Read Karang Mbete Zak 3 Bible Online

Mbete Zak 3 - Karang bible

Mbete Zak 3

¹Yi̧n biri, daɓa woiri ɓá ti̧h ɓa nzuk-sɔk ɓay Ŋgerzah ya ɓay fe le, i tu ɓahri se, salɓay kú-u ɓay kuŋ ku̧ tul wah nzuk-sɔk ɓay Ŋgerzahri ɓay kpuh mba salɓay nzuk a ɓoruri mba-mba.

²A wah gbam, bɔk wah ƴo ɓe ɓay bolkusolri ɓoɗ ɓoɗ kpatara. Nzak nzuk ɓa gel ɓe bɔk ye ya le, nzuku ɓa nzuk pirmatul ké eŋ Ŋgerzah gaŋ. Ke tu ɓaŋ lagambal kan nzak ye mgba keni tul ye tu.

³Gelke nah ɓaŋ lagambal ndoh haw ɗeŋe hi̧ ɗeŋe si gel a a̧y ké nah yih dale, mun ye gbam si pi.

⁴Í ko kumbon ke hu̧hna ye gbam. Kuna a bawu ƴo sɔkrɔ mun kumbon ndur ndur, mí nzuk hehre-u ƴo hehre ke kpuh a hu̧h ya-u.

⁵Kaŋ pi mí rim ɓa fe a mah gelu ké mun, mí rimu ƴo gar ɓay tul fe a lukiri. Í ko hɔrɔ a mah gelu ndi̧ mí mah nzuh ɓaw.

⁶Rim ɓa hɔrɔ, ɓa sa̧w mgbɔrɔ tukala-ay. Rim ɗeh puh ɓa suki ké mun wah mí sih gel kaɓna wah birim. Rimu ƴo nzuh gel sina wah par par. Sa̧w hɔrɔ ké rim wah nzuh keni gelri ur ke záh tukala.

⁷Feri ké Ŋgerzah laɓ, ɓa ra nay kpahri, gundoyri, fe kuhru ke selhaŋri, nzuyri, gbamaw na ndɔk nzuk pirmatul. Fe a a̧y ké mba nzuk pirmatul ta-a.

⁸Mí nzuk ké mah mba rim ye ta-a. Rim la-laŋ kpatara ɓa sa̧na. Rimu mbah ke pom-i hul.

⁹Rim ra nah ƴo pir keni baah Ŋgerzah Gaŋ tul feri riw mí nah ƴo mgba keni nazi ku̧ tul nzukri ké Ŋgerzah laɓ niri eŋ ni.

¹⁰Rim a mbew yaŋaw mí pir Ŋgerzah pi, mgba nazi ku̧ tul nzukri pi-aw ba, yi̧n biri, fe-u ɓá laɓ kaŋ ya.

¹¹Mbihlaw lu mbih a rih-u ke a nuŋu pi ley ?

¹²Yi̧n biri, kpuh nzu̧y ta leh mbuhru ya. Pukru kara leh nzu̧y ya. Lɔkɔ mbih ké nuŋ ɓa tom ta lu mbih a rih-u ya.

¹³A ge ké sakra woiri-aw mí ru̧-ru̧ le ? A ge mí tu goso suki le ? Fe laɓna ye ɓá sɔk pihna ke siŋ sina suki ké-e si keni sina law a voh-u ké sa̧w ɓa ru̧na.

¹⁴Mí law woiri mbah ke sere, law woiri nzek ɓay tul fe dale, í nda giri ya, í kuŋ ɓay ku̧ nzak ketina ya.

¹⁵Sam ru̧na a kaŋaw ɓa fe nunmbam ya, mí ɓa fe tukala, ɓa fe nay, ɓa fe záh

¹⁶ɓayu ké gel a a̧y ké sere ƴo ri, nzék law ɓay tul fe ƴo ri le, ɓéɓ gel ke fe laɓna a kɔkuri ɓoɗ ɓoɗ ƴo ri pi.

¹⁷Mí ru̧na ké ur ke nunmbam te-teh dara mí ɓa ɗeŋ, ƴo lah hani ke nzukri, ƴo ke suk-lah ɓay, ƴo mbar fe laɓna gbam ke law in ke suki ké mi̧hri-u leh suki. Ru̧na-u lu nun nzuk ya, mu̧h ketina ya pi.

¹⁸Mi̧hri sal in ké Ŋgerzah ŋga̧h ziŋ nzukri ɓa záh woyri, ké ruh ɓil ɗeŋ le, leh lehna hi̧ nzukri ké pihna woyri ɓa ɗeŋ.