Read Karang Mbete 1 Piyer 2 Bible Online

Mbete 1 Piyer 2 - Karang bible

Mbete 1 Piyer 2

¹Kandɔk ké i poŋ sam fe laɓna suyari ɓoɗ ɓoɗ gbam kandɔk nzak rɔkna, mú̧h ketina, láɓ law si̧hna, mbí riŋ mbaŋ woiri dale, í na ɗaka ɓay a ketina ɓa pam nzona woiri kandɔk gun nzak pamri ké na ɗaka nzo pam kaŋ. Le i hú̧h keni ɓa nzuk pirmatulri ké ɓay ziŋ pa̧ymun a foyu ké ɔ-ɔkna ɓa ŋgɔh,

³a woiri ké i leh ke nzak rim woiri, i tu ɓahri, Gaŋ tul feri riw su-su[4],

⁴mí i gi wuri ké ta̧w ye, a ye ke ɓa kasaw ké ɔ-ɔkna, mí nzukri poŋ kan kpah. Ŋgerzah ba, mbi ɓa kasaw a kpakpaŋu mah mboh vul ye[5].

⁵A woiri kara i ɓa kasaw ké ɔ-ɔkna pi. I ƴo ka̧y tul hani ɓa vul Tempuki, sa̧w záh woiri mbew. I ɓa nzuk kani Ŋgerzah ɓay í mbi mun woiri ké ɓa gel ƴona Tempuki ra hi̧ Ŋgerzah. I ɓa fe puhna ké rih law Ŋgerzah rih ɓay tumbɔl Ŋgermbay Zezu[6].

⁶Ɓay fe le mbete Ŋgerzah mbu̧h tul ɓayu ɓahri : Mú ko, mi mbi kasaw kan ké Siyoŋ [7]. Kasaw ra ɓa mah kasaw-mboh diŋ vul a kpakpaŋu. Nzuk ké kan law sa tul kasawu le, su̧hru ta se ni ya gaŋ.

⁷A woiri ké i kan law sa tul ye le kasawu ndɔh ké nun woiri ndɔ-ndɔh. Nzukri ké saŋ kasawaw ba, kasawu mí el ti̧h ɓa mah kasaw-mboh diŋ vulu, kasaw ké nzuk-mboh vul kani Ŋgerzahri poŋ kan kpah ra,

⁸ɓa kasaw-ɓe bɔk, ɓa kasaw lihna [8], a woyri kú-u kan law tul ɓay Ŋgerzah ya. A a̧w mí lek ɓay tul woyri.

⁹A woiri ba, Ŋgerzah lu wuri ɓa sa̧w ye, i ɓa sa̧wkani ké riŋ ɗina mbay ɗi tul woiri, law woiri pu ɓa sa̧w Ŋgerzah, i ɓa sa̧wnzuk ké-e ko kona ma tul woiri[9] ɓay hi̧ suki ye ɓá ten mun ké sakra woiri hi̧ nzukri ko a ye ké-e ɗi wuri ti̧h ke tirim si rih gel tehna ye ké teh gberere.

¹⁰A woiri, lewsa̧ i ta ɓa sa̧w Ŋgerzah ya, mí aŋay, i ɓa sa̧wnzuk ye. A woiri ra, lewsa̧ law in Ŋgerzah ɗih ziŋ wuri ɗi-ɗih, mí aŋay, ke mgba in ziŋ wuri[10].

¹¹Gun sanari, mi ƴo hew wuri, a woiri ké i ɓa nzuk a gi-uri, ké i ɓa gahruri ké tukala-ay, í poŋ fal tasa̧y fe laɓna tukalari ké ƴo ruh ŋgermu ziŋ wuri ma fal ɓay hi̧ sa̧wnzuk a ɓoruri ɓá ko siŋ sina woiri a suki. Mí ku ƴo ra mbi riŋ woiri ɓa nzuk-laɓ sa̧nari kara ku hekre fe laɓna suki woiri le, ku pír riŋ Ŋgerzah ke nam gina ye.

¹³Í hȩk wuri ŋgernzuk tusiɓari ɓay riŋ Gaŋ tul feri riw kandɔk mbay tusiɓa ke riŋ ɗina ye,

¹⁴guvener-ri kú-u ɓa gun nzak pihna Gaŋ tul feri riw kara pi. Ku ƴo kuŋ salɓay tul nzuk-laɓ suyari, ku ƴo pir nzuk-laɓ sukiri.

¹⁵Kaŋ mí Ŋgerzah yih ɓay í laɓ suki rim keni kɔk ɓay ɓahna kpo̧k nzukri.

¹⁶I ɓa gun puh lakna Ŋgerzah ɓay mbi riŋ ɗina gun puh-aw laɓ keni fe rɔɗ rɔɗ ya. Le i ɓa mgbal Ŋgerzah.

¹⁷Dale í dim wuri nzukri gbam : í mgba yi̧nri ɓil Ŋgermbay ma law, í hȩk wuri Ŋgerzah, í dim wuri mbay tusiɓa woiri pi.

¹⁸A woiri mgbalri, í ɗiŋ tul hi̧ bahgaŋ woiri. Í hȩk bahgaŋ a sukiri ké sa wuri kaŋto ya, mí bahgaŋri ké ƴo kpuh ziŋ wuri kara pi.

¹⁹Ku laɓ wuri koseh, mí i su̧h law ɓilu ɓay law woiri ké te-teh ké pol Ŋgerzah le, ɓa lawsuki Ŋgerzah munu.

²⁰Gelke ku vba̧ wuri ɓay tul kpuhna woiri, mí i su̧h law wa, pirna fe mí ƴo ri le ? I ko seh ɓayu ké i laɓ suki, mí i su̧h law ɓilu le, a a̧w mí ɓa lawsuki ké i ziŋ ké ta̧w Ŋgerzah munu.

²¹Sa̧wu mí ɓa riŋ ɗina woiri. Ɓay fe le Ŋgermbay ke mun ye gaŋ ko seh ɓay tul woiri, mí ke sɔk wuri mahful koseh ye ɓay í mbi ziŋ ni[11].

²²A ye ra, suya ta ta̧w ye ya, nzak rɔkna ti̧h ké haw ye ya pi.

²³A ye ra, ku far ni, mí ke el ke farna ya, ku laɓ ni koseh, mí ke el ke ɓay a se-u ya. Le ke poŋ mun ye hi̧ Nzuk-kuŋ salɓay a ketina.

²⁴A ye ra, ke hi̧ nazi hul ké mgba tul wah ɓay suya wah ta ni ye, ke hu soh bol wah ké tul kpuh ɓay hi̧ a wah ké suya wah hu poŋ na-aw náh ka-kaɓna mbew ke Ŋgerzah ɓa záh wah. Ɓay ye ɓah kandɔkay : Vba̧nari ké hi̧ mun ye te ɓutuk ɓutuk ɓa no̧k mí gah wuri,

²⁵ké i zi wuri kandɔk samiri, mí aŋay, i el wuri gi ta̧w nzuk-hɔl sami, a ye nzuk-ko tul woiri[12].