Read Karang Mbete Zak 5 Bible Online

Mbete Zak 5 - Karang bible

Mbete Zak 5

¹A woiri nzuk va̧nari, í te wuri suk. Í vuh mun, í vuh rew ɓay koseh ké ti̧h tul woiri-ay.

²Fe ziŋna woiri pu-puŋ. Gar woiri ké ku̧ vul, si̧niri su̧-su̧.

³Lari lɔr woiri ke lari woiri ko gay. Ɓeɓna-u-aw ɓa fe tehɓay tul woiri mí ɓay ruklu wuri kandɔk hɔrɔ ké ruklu sa̧w kpuh kaŋ, a woiri ké i mbu̧h fe ziŋna woiri ɓil sew a ɔh tɔru-ay.

⁴Í ko lari pihna ké i gɔɓrɔ nzuk-laɓ pihna waka woiri. Tiri-u mgbe wɔsɔk wɔsɔk hi̧ Gaŋ tul gaŋri lah. Vuhna nzuk-vbeh naŋ woiri toh suk ye Gaŋ tul feri riw.

⁵I kaɓ ɓil bela ké tukala-ay. Fe ké rih law woiri, i la-laɓ. I hɔl mun woiri hu̧h taɓ taɓ geŋ nam-vbeh nday[10].

⁶I kuŋ salɓay kan tul nzuk mbaŋ woiri ké ta ke ɓay ziŋ wuri ya. A ye ké-e kpuh tul ziŋ wuri ya kara i i ni.

⁷Kaŋaw ba, yi̧n biri, í ik law ɓil koseh woiri ge, í geŋ gina Gaŋ tul feri riw. Í ko nzuk pay. Ke ƴo ɓaŋ law te tul fe pay waka ye ur ke mbam dɔh ka̧h sar mbam tul nzak kew.

⁸A woiri kara í ik law kaŋ pi, í su̧ law ɓay fe le, gina Gaŋ tul feri riw ɗih ya.

⁹Yi̧n biri, í ŋgu̧hru ɓay ke riŋ haniri ya rɔkɔ í ziŋ ɓay. Í ko nzuk-kuŋ salɓay ƴo nzak vul da.

¹⁰Yi̧n biri, í ker ɓay tul gun nzak pihna Ŋgerzah a lewsa̧ri. Ku ɓah nzak pihna ke riŋ Gaŋ tul feri riw, ku koseh mbamba, mí ku ik law ké tulu.

¹¹Í ko, nah ɗi nzukri ké ɓer gi̧w tul Gaŋ tul feri riw ɓa gun pol tehnari. I lah fe ké laɓ Zoɓ[11] lewsa̧ lah. Ke ɓer gi̧w, ke el fal ya, mí Gaŋ tul feri riw hi̧ fe-u ɔh ɓa suki ɓay fe le, lawsuki ke law in ɓa mun Gaŋ tul feri riw.

¹²Fe-uri gbam ƴo pol woiri da. Le yi̧n biri, nzak woiri ɓá ti̧h ke fe hahna ya. Í hah mbam ya, í mgba tusiɓa hah keni fe ya. Fe a suŋ suŋ kara í hah keni fe ya. Nzak woiri ɓá na ɓa mbew yaŋ. Nzak woiri ɓahri, « yi̧h » mini « u̧-u̧ » dale, í ƴo tulu rɔkɔ salɓay ɓá mgba wuri.

¹³Nzuk mbew ké sakra woiri ƴo ɓil koseh le, ké goŋ Ŋgerzah. Law nzuk a ɓoru rih ni le, ké ɗi siŋ-pir Ŋgerzah.

¹⁴Ké sakra woiri, nzuk a hani na sena le, ké ɗi ŋgernzuk vul misoŋri, kú goŋ Ŋgerzah ɓay tul ye, kú suh num ke riŋ Gaŋ tul feri riw ku̧ tul ye.

¹⁵Goŋna nzuk ké law ye ƴo mbew ke Ŋgerzah ɓay ya̧ nzuk sena-u. Gaŋ tul feri riw ɓay ɔr ni ƴo síɓa. Salɓay sena-u kara ke lú ké tul ye ma fal pi.

¹⁶Kaŋ dale nzak woiri ɓá ten ketina woiri hi̧ haniri. Í goŋ wuri Ŋgerzah ɓay tul haniri pi hi̧ í ziŋ mun gahna. Vuhna nzuk ké tu Ŋgerzah ɓa záh ye ƴo laɓ pihna.

¹⁷Eli a lewsa̧[12] ɓa nzuk pirmatul kandɔk a wah kaŋ, mí ke goŋ Ŋgerzah ke law mbew ɓay mbam ɓá to ya, mí mbam to ya ra gaŋ ba, laɓ mbihmbam say ke few tɔtɔklɔ.

¹⁸Ke el goŋ ni ra ɓáy, mí mbam to hi̧ fe payri ŋger ké tusiɓa.

¹⁹Yi̧n biri, gelke nzuk a hani reh ful, mí nzuk a ɓoru el ziŋ ni gi le, í tu wuri ɓa teh-u, nzuk ké ten nzuk ké vbol mahful el gi ɓil ketina ra, ke ya̧ mun nzuku ke ndɔk hul. Su̧hru si ma pol ya.