Read Karang Gun mbete 2 Za̧h 1 Bible Online

Gun mbete 2 Za̧h 1 - Karang bible

Gun mbete 2 Za̧h 1

¹Mbaywu̧y[1], a bi ŋgernzuk, mi vah mu, a wo ké Ŋgerzah lu mu ɓa sa̧w ye. A wo ke gun wori, mi vah wuri ke law sana a ketina ké mi sa wuri keni. Ta ɓa a bi ke hȩk mí-i sa wuri ya. Wara le nzukri riw ké tu ketina tu ra sa wuri pi.

²Nah sa haniri ɓay tul ketina ké kaɓ ziŋ nari. Ketina-ay ɓay ƴo ziŋ na sew ke sew ɓa ŋgɔh.

³Lawsuki, law in, ɗeŋ ɓay ƴo ziŋ na ɓil ketina wara le ɓil law sana pi. Feri ké sayaw ti̧h ké ta̧w baah Ŋgerzah pi, ti̧h ké ta̧w Ŋgermbay Zezu a ye gun baah pi.

⁴Mi zay mun bi keɗ keɗ ɓay fe le, gun wori ké mi ziŋ, ku lah bolkusol baah, mí ku si keni sina a ketina.

⁵Dale mi ƴo goŋ mu mbaywu̧y, nah sa hani. Goŋna ké mi vbeh hi̧ mu-ay ta ɓa bolkusol a foyu ya wara le, bolkusolu ra nah ƴo keni ke titilu da̧y.

⁶Law sana ra na ɓay náh si wuri sina mah ke bolkusol yeri. Bolkusol ké i lah ke titilu ra na ɓay hi̧ ɓo í si wuri sina ké ɓilu.

⁷Nah sa hani ɓay fe le, daɓa nzukri ké ƴo ra̧h tul ketina ɓoɗ mí ƴo tukala. Nzak woyri ma̧y ɓay tul Ŋgermbay Zezu ɓahri se, Ŋgermbay gi ya. Zezu-aw ɓa nzuk pirmatul kaŋto. Nzuk ra ra̧h tul ketina hi̧ nzukri, nzuku ra ɓa nzukbaa Ŋgermbay munu.

⁸Í ko tul woiri ger ɓay ɓo í zi pihnari ké nah laɓ ya wara le, í ziŋ kpaŋndɔk woiri ndekle ndekle ma.

⁹Nzuk a suŋ suŋ gbam ké kal si pol mí kaɓ ɓil fe firma ké si tul Ŋgermbay ra ya le, Ŋgerzah tu ni ya. Nzuk ké kaɓ ɓil fe firma-u le, a ye mí ke ƴo ke baah ke gun mbɔk.

¹⁰Gelke nzuk gi ta̧w woiri, mí fe firma ké-e firma wuri si ke fe firma-ay ya le, í ya̧ ni ma ta̧w woiri ya. Nzak woiri kara ɓá vah ni ya pi. Ɓayu ké nzuk vah ni le, nzuku mbu̧h mbew ɓil fe laɓna ye ƴo laɓ pihna hi̧ záh law a pipiri-u munu.

¹²Ɓay a ɓoruri ɓa ŋgi̧-u ké mah vbehna ƴo ri, mí mi sa mbi bik ɓay vbeh ku̧ ɓil mbete ya. Wara le mi taw ɓay si ta̧w woiri, náh lu mberem nzak ke nzak ɓay hi̧ law wahri ɓá rih tul haniri keɗ keɗ.

¹³Yi̧n wo a wu̧yu ké Ŋgerzah lu ni ɓa sa̧w ye, gun yeri vah mu.