Read Karang Gun mbete 1 Za̧h 5 Bible Online

Gun mbete 1 Za̧h 5 - Karang bible

Gun mbete 1 Za̧h 5

¹Nzuk a suŋ suŋ gbam ké law ye te sa tul ɓayay ɓahri, Ŋgermbay ɓa a ye Zezu le, sa̧w mi̧hri-mbuŋ ni ɓa Ŋgerzah. Nzuk a suŋ suŋ gbam ké sa bah gun le, sa sa̧w ye pi.

²Nah tu ɓahri, nah sa gun Ŋgerzahri kandɔkay le, nah sa Ŋgerzah, nah ƴo tul bolkusol yeri.

³Fe-u mí ɓa law sana Ŋgerzah mí na ɓay náh ƴo tul bolkusol yeri. Bolkusol yeri kara yih ɓa sukna ké tul wah ya ɓay fe le, nzuk a suŋ suŋ gbam ké mbuŋ mbuŋna a sa̧w mi̧hri Ŋgerzah le, haw ŋgermu tul tukala. A fe mí haw ŋgermu tul tukala le ? Kanlaw ké nah kan sa tul Ŋgermbay Zezu mí haw ŋgermu.

⁵A ge mí haw ŋgermu tul tukala le ? Sa ɓa nzuk ké kan law tul ɓayay ɓahri, gun Ŋgerzah ɓa a ye Zezu.

⁶Ŋgermbay ti̧h ɓa nzuk pirmatul fál a mbih pi, fál a sem pi mí ɓa a ye Zezu[6]. Ke ti̧h ké mbih yaŋ ya. Wara le ke ti̧h ke ɓil mbih pi, ke ɓil sem pi. Tempuki mí te-teh ɓayu ɓay fe le, Temu ɓa Tem a Ketina.

⁷Tempuki, mbih, sem, feri ké sayaw gbam te-teh ɓay ye hi̧ na. Tehɓay feri ké sayaw ti̧h mbew yaŋ.

⁹Nzuk pirmatul te-teh ɓay le, nzukri ƴo ya̧-u. Tehɓay Ŋgerzah ŋger mba tehɓay nzuk pirmatulri mba-mba. Ŋgerzah te-teh ɓay gun ye Zezu kandɔkay :

¹⁰Nzuk ké kan law ye tul gun Ŋgerzah le, nzuku tu tehɓayu tu-tu. Nzuk ké ya̧ tehɓay Ŋgerzah ya le, nzuku kuŋ ɓay ku̧ nzak Ŋgerzah ɓay fe le, ke ya̧ tehɓay Ŋgerzah ké-e te-teh ɓayu si tul gun ye ra ya, mí ke tu tehɓayu ya pi.

¹¹Tehɓay ké Ŋgerzah teh hi̧ na mí na-ay mí ƴo ɓahri se, ke hi̧ na ɔkna a ké na sew ke sew ɓa ŋgɔh. Sa̧w ɔkna-ay na ta̧w gun ye.

¹²Gun ye ƴo ziŋ nzuk le, nzuku ƴo ke ɔkna ra. Gun Ŋgerzah ƴo ziŋ nzuk ya le, nzuku ta ke ɔkna ya.

¹³Kandɔkaw mí-i vbeh ɓayu hi̧ wuri ɓay í tu ɓahri se, ɔkna ké na sew ke sew ɓa ŋgɔh ra, i ƴo wuri keni a woiri ké i kan law woiri sa tul riŋ ɗina gun Ŋgerzah.

¹⁴Ɓay fe ké hi̧ nah mbi ɓay ke selmun ké pol ye mí na-ay : gelke nah vbi fe ké si ke law ye le, ke lah na lah.

¹⁵Gelke nah tu ɓahri, ke lah vbiɓay wah lah le, nah tu ɓahri se, ke yih nzak wah da.

¹⁶Nzuk mbew ko ra nzuk mbaŋ ye ƴo laɓ sam suya ké mah si ziŋ ni ma hul ya le, nzuku ɓá vbi Ŋgerzah ɓay ɔkna nzuk mbaŋ ye-aw. Ke láh ni ɓay hi̧ nzukri ké ƴo ɓil suya ké mah hul ya ra ɓá ziŋ ɔkna. Sam suya ké ɓay si ziŋ nzuk ma hul ƴo ri[7]. Ɓay vbi Ŋgerzah ɓay nzuk ké laɓ sam suya a kandɔkaw le, mi ɓah ɓayu ya.

¹⁷Saŋna a ani ani-u gbam ké nzuk saŋ Ŋgerzah ɓa záh ye le, ɓa suya munu. Mí sam suya ké mah si ziŋ nzuk ma hul ya ra ƴo ri.

¹⁸Nah tu ɓahri, nzuk a suŋ suŋ gbam ké mbuŋ mbuŋna a sa̧w mi̧hri Ŋgerzah le, laɓ suya ya. Gun a sa̧w mi̧hri Ŋgerzah ƴo ko kona ma tul woyri. Záh law a pipiri-u a ye mbay záh tukala ta za niri ya.

¹⁹Nah tu ɓahri, sa̧w wah ɓa Ŋgerzah. Nzuk a ɓoruri gbam ba, na ndɔk záh law a pipiri-u ra.

²⁰Nah tu ɓahri se, gun Ŋgerzah ƴo ri, mí ke mgbur nun wah hi̧ nah tu ni a ye ké-e ɓa ketina. Nah ƴo mbew ziŋ ni a ye ké-e ɓa ketina, nah ƴo mbew ziŋ gun ye Ŋgermbay Zezu. A ye ra, ke ɓa Ŋgerzah a ketina, ke ɓa sa̧w ɔkna ké na sew ke sew ɓa ŋgɔh.

²¹Gunri, í ko tul woiri ger ɓay záh a ɓoruri. Ku ɓa záh a kɔkuri.