Read Karang Mbete 1 Piyer 4 Bible Online

Mbete 1 Piyer 4 - Karang bible

Mbete 1 Piyer 4

¹Kandɔk Ŋgermbay ké ko seh ké mun ye ra, a woiri kara í lek mun woiri ke kerɓay mbew yaŋ ziŋ ni. Ɓay fe le nzuk a a̧y ké tu koseh tu le gba ke suya da.

²Nzuku ƴo mbi mun ye rih ɓil fe laɓna ɗaka sa̧y fe tukala mba. Wara le ke ƴo mbi mun ye laɓ fe ké rih law Ŋgerzah ke tɔ́r nam ye ké tukala-ay.

³Kaɓna woiri a pol ra i laɓ fe tukala ké rih law sa̧wnzuk a ɓoruri mí mah seeh. I ƴo dim záh a ɓoruri, i ƴo kpuh tul keni ziŋ Ŋgerzah kandɔkay : láɓ fe si wɔrɔk, láɓ fe ké voh ɗaka haymun, mbáh ɓil ke yim, mbú̧h hani gel yim nday, fáh hani ke nzó yim.

⁴Fe laɓna-aw uh kandɔk yiŋna mbih ké vba̧ nzuk kaŋ. Mí ku ko aŋay i mbu̧h ziŋ niri ɓilu mba le, na niri ɓa saŋ ɓahri, sa̧na munu. Ku ɓal riŋ woiri keni.

⁵Mí a woyri-aw ku ɓay ki̧ fal fe laɓna suya woyri hi̧ ni a ye ké-e ƴo tul bɔk ɓay kehr nzukri ké ƴo ke ɔkna ke nzuk a huluri.

⁶Sa̧wu mí ká-kah ɓaysuki lák mbay Ŋgermbay mgbe hi̧ nzuk a huluri gaŋ ɓay hi̧ salɓay hul ké mgba tul nzuk pirmatulri ké sa̧w woyri ɓa som siɓa hi̧ ku hu kara ku él kaɓ ɓa nzuk pirmatulri ké sa̧w ɔkna-u ɓa Tem Ŋgerzah.

⁷Nam-ɔh tukala ɗih mba dale, í ker ɓay ke nun a teh-u, í mgba tul woiri dale, í goŋ keni Ŋgerzah.

⁸Mí mahɓayri gbam ɓa rí̧h si̧w sa hani law mbew, ɓa mgbá haniri ɓa suki dan ŋgu̧hru ɓay. Ɓay fe le sá hani gboh su̧hru seh ma pol[17].

¹⁰A ge ge le Ŋgerzah hi̧ ni goso pihna ye goso pihna ye ɓay kú so keni haniri kandɔk gun-laɓ pihna a kpakpaŋuri ké mgba sa̧w lawsukiri ké Ŋgerzah wal.

¹¹Wara le nzuk ɓah ɓay le, ké ɓah ɓay ké Ŋgerzah ɓaŋ ndoh nzak ye. Nzuk ké ƴo so nzukri, ké so nzukri ke huhrumun ké Ŋgerzah hi̧ ni, ɓay hi̧ fe laɓna woyri gbam ɓá el ke riŋ ɗina hi̧ Ŋgerzah ɓay riŋ Ŋgermbay Zezu a ye ké riŋ ɗina ke ŋgerna ɓa nzuku a ye sew ke sew kpatara. Gelu munu.

¹²Gun sanari, koseh ké tɔk law woiri ɓá na wuri ɓa saŋ ya, ɓá mba kerɓay woiri ya.

¹³Wara le í laɓ law rihna kandɔk ké i mbu̧h mbew ziŋ Ŋgermbay ɓil koseh ye. Koseh ké ziŋ Ŋgermbay ra ziŋ wuri pi, ɓay hi̧ í zay mun ke law rihna a mbamba-u ɓay riŋ ɗina ye ké ten mun ké sakra woiri.

¹⁴Ku far wuri ɓay riŋ Ŋgermbay ké kan tul woiri le, pol tehna ƴo ziŋ wuri ɓay fe le, Tem Ŋgerzah ké ɓa Tem riŋ ɗina kaɓ ziŋ wuri.

¹⁵Nzuk mbew ké sakra woiri ɓá ziŋ koseh ɓay í hul, ɓay ríh riɓa, ɓay fe laɓna suya mini ɓay zó toh ɓil ɓay nzuk a ɓoru ya pi.

¹⁶Mí ke ziŋ koseh ɓay riŋ Ŋgermbay ké na tul ye le, ké laɓ su̧hru ya. Ké pir Ŋgerzah ɓay riŋ ɗina-aw ra ma.

¹⁷Ɓay fe le sa̧wseh-kuŋ salɓay Ŋgerzah ti ke tul gun yeri. Mí titilu ke tul wah ra wa, kúŋ salɓay ye tul nzukri ké to suyɓay nzak pihna a suki ye vbu kpah ba, ɓay ɔh ani ɓáy le ?

¹⁸Nzuk ké ƴo mbew ke Ŋgerzah, ké ziŋ ɔkna ye kpuh mbamba ra wa, nzuk-saŋ Ŋgerzah, a ye nzuk suya ba, zíŋ ɔkna ye ɓay na ani ɓáy le[18] ?

¹⁹Kandɔkaw mí sam kosehri ké Ŋgerzah yih, ké nzukri ko ra kú poŋ mun woyri ƴɔɗ ké ndɔk Nzuk-ƴo tul pihna ké-e laɓ ke titilu da̧y, kú toŋ laɓ suki keni.