Read Karang Mbete 2 Piyer 1 Bible Online

Mbete 2 Piyer 1 - Karang bible

Mbete 2 Piyer 1

¹A bi Simu Piyer mi ɓa mgbal Ŋgermbay Zezu, mi ɓa gun nzak pihna ye, mi vbeh mbete-ay hi̧ wuri. Kanlaw tul Ŋgermbay ké i ya̧ mbew ziŋ na mí su mah hani pi, ɓay sal in ké ŋga̧h na ziŋ Ŋgerzah wah ke Ŋgermbay Zezu nzuk-ya̧ na.

²Tú Ŋgerzah ke Zezu a ye Gaŋ wah, tú niri ra ɓá hi̧ lawsuki ke ɗeŋ seh ma pol pol hi̧ wuri.

³Kandɔk ké feri gbam ké si ke ŋgerna Ŋgerzah mbu̧h ɓa nzuku a wah le, ŋgerna ye ké-e hi̧ na ra ƴo gi ke ɔkna, ƴo hi̧ siŋ sina wah si mbew ke Ŋgerzah ɓay tuna ké nah tu ni, a ye ké-e ɗi na ke riŋ ɗina ke goso suki nunu a ye.

⁴Ɓay tul riŋ ɗina ke goso suki ye-aw mí nah ziŋ wahɓayri ké Ŋgerzah wahɓay hi̧ na. Wahɓayuri ndɔ-ndɔh pi ŋge-ŋger pi dale, sa̧w mi̧hri woiri sɔɓ ɓa sa̧w mi̧hri Ŋgerzah ɓay tul wahɓayuri ké nah ziŋ. Wahɓay ra ten wuri ɓil sa̧w mi̧hri woiri a som siɓa ké ɓa mun a puŋu ke tasa̧y fe tukala.

⁵Kaŋ mí í ta mun woiri ɗik, í so kanlaw tul Ŋgermbay ke goso suki, í so goso suki ke fe tuna ɓay a ketina,

⁶í so fe tuna ɓay a ketina ke mgbá mun, í so mgbá mun ke su̧hlaw, í so su̧hlaw ke siŋ sina ké si mbew ke Ŋgerzah,

⁷í so siŋ sina ké si mbew ke Ŋgerzah ke mgbá in, í so mgbá in ke law sana.

⁸Gelke feri-ay mgba law woiri mí seh ma pol pol, i ta kaɓ gɔr ya, i ta na ɓa kpuh a ho̧ku ya pi wara le, tuna ké i tu Gaŋ wah Ŋgermbay Zezu ra mí i vba gbah gbah ɓilu.

⁹Mí nzuk ké feri-ay poh ni le, ke ɓa ra̧w, ke ko gel ɗih ya. Suya ye ké lu pol sa̧ ra ke yȩkre ɓayu kpuɗ.

¹⁰Sa̧wu mí yi̧n biri í ta mun woiri ɗik hi̧ ɓay ɗina ké Ŋgerzah ɗi wuri ɓa sa̧w ye ra ɓá ŋga̧h kparaŋ kparaŋ. I ƴo tul láɓ feri-aw ra le, bɔk woiri ta lo ya,

¹¹ɓayu ké mahful ké hi̧ nzuk rih ɓil lák mbay Gaŋ wah Ŋgermbay Zezu ké na ɓa ŋgɔh ra, a ye ke ya̧ na ke ndɔk hul mí ke ɓay ndar mahfulu ku̧ ndɔk woiri ke law mbew.

¹²Sa̧wu mí-i mbi tul bi ɓay dum law woiri kpatara ké tul feri-aw. I tu-tu da, i ƴo ɓa kpuh-u ŋgi̧w ŋgi̧w ké tul ketina ké ƴo ri da-ay.

¹³Ké mi kaɓ tukala-ay ɓáy ra, mi ko ɓahri, kaɓna bi ƴo gelu gaŋ ɓay mí ndukru hɔrɔ ké law woiri hi̧ wuri í ker ɓay tul feri-aw.

¹⁴Ɓay fe le nam ké kerpuh bi ɓay ti̧h ɓa kaŋpele toŋ ɗih mba kandɔk ké Gaŋ wah Ŋgermbay Zezu sɔk mi.

¹⁵Mi ƴo ta mun bi ɗik ɓay hi̧ fal tɔrna bi ke tukala-ay le, sa̧wsehri gbam, kerɓay woiri ɓay dum law woiri tul feri-aw.

¹⁶Ɓayu ké ɓay ŋgerna Gaŋ wah Ŋgermbay Zezu ke ɓay gina ye ké nah ɓah hi̧ wuri i lah ra ta ɓa tuku kú-u tuk ke goso-u goso-u mí nah dih falu ya. Le nah ko ni ke ŋgerna Mbay ye ke nun wah gbak gbak.

¹⁷Ke ya̧ pirna ke riŋ ɗina ké ta̧w baah Ŋgerzah. Kusol ur ké nzak Nzuk riŋ ɗina-aw mgbe ké tul ye ɓahri : « Gun bi mí na-ay. Ke ɓa gun sana bi. Ke rih law bi mbamba. »

¹⁸Kusol ké ur ke nunmbamaw ra a wah gaŋ kara nah la-lah. Nah ƴo ziŋ ni ké tul kasaw ké su ƴona Ŋgerzah.

¹⁹Dara mí nah ƴo ke ɓay ké sɔ-sɔɓna ya. Ɓay ra Tempuki hi̧ gun nzak pihna Ŋgerzahri ɓah-u. I hi̧ tul woiri ɓilu le, ɓay ti̧h suk hi̧ wuri kandɔk lampe ké teh gel ɓil tirima si ka̧h tipele kaŋ, teh gel kandɔk roh pele ké ti̧h ɓil law woiri.

²⁰Tul ɓayay i tu-tu : ɓay mbew ké Tempuki hi̧ ku-u vbeh ɓil mbete Ŋgerzah ra ur ke kerɓay nzuk pirmatul ya, ta ɓa ɓay ké ndazi-u mu̧-mu̧h ya. Wara le ɓa a ye Tempuki mí ke ɓaŋ ɓayu ndoh nzak nzukri hi̧ ku ɓah nzak pihna Ŋgerzah.