Read Karang Gun mbete 1 Za̧h 2 Bible Online

Gun mbete 1 Za̧h 2 - Karang bible

Gun mbete 1 Za̧h 2

¹Gun biri ɓil Ŋgermbay, ɓayri-aw mí-i vbeh hi̧ wuri ɓay rɔkɔ í laɓ suya. Nzuk mbew ké sakra woiri laɓ ra suya le, nzuk-yih tul wah ƴo ta̧w baah. Nzuku ɓa Ŋgermbay Zezu ké ŋga̧h sal in hi̧ Ŋgerzah ɓa záh wah.

²Ke poŋ mun ye ɓa fe puhna lu keni salɓay suya ké tul wah. Ke poŋ mun ye ɓay tul suya wah kaŋto ya wara le, ke poŋ mun ye ɓay sel feri gbam ké Ŋgerzah laɓ ké nunmbam ke tusiɓa pi.

³Kandɔkaw mí nah tu ɓahri se, gelke nah ƴo tul bolkusol yeri ra le, nah tu ni tu.

⁴Nzuk ké ƴo ɓahri, ke tu ni, mí bolkusol yeri ra, ke ƴo tulu ya le, nzuku ɓa nzuk nzak rɔkna. Ketina ta ta̧w ye ya.

⁵Nzuk a a̧y ké ƴo tul bolkusol ye ra bale, law sana Ŋgerzah ƴo law nzuku gaŋ, ɓa law sana Ŋgerzah a ketina. Kaŋ da ra mí nah tu ɓahri se, nah ƴo mbew ziŋ ni.

⁶Nzuk ké ƴo ɓahri, ke ƴo mbew ziŋ ni le, ké mbi siŋ sina ké a ye ke si.

⁷Gun sanari, ta ɓa bolkusol a foyu mí-i ƴo vbeh hi̧ wuri-ay ya. Wara le ɓa ta̧w bolkusol ké i ƴo keni ke titilu da̧y. Bolkusol ra ɓa bolkusol a ta̧wu. Bolkusolu ɓa ɓay ké i lah da.

⁸Mí-i el vbeh bolkusolu hi̧ wuri ɓa a foyu ɓáyay, ɓayu ɓa ketina ké ta̧w ye, ɓa ketina ké ta̧w woiri kara pi. Ɓayu ɓahri, tirima ƴo kalna. Gel tehna a kpakpaŋu ba, ƴo teh gel da wara.

⁹Nzuk ké ƴo ɓahri, ke ƴo ɓil gel tehna, mí ke fu̧y nzuk mbaŋ ye le, nzuku ƴo ɓil tirima ka̧h aŋay ɓáy.

¹⁰Nzuk ké ƴo sa nzuk mbaŋ ye le, ke ka-kaɓna ké gel tehna. Ndaw lihna ta ta̧w ye ya.

¹¹Mí nzuk ké ƴo saŋ nzuk mbaŋ ye bale, ke ƴo ɓil tirima. Ke si sina ɓil tirima. Ke tu fál suŋ mí ke ƴo si ma mari ya ɓay fe le, tirima ra̧h nun ye na nduŋ.

¹²Mi ƴo vbeh ɓayay hi̧ wuri a woiri gunri ɓahri, suya woiri lu ke tul woiri ɓay tul riŋ ɗina ye.

¹³Mi ƴo vbeh ɓayay hi̧ wuri a woiri baahri ɓahri, i tu ni ké-e ƴo ke titilu tu-tu. Mi ƴo vbeh ɓayay hi̧ wuri a woiri sekeri ɓahri, i haw ŋgermu ké tul ye mbay záh law a pipiri-u.

¹⁴Mi vbeh ɓayaw hi̧ wuri a woiri gunri ɓahri se, i tu baah tu-tu. Mi vbeh ɓayaw hi̧ wuri a woiri baahri ɓahri se, i tu ni ké-e ƴo ke titilu tu-tu. Mi vbeh ɓayaw hi̧ wuri a woiri sekeri ɓahri se, huhrumun woiri ƴo ri. Ɓay Ŋgerzah ra ziŋ kaɓna ké law woiri. I haw ŋgermu ké tul ye mbay záh law a pipiri-u ra.

