Read Karang Mbete 1 Piyer 1 Bible Online

Mbete 1 Piyer 1 - Karang bible

Mbete 1 Piyer 1

¹A bi Piyer gun nzak pihna Ŋgermbay Zezu, mi vbeh mbete-ay hi̧ wuri a woiri ké riŋ Ŋgermbay kan tul woiri, ké i zikri el kaɓ ɓa nzuk a gi-uri ké tusiɓa Poŋ, Galaɗ, Kapados, Azi, Bitini.

²I ɓa sa̧wnzuk Ŋgerzah ké kaɓ ɓa nzuk a gi-uri kandɔk ké Bah wah Ŋgerzah tu ɓayu pol sa̧. Tempuki teh wuri ɓa nunu a Ŋgerzah ɓay í lah nzak ye, mí sem Ŋgermbay Zezu ŋga̧h wuri ziŋ ni. Lawsuki ke ɗeŋ ɓá seh ma pol pol hi̧ wuri.

³Nah el ke tumbɔl hi̧ Ŋgerzah ɓay mgbɔkɔ ye, a ye ké-e ɓa bah Ŋgermbay Zezu Gaŋ wah. Tumbɔl law in a luki ké-e mgba ziŋ na, ke mbuŋ na gi rih ɓil ɔkna. Mbuŋna wah a foyu ra kal ke ful ti̧hna Ŋgermbay Zezu ke puh záh ke pa̧ymun a foyu. Ɔkna ra ɓa fe baah ké nah ƴo geŋu. Fe Baah-aw ra ta sih ya, ta ko gay ya, seh kara ta mbi ŋgerna-u ya pi. Baah ƴo kɔr geŋ wuri ké nunmbam.

⁵A woiri ké Ŋgerzah ko kona ma tul woiri ke huhrumun ɓay law woiri ké te sa tul ye hi̧ i ƴo ke ɔkna ɓa suki. Ƴona woiri ké lek da-aw ɓay ten mun sew a ɔh tɔru.

⁶Law woiri rih wuri rih ɓay tulu. Mí aŋay ba, sam fe-leh lawri ɓoɗ ɓoɗ ké se law ɗɔk ɗɔk ƴo ziŋ wuri.

⁷Fe-leh lawri-aw ɓay hi̧ ketina law woiri ké i te sa tul Ŋgermbay ra ɓá ndu̧y. Ndu̧yna-aw mba ndu̧yna lari lɔr kú-u vbo ke hɔrɔ ɓay lu vbi̧ri-u poŋ munu. Lari lɔr ɓa fe a kpakpaŋu mí ɓay zi-u. Law woiri ké i te sa tul Ŋgermbay ba, ŋger mba lari lɔr mba-mba, mí su ɓay hi̧ fe-leh law ɓá ziŋ wuri dara pirna, dimna, riŋ ɗina ɓay mgbe-u ke seh ké Ŋgermbay Zezu ɓay ten mun ké nun nzukri.

⁸A ye ké i ko ni ke nun ya kara i sa ni, ké i ko ni aŋay ya ɓáy kara law woiri te sa tul ye, mí i zay mun ke sam law rihna ké nzuk mah ɓah ɓayu ya, ké mah riŋ ɗina Ŋgerzah.

⁹I ƴo mgba ɔkna ke pa̧ymun a foyu ra ɓa fe gama kanlaw woiri ké na sa tul Ŋgerzah.

¹⁰Ɓay káɓ ke pa̧ymun a foyu ra, gun nzak pihna Ŋgerzah a lewsa̧ri faŋ sa̧wu. Ɓay lawsuki ké Ŋgerzah laɓ ziŋ wuri-ay, Tempuki ɓaŋ ɓayu lewsa̧ ndoh ɓil law woyri, mí ku fakla ɓayu ɗaka ɗaka.

¹¹Tem Ŋgermbay ndoh ɓay ɓil law woyri lewsa̧ te-teh ɓay koseh ké ɓay ziŋ ni ke ɓay riŋ ɗina ye ké gi doro-u, mí ku fakla ɓay tu ani mí fe-u ɓay kalu ke sa̧wseh a suŋ.

