Read Karang Gun mbete 1 Za̧h 1 Bible Online

Gun mbete 1 Za̧h 1 - Karang bible

Gun mbete 1 Za̧h 1

¹Ɓay a a̧y ké ƴo ke titilu[1], ké nah lah ke suk wah la-lah, ké nah ko ke nun wah ko-ko, ké nah he-hekre, ké nah za ke ndɔk wah, mí nah vbeh ɓayu hi̧ wuri. Ɓay ra ɓa sa̧w ɔkna.

²Ɔkna-u ten mun ti̧h ké nun nzukri. Nah ko-ko, mí nah te-teh ɓayu hi̧ wuri i lah ɓay ɔkna-u ké na sew ke sew ɓa ŋgɔh. Ɔkna ra na ta̧w baah mí ten mun ti̧h ké nun wah.

³Ɔkna-u ké nah ko, ké nah lah, mí nah ƴo el keni hi̧ wuri i lah dale, ɓay hi̧ a woiri kara í gi mbu̧h ziŋ na ɓa nzuk ké mbew yaŋ. Mbu̧hna wah ké mbew ƴo ziŋ baah pi ziŋ gun ye Ŋgermbay Zezu pi.

⁴Ɓayuri mí nah vbeh ɓay hi̧ law rihna wah ɓá mbah nzeŋ nzeŋ.

⁵Nzak pihna ké nah lah ké ta̧w ye ra, mí nah el ɓah ɓayu hi̧ wuri i lah ɓahri se, mun Ŋgerzah ɓa gel tehna. Tirima ndi̧ ta mun ye ya.

⁶Gelke nah ɓahri, nah mbu̧h mbew ziŋ Ŋgerzah, mí nah si sina ɓil tirima le, nah kuŋ ɓay. Siŋ sina a ketina-u, nah si ya.

⁷Nah si sina ɓil gel tehna kandɔk a ye ké-e ƴo ɓil gel tehna-u dale, nah mbu̧h ɓa nzuk ké mbew pi, mí sem gun ye Zezu ƴo hi̧ law wah pu kpa̧h kpa̧h, suya mbew zel ri ya.

⁸Gelke nah ɓahri, salɓay suya ta tul wah ya le, nah reh ful ke mun wah. Ɓay a ketina ta ta̧w wah ya.

⁹Mí gelke nah sɔk ketina ɓay suya wah le, a ye ké-e ɗɔr sal in ya, ké-e ƴo tul sal in ké-e ŋga̧h ziŋ na ɓa záh wah ra, ke ɓay lu salɓay suya ké tul wah. Ke él hi̧ law wah pu kpa̧h kpa̧h, suya-poŋ Ŋgerzah wah zel lawu ya.

¹⁰Gelke nah ɓahri, nah laɓ suya ya le, nah kuŋ ɓay ku̧ nzak ye. Ɓay ye ta ta̧w wah ya.