¹⁵Í hi̧ law woiri ɓá tasa̧y tukala ya. Fe tukalari kara law woiri ɓá te tulu ya pi. Gelke law nzuk yih ɓay tukala le, law sana baah ta ke nzuku ya.

¹⁶Ɓay fe le fe tukalari mbew mbew gbam kandɔk ɗaka haymun, nun a pu tul feri, ndagiri tul fe tukala, gbamaw ur ké ta̧w baah ya. Wara le sa̧wu ɓa tukala.

¹⁷Kandɔkaw mí tukala ƴo kalna ke ɗaka fe-uri pi, mí nzuk a a̧y ké ƴo hi̧ tul ye ɓay laɓ fe ké Ŋgerzah yih dale, nzuku ka-kaɓna a sew ke sew.

¹⁸Gunayri, sew a ɔh tɔru ƴo ri da. Kandɔk ké i lah ɓahri, nzukbaa Ŋgermbay ƴo gina, mí aŋay daɓa nzukbaari ti̧h da. Sa̧wu mí nah tu ɓahri se, sew a ɔh tɔru ƴo ri da.

¹⁹Ku ti̧h ke sakra wah, mí ku ɓa nzuk wah ya. Ku ɓa ra nzuk wah le, ku ƴó ziŋ na gaŋ. Wara le ti̧hna woyri ten mun hi̧ nzukri ko ɓayay ɓahri, nzukri gbam ta ɓa nzuk wah ya.

²⁰A woiri ba, zezele fe Nzuk lawpuki zel wuri ɓa fe ye, mí i tu ketina gbam.

²¹Ɓayaw ké mi vbeh ra, mi vbeh ɓay sɔk wuri ketina-u ya, wara le mi vbeh ɓay fe le, i tu ketina ra tu-tu gaŋ. Mi vbeh ɓay fe le, kuŋɓay mbew ké ti̧h ké ta̧w ketina ta-a.

²²A ge mí ɓa nzuk-kuŋ ɓay le ? Nzuk-kuŋ ɓay ma̧y ɓay tul Zezu ɓahri, ta ɓa a ye Ŋgermbay ra ya. Nzuku ra ɓa nzukbaa Ŋgermbay. Nzuku ma̧y ɓay tul baah ke tul gun ye seɗe mbɔk.

²³Nzuk a suŋ suŋ gbam ké ma̧y ɓay tul gun ye le, baah ta ɓa bah nzuku ya pi. Nzuk ɓah ketina ɓay gun ye dale, baah ɓa bah nzuku pi.

²⁴A woiri le ɓay ké i lah ke titilu ra í hi̧ ɓá kaɓ ziŋ wuri. Gelke ɓay ké i lah ke titilu-aw kaɓ ziŋ wuri le, kaɓna woiri kara ƴo mbew ziŋ gun pi ziŋ baah pi.

²⁵Mí wahɓay ké-e wah ziŋ na-ay ra ɓa ɔkna ké na sew ke sew ɓa ŋgɔh[2].

²⁶Kandɔkaw mí-i vbeh ɓayawri hi̧ wuri ɓay tul nzukri ké ƴo ra̧h tul ketina hi̧ wuri.

²⁷A woiri le zezele fe ké zel wuri ɓa fe ye ra i ya̧-ya̧, mí i kaɓ keni. I ta ke ɗaka ɓay hi̧ nzuk ɓá firma wuri ɓay a ɓoru ɓoɗ ya. Wara le i tu ketina kandɔk zezele fe ye ké zel wuri mí ƴo firma wuri ketina fi-firma. Kuŋɓay ta ri ya. Í kaɓ keni.

²⁸Dale gunri, í kaɓ keni ɓay nam ké-e tén mun ye le, selmun ƴo ri. Su̧hru ta se nun wah ke nam gina ye ya.

²⁹I tu ɓahri, ke ƴo tul sal in ké-e ŋga̧h ziŋ na ɓa sa̧w ye ra le, i el tu ɓahri, nzuk a suŋ suŋ gbam ké tu ni ɓa záh woyri ra, sa̧w mbuŋna woyri ur ké ta̧w ye.