¹²Ŋgerzah ten sa̧wɓayay hi̧ niri tu ɓahri, nzak pihna kú-u ɓah-aw, ɓayu ta ɓa ɓay woyri nzuk a lewsa̧ri ya. Le ɓa ɓay woiri nzuk a guri-ay. Mí aŋay le Tem lawpuki ké ur ke nunmbam gi te-teh ɓayu ke nzak nzukri ké ka-kah-u hi̧ wuri i lah. Nun tem nzak pihnari kara pu pih ɓay tu sa̧wɓayay.

¹³Kandɔk ké ɓayu guh law woiri da, ké i mgba tul woiri da, í ɓaŋ law woiri te sa tul lawsuki a a̧y ké ten mun ke gina Ŋgermbay Zezu.

¹⁴Lewsa̧ kerɓay woiri ra̧-ra̧h, i ƴo dih fal fe laɓna ɗaka fe tukalari, mí aŋay i ɓa gun Ŋgerzahri ɓay lah nzak ye, í dih fal ɗaka fe-uri mba.

¹⁵Baah Ŋgerzah nzuk lawpuki tu riŋ hi̧ wuri ɓa gun yeri. A woiri kara í si siŋ sina nzuk lawpukiri.

¹⁶Ɓay fe le mbete Ŋgerzah ɓahri : Í na ɓa gun lawpuki kandɔk ké mi ɓa nzuk lawpuki[1].

¹⁷A ye ké i ɗi ni « Baah », ke lu nun gun yeri ya. Ke ƴo ndar gun a suŋ suŋ mah ke fe laɓna ye, fe laɓna ye dale, í hȩk ni ke siŋ sina woiri ké tukala-ay ké ɓa gel gahru woiri.

¹⁸Ɓay fe le i tu wuri tu, ta ɓa lari a kpakpaŋuri ké ɓay ɓe-ɓeɓ kandɔk lari lɔr mini lari a ɓoru mí soh tul woiri ɓil kɔk fe laɓna sa̧w woiri ya.

¹⁹Le sem Ŋgermbay ké ɓa sem fe puhna ké ŋge-ŋgere mí soh tul woiri. Ke ɓa gun sami a suki ké ndɔh mah nun Ŋgerzah, mí Ŋgerzah ya̧-ya̧.

²⁰A ye ra, Ŋgerzah tu ni kandɔkaw dara mí nunmbam ke tusiɓa laɓ ɓáy. Sew a ɔh tɔru-ay, ke ten mun ɓay suki woiri ké i ƴo mbew ke Ŋgerzah ɓay riŋ Ŋgermbay. A ye ké Ŋgerzah ten ni ké sakra hulri hi̧ riŋ ɗina ye mgbe mí law woiri te sa tul Ŋgerzah. Kerɓay káɓ ke pa̧ymun a foyu kara i ƴo geŋ ké ta̧w Ŋgerzah pi.

²²Kandɔk ké i ya̧ ketina mí law woiri el pu mah nun Ŋgerzah ɓay í mbi law sana dan foh dale, í sa haniri law mbew kpatara.

²³Mi̧hri-mbuŋ wuri ɓa nzuk pirmatul a foyu ra, hu hul kandɔk mi̧hri mbuŋna woiri a pol ya. Mun mi̧hri-u ké mbuŋ wuri ɓa ɓay Ŋgerzah ké ƴo ke ɔkna ɓa ŋgɔh kpatara[2].

²⁴Sa̧wu mí ku vbeh lewsa̧ ɓahri se : Nzuk pirmatulri gbam na kandɔk gay fe. Ndɔhna woyri na kandɔk funa fe. Gay fe ri̧h sɔrɔrɔ, Funa fe ba, rol.

²⁵Mí ɓay Gaŋ tul feri riw na ɓa ŋgɔh [3]. Ɓay ké mbuŋ wuri ra ɓa ɓaysuki ké i lah.