Read Karang Mbete 1 Piyer 5 Bible Online

Mbete 1 Piyer 5 - Karang bible

Mbete 1 Piyer 5

¹Dale a bi ŋgernzuk-ko tul sa̧w in Ŋgermbay, nzuk-te-teh ɓay koseh Ŋgermbay, ké mi kaɓ ɓil riŋ ɗina-u ké ɓay ten mun ɓáy ra mi ƴo hew wuri bɔh-ko tul sa̧w in Ŋgermbay ziŋ mi ɓahri, í kɔr wuri vbil sami Ŋgerzah ké-e ɓaŋ ku̧ ndɔk woiri. Í mgba sa̧wu ɓayu kú-u sɔkrɔ diŋ woiri ya. Le í mgba sa̧wu ke law rihna kandɔk ké Ŋgerzah yih. Í mgba sa̧wu ɓay su̧ ma ɓil ya. Le law woiri ɓá ri̧h si̧w tulu.

³Samiri ké-e ku̧ ndɔk woiri ra, í lak mbay tul woyri ya. Le í si siŋ sina gun Ŋgerzah hi̧ kú ndɔl ma.

⁴Nam ké nzuk-hɔl sami a ŋgeru ɓay ka̧h-u le, ke ndóh wuri guɓatul riŋ ɗina ké ndu̧yna-u el fal ya ɓay pir wuri keni.

⁵A woiri tɔ́r sa̧w in Ŋgermbay ké toŋ ba, í hȩk ŋgernzukri-aw. A woiri gbam í ɗiŋ tul hi̧ haniri. Ɗíŋ tul mí ɓa gar ndohna woiri ɓay fe le, Ŋgerzah ƴo ik tul nzuk-hu̧h tulri ma siɓa. Nzuk-ɗiŋ tulri ba, ke ƴo laɓ lawsuki ziŋ niri[19].

⁶Kaŋ dale í ɗiŋ wuri tul hi̧ Ŋgerzah ké huh ŋgerna ndɔk ye, ke ɔ́r tul woiri gelke sa̧wseh-u ka̧h.

⁷Kerɓay woiri gbam í poŋ ma tul ye ɓay fe le, ɓay woiri ko ni ye.

⁸Í ƴo tul bɔk woiri ke nun a teh-u ɓay fe le, mbay záh tukala, ke ƴo sek wuri ɓay laɓ wuri ɓay. Ke ɓa mbaki. Ke ƴo vuh ha̧rma keni ƴo ƴah nzuk ɓay kuhru-u.

⁹Mí í ɓer gi̧w gboh ni, í ƴo ɓa kpuh-u ɓay law woiri ké te sa tul Ŋgerzah. I tu wuri tu, koseh a kandɔkawri ƴo ziŋ yi̧nri ɓil Ŋgermbay ké tukala gbam pi.

¹⁰Fal koseh sa̧wseh ndi̧ ra, Ŋgerzah Nzuk sa̧w lawsuki a ye ké-e ɗi wuri gi kaɓ ɓil riŋ ɗina ye ké mgbe kpatara, a ye ké-e ɗi wuri ɓay riŋ Ŋgermbay ké kan tul woiri, a ye gaŋ mí ke él lek wuri ɓa nzuk pirmatul a foyu hi̧ í ɓar sa̧w, í ŋger, í ƴo ɓa kpuh-u.

¹¹Lák mbay ɓa nzuku a ye sew ke sew. Gelu munu.

¹²Gun mbete ké mi pih hi̧ wuri-ay, ndɔk Silas mí vbeh, a ye ké mi ko ni ɓa yi̧n ɓil Ŋgermbay ké ƴo tul ɓay Ŋgermbay. Mi ƴo te-teh ɓay koseh ké ziŋ sa̧w in Ŋgermbay hew wuri keni ɓahri se, a a̧w ɓa lawsuki Ŋgerzah a ketina munu, í ƴo tulu ɓa kpuh-u.

¹³Bɔh ɗina woiri gun Ŋgerzahri ké kaɓ ɓa nzuk a gi-uri ké Babiloŋ, ku vah wuri dara mí gun bi Marki pi.

¹⁴Í vah haniri ke law sana ɓa yi̧nri. Mi vah wuri ke ɗeŋ, gbam woiri ké i ƴo ziŋ Ŋgermbay.