ɓa ko̧hko ɓá zay mun ɓay riŋ ɗina ye ké mgbe ké nunmbam.

¹⁰Mí yi̧n ké ɓa nzuk vana ba, ɓá zay mun ɓay ŋgerna ye ké ta-a ɓay fe le, ke ról kandɔk funa kpuh kaŋ.

¹¹Seh ti̧h, gel za-zaŋ, gayri ri̧h sɔrɔrɔ, funa kpuhri rol ku̧ siɓa raɓ raɓ, mí ndɔhna-u ta mba. Kaŋ pi mí nzuk vana ɓay rol ké ɓil gel sina ye.

¹²Pol tehna Ŋgerzah teh tul nzuk a a̧y ké ɓer gi̧w tul ketina ɓay Ŋgermbay ké ɓil fe-leh lawri mí ti̧h ke ɓilu ɓa suki ɓay fe le, ɔkna ké-e ziŋu ɓay na ɓa gay mbay ké Gaŋ wah lek geŋ nzukri ké sa ni.

¹³Mí nzuk ké ƴo ɓil fe-leh law le, ko-ko ké ɓahri se : « Ŋgerzah mí pih fe-leh law bi-ay. » Ɗaka-laɓ suya ta ɓil law Ŋgerzah ya dara mí Ŋgerzah ta ndoh law nzuk ke ɓay hi̧ nzuku rih ɓil suya ya pi.

¹⁴A ge ge le fe-leh law ye ur ke ɗaka fe ké na ɓil law ye mí ƴo rah ni, ƴo mgba ni.

¹⁵Bol falu ké ɗaka fe tukala-u ɓu pa̧hra, gun ké-e sȩru ɓa suya, mí mi̧hri suya ra ŋger dale, mbuŋ hul.

¹⁶Yi̧n biri, gun sanari, í hi̧ law woiri ɓá rɔk wuri ya,

¹⁷fe hi̧na a suki ke fe puhna a kpakpaŋu gbam ɗer ke nunmbam ké ta̧w baah Ŋgerzah nzuk sa̧w gel tehna. A ye ke sɔɓ kandɔk siŋ sina fe-teh gelri ké nunmbam ya, ke sɔɓ kandɔk tem ké sɔɓ ke gelri ɓoɗ ɓoɗ ya.

¹⁸Mi̧hri ké baah Ŋgerzah mbuŋ gun yeri keni ɓa ɓay a ketina kandɔk ké-e lek kaŋ. Ke hi̧ nah ti̧h ɓa gun pol, fe a ɓoruri gbam ké-e laɓ ɓa toŋnafal.

¹⁹Í ker si tul ɓayay, yi̧n biri, gun sanari : A ge ge le ɓá lah ɓay a ketina hi̧ ɓayu guh law ye ɓa gah-u, ké mbi ɓay ɓa gah-u ya[1], law ye ɓá zaŋ ɓa gah-u ya,

²⁰ɓayu ké law zaŋna nzuk pirmatul ra ta laɓ pihna hi̧ nzuk tu Ŋgerzah ɓa záh ye ya.

²¹Sa̧wu mí í poŋ fe laɓnari ké sih law woiri ke sam suyari ɓoɗ ɓoɗ gbam ma fal. Ke siŋ sina law a voh-u, í el mgba ɓay a ketina ké Ŋgerzah ruh ɓil law woiri ra ndɔk seɗe, ɓayu mah ya̧ wuri ma-mah.

²²Dale í mgba ɓayu, í ƴo tulu. I lah ɓay Ŋgerzah dan mgba ɓayu le, i rɔk mun woiri kaŋto ɓay fe le,

²³nzuk ké lah ɓay kaŋto, mí ke ƴo tulu ya le, ke na kandɔk nzuk ké ko tem ye ké ɓil fe-ko tem.

²⁴Ke ko tem ye, ke tɔr dale, ke yȩkre tem ye ké-e ko ra keɗ. Kaŋ mí ɓa nzuk ké lah ɓay Ŋgerzah mí yȩkre.

²⁵Nzuk ké hekre ɓa ɗih-u ɓil bolkusol ké sel nzuk se-sel, mí ke ƴo tulu ɓa kpuh-u, ke yȩkre ya le, pol tehna Ŋgerzah teh tul sam nzuk a kandɔkaw. Feri gbam ké-e yih laɓu ɓay ti̧h suk[2].

²⁶Gelke nzuk ɗi mun ye ɓa nzuk misoŋ, mí ke ɓaŋ lagambal kan nzak ye ya le, ke rɔk tul ye kaŋto. Pihna Ŋgerzah ye-aw ɓa kuna.

²⁷Mí pihna misoŋ ké ɓa teh-u ké ndɔh mah nun baah Ŋgerzah mí na-ay : mgbá sa̧w gun sehleri ke wu̧y sehri ɓil koseh woyri pi, kɔ́r mun ɓay fe laɓna tukalari ké sih law nzuk pi.